Tau to naria pomparasaya to nakonona daꞌa nanggita lenje
2
Sampesuwu-sampesuwuku, ewa tau to nomparasaya Yesus Kristus, Pueta to nakuasa, neꞌe komi manggita lenje.
2 Rapana maria tau nakalumana marata ri gareja komi nompake sinji bulawa bo pakea nagaya, pade marata woꞌu sambaꞌa tau napakasi nompake pakea nte sanjia-njia.
3 Pade komi neliupa mombabila tau nopakea nagaya etu. Komi manguli ka iꞌa, “Kamaimo, Tua, mekatoko ri kadera to nabelona eꞌi.” Tapi ka tau to napakasi komi manguli, “Pekanggore gusaꞌamo, iko, bara pekatokomo ri jaula seꞌi.”
4 Ante powia iwetu komi nompoposisala sanggamanusiamu. Komi nasimbayu ewa topotangara to najaꞌa pompekirina.
5 Toramo, sampesuwu-sampesuwu to nipotoweku, tau napakasi ri dunia eꞌimo to nipelisi Alatala. Naupa daꞌa nadea kakalumana ira ri dunia, ira nipelisi Alatala majadi tau to naroso pomparasayana. Iramo to mantarima rasi nggari jaꞌi Alatala to nijanjina ka tau to nompotowe Iꞌa.
6 Tapi naupa iwetu komi nanjalai tau napakasi bo nombabila tau nakalumana. Nokuya komi nombabila tau-tau nakalumana, tano iramo to nantanamaka komi bo nangumbunjai komi mpaka ri jaꞌi ntopotangara?
7 Tau nakalumanamo to nanguli sinjaꞌi sanga to nibila, etumo Yesus to najadi Pueta!
8 Komi mowia to nabelona ane komi mantuki atura Alatala to napokona to nitulisi riara Buku Nagasa iweꞌi: “Potowemo sanggamanusiamu nasimbayu ewa komi nompotowe koromu mboto.” a
9 Tapi ane komi aga manggita lenje, komi mowia silaka. Atura Alatala etu nompakanoto komi nasilaka.
10 Toramo! Ane komi mompasimbuku mantuki pura-pura Atura Alatala tapi mombaliunaka aga sangaya atura, etu nasimbayu ewa komi nombaliunaka pura-pura Atura etu.
11 Jonjona, Alatala nanguli, “Neꞌe mebualo,” pade Iꞌa woꞌu nanguli, “Neꞌe mepatesi.” Jadi ane komi daꞌa mebualo tapi mepatesi, komi woꞌu topombaliunaka Atura Alatala.
12 Komi kana ratangara Alatala nantuki Aturana to nakuasa mombakabasaka manusia nggari kuasa silaka. Jadi komi kana mainga motesa bo mompowia nuapa-nuapa,
13 sabana tempo Eo Mpotangara etu Alatala daꞌa maasi matana manggita tau to daꞌa naasi matana nanggita sanggamanusiana. Tapi tau to naasi matana nanggita sanggamanusiana daꞌa paraluu maeka. Iꞌa daꞌa mawela pesuku Alatala.
Tau to naria pomparasaya to nakonona nompowia to nabelona
14 Sampesuwu-sampesuwuku, daꞌa ria gunana tau nanguli, “Aku nomparasaya i Pue Yesus,” ane iꞌa daꞌa mompopokita etu ante powiana to nabelona. Natantumo pomparasayana ewa etu daꞌa mamala mompakasalama iꞌa.
15 Rapana maria roamu topomparasaya to nandasa sabana daꞌa ria pakeana bo daꞌa magana panggonina eo-eo.
16 Pade rapana komi aga manguli ka iꞌa, “Pakabelo-belo ri jala. Kusarumaka komi mombarata baju mpane pade manggoni sampe mabosu taꞌi.” Tapi ane komi daꞌa mompakagana ka iꞌa nuapa to niparaluuna riara nggatuwuna, tesa komi etu daꞌa ntoto ria gunana!
17 Iwetu woꞌu ante pomparasaya. Ane daꞌa rapopokita ante powia to nabelona, pomparasaya etu ewa namate, daꞌa ria gunana!
18 Bara maria tau to manguli, “Naria tau to nanjarumaka pomparasayana ala rapakasalama bo naria woꞌu to nanjarumaka powiana to nabelona.” Pesonoku ka ira iweꞌi: “Daꞌa mamala komi mompopokita ka aku pomparasayamu ane daꞌa ante powiamu to nabelona. Tapi aku mompopokita ka komi pomparasayaku ka Alatala ante powiaku to nabelona.”
19 Komi nomparasaya Alatala aga sambaꞌa lau. Etu nabelo, tapi daꞌa nagana! Seta-seta woꞌu nomparasaya iwetu! Tapi ira nolete pura ante nawiora rara, sabana ninjani ira Alatala kana mombasuku ira banepia.
20 Nadoyo tanu komi! Kupakanoto ka komi daꞌa ria gunana aga momparasaya. Paraluu woꞌu powia to nabelona.
21 Toramo tesa Abraham, totuꞌata nggaolu. Iꞌa nireke Alatala tau nanoa rarana sabana powiana, etumo tempo iꞌa nombawai anana Ishak ka Alatala ri petoꞌo pesomba. b
22 Nggari tesa etu nanotomo ka kita pomparasaya Abraham nosinggeni ante powiana, pade powiana etu nompakagana pomparasayana.
23 Jadi ante iwetumo tesa Buku Nagasa nipakadupa to nanguli iweꞌi: “Abraham nomparasaya Alatala pade nggari pomparasayana etu iꞌa nireke Alatala tau nanoa rarana.” c Etu sampe Abraham niuli wega nu Alatala.
24 Jadi sampesuwu-sampesuwu, nanotomo ka kita tau nireke Alatala nanoa rarana sabana iꞌa nowia to nabelona, daꞌa aga momparasaya bayangi.
25 Iwetu woꞌu ante i Rahab, besi bajinga nggaolu etu. Iꞌa nireke Alatala tau nanoa rarana sabana powiana. Iꞌa nantarima mata-mata nto Yahudi riara njapona bo nantulungi ira nalai nggari ngata etu mantuki jala ntanina. d
26 Jadi sampesuwu-sampesuwu, nasimbayu ewa koro manusia ane mana ria nosana namatemo, iwetu woꞌu ante pomparasayata. Ane daꞌa nipopokita ante powia to nabelona, pomparasayata etu namate, daꞌa ria gunana.