Neꞌe mowega ante dunia
4
Nggari umba pura posibaga bo posinggarau to naria ri tatongo komi? Natantumo etu nggari dota rara komi to najaꞌa to nosibaga riara ntaꞌimu.
2 Komi naino tapi daꞌa nombarata, jadi komi nepatesi. Komi nasiriati tapi daꞌa ria nirata komi. Jadi komi nosinggarau bo nosibaga. Sampesuwu-sampesuwu, komi daꞌa nombarata nuapa to nipodota komi sabana komi daꞌa nerapi ka Alatala.
3 Pade naupa komi nerapi komi daꞌa nombarata sabana patuju komi merapi nasala. Nuapa niperapi komi etu aga rapompakasana koro komi mboto.
4 Komi nasimbayu ewa besi to niporongo aga nongei-ngei ka langgai ntanina to najadi bali nu rongona! Natantumo ninjani komi ane komi mowega ante dunia to najaꞌa eꞌi komi majadi bali nu Alatala. Isema-sema madota mowega ka dunia to najaꞌa eꞌi iꞌa mompajadi korona mboto bali nu Alatala.
5 Neꞌe rapekiri komi daꞌa nakono tesa nu Buku Nagasa to nanguli iweꞌi: “Dota to naria riara ntaꞌita naroso mpuꞌu!” Etu mpuꞌu-mpuꞌu nakono!
6 Tapi petulungi Alatala ka kita neliu nggaroso nggari dota etu. Etu sampe naria tesa to nitulisi riara Buku Nagasa iweꞌi:
“Alatala nangewa tau to nalanga rarana,
tapi Iꞌa nompotowe tau to naede rarana.” (Ams. 3:34)
7 Sabana etu, sampesuwu-sampesuwu, pekoumo ri jaꞌi Alatala, pade ewamo Magau nu Seta, pade iꞌa kana mangowa malai nggari jaꞌi komi.
8 Pakamosumo ri jaꞌi Alatala pade Alatala woꞌu mompakamosu komi. Komi to nasilaka, kabasakamo pokainggumu to najaꞌa! Pakagasamo rara komi to norongu rarana!
9 Komi masipato masusa rara bo motumangi ante manjoso rara mompekiri silaka komi. Pongirimu kana majadi tangimu, bo kadamba raramu kana majadi kasusa raramu.
10 Pakaedemo rara komi ri ngayo i Pue pade Iꞌa kana mompakalanga komi.
Neꞌe mombasalai roamu topomparasaya
11 Sampesuwu-sampesuwu, neꞌe mosisalai, sabana tau nombasalai bo nompakasala roana topomparasaya, iꞌa nombasalai bo nompakasala Atura-atura nu Alatala. Pade ane komi mompakasala Atura-atura nu Alatala, batuana komi daꞌapa topantuki atura, tapi komi aga topompakasala atura etu.
12 Kakonona aga sambaꞌa lau to nakuasa mombawai atura ka manusia bo mompakasala manusia, etumo Alatala mboto. Aga Iꞌamo to nakuasa mompakasalama kita atau mombasuku kita ri naraka. Tapi komi daꞌa masipato mompakasala sanggamanusiamu!
Neꞌe rakalinga dota Alatala riara niata
13 Sampesuwu-sampesuwu, naria ri tatongo komi to nanguli iweꞌi: “Eo eꞌi bara naile kami kana malau mpaka ri ngata ri anu bo metoꞌo ri setu sampae kasaena lau modaga bo mompaelo doi.” Epe komimo tesaku eꞌi!
14 Daꞌa ninjani komi nuapa majadi ante katuwumu naile. Katuwu komi ri dunia eꞌi nasimbayu ewa sumoa, aga sampalai nikita pade kaopuna nalipomo.
15 Kakonona komi kana manguli iweꞌi: “Ane rapodota i Pue kami kana matuwu mompowia eꞌi bara etu.”
16 Tapi komi daꞌa nanguli iwetu. Komi aga nangoa bo nalanga rara. Kakonona pura-pura pangoa ewa etu najaꞌa!
17 Jadi toramo, isema-sema nangginjani nuapa to nabelo rapowiana tapi daꞌa nipowiana, tau etu nasilaka.