Popatora ka tau-tau nakalumana
5
Umba komi tau-tau nakalumana, epemo tesaku eꞌi. Komi kana motumangi bo mageo mpajea sabana komi kana mandasa mpuꞌu!
2 Kakalumanamu narompomo. Pakeamu nikoni saipamo.
3 Bulawa bo salakamu nikoni ntagaramo sabana aga niboli-boli waꞌamo! Komi aga nompasiromu mpakadea mbara-mbara ri dunia, tapi dunia eꞌi ntora maopumo. Tagara bulawa bo salakamu etu kana majadi sabi mantujuraka salamu, pade kaopuna komi kana rasuku riara apu.
4 Komi daꞌa nombabayari tambo ka tau-tau to nokarajaa ri tinalumu. Tambo etu woꞌu majadi sabi mantujuraka salamu ri ngayo Alatala, sabana pokangangua ira to nokato ri tinalumu niepe Pue Alatala to Neliu Nggakuasa.
5 Katuwu komi ri dunia neliu nggagana, pade doimu aga nipake komi nompebasa bo nompesana ri dunia eꞌi. Nasimbayu ewa japi to nipakaboya nompopea eo mposambale iwetu woꞌu komi. Ante daꞌa ninjani-njani, komi kana rasuku ri Eo Mpotangara.
6 Komi woꞌu nombasuku bo nompatesi tau to nanoa, naupa ira daꞌa nangewa komi.
Kita kana mosabara tempo nipandasa
7 Jadi sampesuwu-sampesuwuku, komi kana mosabara sampe i Pue Yesus marata. Kitamo iwenu posabara sambaꞌa topotinalu nompopea sampe nowua nuapa to nitujana. Ante nosabara iꞌa nompopea uja tempo motuja bo uja nompakajadi wuana.
8 Komi woꞌu kana mosabara pade maroo rara sabana namosumo karata i Pue Yesus.
9 Neꞌe mosipongua bo mosipakasala, ala neꞌe komi rasuku Alatala. Toramo! Namosumo Topotangara, mana masaeka marata.
10 Sampesuwu-sampesuwu, tukimo jonjo nabi-nabi to nompasimbayu tesa nggari jaꞌi Pue. Ira batena nosabara bo naroo rara tempo nipandasa.
11 Iramo to niuli tau nasana mpuꞌu, sabana ira naroo bo nosabara tempo nipandasa. Tantu niepe komi tesa Ayub nggaolu, iwenu sampe iꞌa naroo mpuꞌu tempo nipandasa. Pade ninjani komi iwenu sampe katuwuna nipakabelo bali, sabana i Pue neliu mpuꞌu towena bo asi matana. a
Neꞌe metunda
12 Sampesuwu-sampesuwu, to napoko mpuꞌu ratora komi iweꞌi: Neꞌe metunda ante manguli langi bara tana bara nuapa-nuapa ntanina. Ane iyo, ulimo, “Iyo,” ane daꞌa, ulimo, “Daꞌa.” Neꞌe komi metunda ala neꞌe komi mawela pesuku nu Alatala.
Ane maria tau majuꞌa iꞌa kana raposambaya
13 Ane maria nggari tatongo komi to nasusana, iꞌa kana mosambaya. Ane maria tau nadamba, iꞌa kana modade mantoiya Alatala.
14 Pade ane maria tau najuꞌa, iꞌa kana mompokio topanggeniaka-topanggeniaka topomparasaya. Ira kana mosambaya ka tau to najuꞌa etu bo mombagese lana ri korona riara sanga i Pue.
15 Ane ira mosambaya ante pomparasaya mpuꞌu, i Pue kana mompakabelo tau najuꞌa etu. Pade ane juꞌana etu nopuꞌu nggari silaka, i Pue kana mombaampungi iꞌa.
16 Etumo sabana komi kana mosipangaku sala, pade mosiposambaya ala juꞌa komi rapakabelo. Posambaya sambaꞌa tau to nanoa rarana nabete mpuꞌu kuasana.
17 Pekirimo jonjo nabi Elia nggaolu. Iꞌa sambaꞌa manusia biasa nasimbayu ewa kita. Iꞌa nosambaya ante mpuꞌu-mpuꞌu rarana ala neꞌe mauja. Pade mpuꞌu-mpuꞌu daꞌa nauja tolumpae santongo kasaena. b
18 Kaopuna iꞌa nosambaya sangganipa pade naratamo uja nggari langi sampe tuja-tuja ntau najadi bali. c
19 Sampesuwu-sampesuwuku, ane maria ri tatongo komi tau daꞌa mana mantuki Tesa nu Alatala pade naria woꞌu roana ntanina malau manggeni iꞌa manjili bali ri jaꞌi Alatala, etu powia to nabelo.
20 Toramo! Tau to nanggeni roana to nasilaka etu manjili nggari jalana to nasala mompakasalama roana etu nggari pesuku Alatala, pade silaka roana to nadea kana raampungi.
Tabe nggari jaꞌiku,
Yakobus