SURA NGGARI JAꞌI
YAKOBUS
Petabe
1
Sura eꞌi nggari jaꞌiku Yakobus, batua Alatala bo Pue Yesus Kristus, ka pura-pura topomparasaya Alatala to nosimpotatare ri njumaongu dunia. Tabe nggari jaꞌiku.
Parasayamo Alatala tempo nipesoba, perapi noto nggari jaꞌina
2 Sampesuwu-sampesuwu, ane komi mombarata mpengaya-ngaya pesoba, komi kana mosukuru,
3 sabana ninjani komi ane komi matutu momparasaya i Pue tempo mombarata pesoba kaopuna komi majadi maroo rara.
4 Jadi komi kana tunggai maroo ala komi majadi manoto, pade daꞌa maria inggu nuapa-nuapa to masipato raontiaka, pade pomparasaya komi ri jaꞌi Alatala daꞌa makura nuapa-nuapa.
5 Ane maria nggari tatongo komi to nakura notona, iꞌa kana merapi noto nggari jaꞌi Alatala. Pade Alatala kana mombawai noto etu ka iꞌa, sabana Alatala nombawai ka pura-pura tau ante najoi rarana. Daꞌa niwaina nggarau.
6 Tapi tau to merapi kana momparasaya mpuꞌu-mpuꞌu. Daꞌa mamala iꞌa morongu rara, sabana tau morongu rara nasimbayu ewa balumba ri tasi nitawui poiri gusaꞌa guseꞌi.
7-8 Tau norongu rara ewa etu daꞌa naliongu pekirina. Neꞌe iꞌa manjarumaka mombarata nuapa-nuapa nggari jaꞌi Pue!
Tau napakasi bo tau nakalumana
9 Topomparasaya to napakasi kana madamba-damba ane iꞌa rapakalanga Alatala katuwuna.
10 Pade topomparasaya to nakalumana woꞌu kana madamba-damba ane iꞌa rapakaede Alatala katuwuna, sabana ninjaninamo iꞌa kana mamate nasimbayu ewa sese kawoko to nalipomo karambana.
11 Tempo mata eo nebulu ante kapanena mpuꞌu, kawoko etu kaliu-liu nalele sampe naronto sesena, pade nalipo puramo karambana. Iwetu woꞌu ante tau nakalumana. Sanggani tempo iꞌa kana mamate riara popaelona.
Pesoba
12 Nasana mpuꞌumo tau to naroo rarana riara pesoba, sabana ane iꞌa mantaꞌamaka sampe ri kaopuna, Alatala kana mombawai ka iꞌa katuwua mabelo sampe ri kasae-saena. Etu to nijanji Alatala ka tau-tau nompotowe Iꞌa.
13 Ane sambaꞌa tau rapesoba mowia kajaꞌana neꞌe iꞌa manguli, “Pesoba eꞌi narata nggari jaꞌi Alatala.” Etu daꞌa nakono, sabana Alatala mboto daꞌa mamala rapesoba mowia kajaꞌana pade Iꞌa daꞌa woꞌu mompesoba tau mowia kajaꞌana.
14 Tapi tau nipesoba mowia kajaꞌana ane iꞌa rataja bo rakeni dota rarana mboto to najaꞌa.
15 Ane dota rarana to najaꞌa etu ratukina, iꞌa kana masilaka. Pade ane iꞌa tunggai mowia silaka etu, kaopuna iꞌa kana mamate pade rapopogaꞌa nggari jaꞌi Alatala sampe ri kasae-saena.
16 Sampesuwu-sampesuwu to nipotoweku, neꞌe komi masala paha! Alatala daꞌa mompesoba kita mowia kajaꞌana.
17 Pura-pura to niwaina ka kita nabelo ntoto, daꞌa ria to najaꞌana. Pura-pura nuapa to nabelona narata nggari jaꞌi Alatala ri suruga to nompajadi pura-pura reme ri langi. Iꞌa daꞌa nasimbayu ewa wayo to nagampa nabali. Iꞌa bate-batena nabelo.
18 Nggari dotana mboto Iꞌa nompajadi kita ana-anana ante nompatolele ka kita tesana to nakono. Etu nipowiana ala kita majadi to neliu nibila nggari pura-pura nuapa to nipajadina.
Mangepe bo mantuki Tesa nu Alatala
19 Sampesuwu-sampesuwu to nipotoweku, pariara ntaꞌimo mpakabelo-belo tesaku eꞌi. Kita kana masadia mangepe, tapi neꞌe kaliu-liu motesa, bo neꞌe masalisa marau,
20 sabana isema-sema to narau daꞌa mamala mompowia to nabelona to nompakadamba rara Alatala.
21 Sabana etu kabasaka puramo kabiasa inggu to natantoru bo najaꞌa. Pariaramo ante kaede rara tesa to niboli Alatala riara ntaꞌimu, sabana tesa etu nakuasa mompakasalama komi.
22 Jadi tukimo Tesa nu Alatala, neꞌe aga mangepe bayangi, sabana ane aga mangepe bayangi komi mombabagiu koro komi mboto.
23 Tau to nangepe Tesa nu Alatala tapi daꞌa nitukina, iꞌamo nasimbayu ewa tau to nanggita lenjena ri pompewayo,
24 nalaipa iꞌa nikalinganamo lenjena etu.
25 Tapi tau to nompariara ntaꞌi Tesa nu Alatala pade naroo nantuki tesa etu, daꞌa aga mangepe bayangi bo manggalinga, tau etumo kana rawai Alatala ka rasi riara bara nuapa-nuapa rapowiana. Tesa nu Alatala etu nabelo ntoto bo naria kuasana nombakabasaka manusia.
26 Ane maria sambaꞌa tau to nompekiri iꞌa tau naroso poagamana tapi iꞌa daꞌa nombajagai jilana, iꞌa nombabagiu korona mboto. Agamana etu daꞌa ria gunana.
27 Tau to nakono poagamana to daꞌa ria salana riara mpanggita Umata Alatala, etumo tau to nantulungi ngana-ngana pailu bo tobalu-tobalu to nasusa, bo to nombajagai korona mboto ala neꞌe rapakatantoru powia to najaꞌana ri dunia eꞌi.