Tau to naria pomparasaya to nakonona kana mombajagai jilana
3
Sampesuwu-sampesuwuku, neꞌe madea nggari tatongo komi madota majadi guru mompatuduki Tesa nu Alatala, sabana ninjani komi mboto kita to najadi guru kana ratangara Alatala banepia ante potangara to neliu nggatomo nggari tau ntanina.
2 Toramo! Kita pura-pura naoso nowia sala. Tapi tau to daꞌa sanggani nowia sala ante tesana, pomparasayana daꞌa nakura nuapa-nuapa. Iꞌa namala nombakuasai pura-pura korona.
3 Kita mombadika sama to nanggedi ri nganga jara ala iꞌa mantuki dotata. Ante akala iwetu mamala kita mombagoliaka pura-pura koro jara to nabete etu.
4 Pekirimo jonjo ntanina ewa sakaya bete. Naupa sakaya etu nabete mpuꞌu pade nikeni poiri naramboso, tapi namala nigoliaka guli to nanggedi nantuki dota topompajala sakaya etu.
5 Iwetu woꞌu ante jilata. Naupa nanggedi mpuꞌu, jilata nipake mompakalanga tesa.
Pekirimo jonjo ewa pangale. Naupa nabete mpuꞌu, pangale namala rapakajela ante apu to nanggedina.
6 Jila manusia nasimbayu kajaꞌana ante apu. Ri korota jila etumo puꞌu kajaꞌana to nompakajaꞌa njumaongu korota. Jila etu nikuasai kajaꞌana to nopuꞌu nggari naraka sampe jila etu woꞌu nompandasa njumaongu katuwuta.
7 Pura-pura binata namala rapoponondo, nabeloka tonji, nabeloka binata nenjoyo, nabeloka bau riara ue. Pade naria mamimo tau to nompoponondo ira.
8 Tapi daꞌa ria sambaꞌa tau to namala mompoponondo jila manusia. Jilata etu najaꞌa mpuꞌu, daꞌa namala nitaꞌamaka. Jilata nasimbayu ewa bisa nu ule to mepakamate.
9 Ante jila kita nanguli tarima kasi ka Pue Alatala, Umata ri suruga. Tapi ante jilata woꞌu kita nombajanjiaka sanggamanusiata to nipajadi Alatala nantuki lenjena mboto.
10 Nggari saongu sumba nesuwu tesa tarima kasi bo tesa-tesa nombajanjiaka woꞌu. Sampesuwu-sampesuwuku, kakonona daꞌa masipato iwetu!
11 Pekirimo mata ue. Natantumo daꞌa naria mata ue nompopesuwu ue nameli bo ue napaꞌi nggari uluna saulu lau!
12 Waꞌa woꞌu ante kayu. Natantumo daꞌa ria kayu ara nowua zaitun, pade daꞌa woꞌu naria anggur nowua ara. Mata ue to napaga daꞌa woꞌu mamala mompopesuwu ue nameli.
Noto nggari jaꞌi Alatala
13 Ane maria nggari tatongo komi to nataꞌu bo nanoto, etu kana rapopokita komi ante pokainggu to nabelona. Noto komi etu kana rapopokita ante mowia to nabelona ante kaede rara.
14 Tapi ane komi aga nasiriati bo najuꞌa rara pade aga mompekiri kabelo koro komi mboto, neꞌe mantoiya noto ewa etu, sabana inggu komi to najaꞌa etu nanjapuaka Tesa nu Alatala to nakonona.
15 Noto ewa etu daꞌa nopuꞌu nggari jaꞌi Alatala. Etu aga nopuꞌu nggari dunia to najaꞌa eꞌi, nggari dota rara manusia to najaꞌa, bo nggari seta-seta.
16 Ri umba naria tau aga nasiriati bo nompekiri kabelo korona mboto, natantumo ri setu woꞌu naria posinggarau bo mpengaya-ngaya powia to najaꞌana.
17 Tapi tau to naria noto to nopuꞌu nggari jaꞌi Alatala, nagasa rarana, daꞌa ria pokaingguna nuapa-nuapa to najaꞌana. Pade iꞌa woꞌu natuwu nosinggabelo ante tau ntanina, nalusu rarana, bo iꞌa nasadia mantarima pombarata tau ntanina. Naasi mpuꞌu matana nanggita roana to nandasa, pade nadea powiana to nabelo. Iꞌa daꞌa nompakasabingga, pade natebuka bo nanoa rarana.
18 Pokainggu to nanoa nasimbayu ewa wua to nituja. Tau-tau to natuwu nompoposinggabelo tau ntanina nombatuja wua etu, pade asele to najadina etumo powia to nanoa ri tatongo ira pura-pura.