Pepatuduki ka topanggeniaka topomparasaya bo ka todea biasa
5
Umba komi to najadi topanggeniaka todea topomparasaya! Aku woꞌu sambaꞌa topanggeniaka topomparasaya, bo aku mboto nanggita kasusa bo kapari to nirasai Kristus bopia. Pade ane Kristus marata bali ante kuasa bo kagayana to nipogumaa aku woꞌu mombarata bagia riara pura-pura etu. Jadi aku merapi ante mpuꞌu-mpuꞌu ka komi
2 ala komi manggeniaka todea nu Alatala to niparasaya ka komi nasimbayu ewa sambaꞌa topoewu nombaewu bimba-bimbana. Keniakamo ira ante nasana rara nantuki dota nu Alatala, neꞌe ewa tau to nipasuꞌu. Pade neꞌe aga mangelo untu ka koro komi mboto, tapi tuimo bago etu sabana komi mpuꞌu-mpuꞌu madota mantulungi todea topomparasaya.
3 Pade neꞌe dota-dota mompatundu topomparasaya to niparasaya ka komi, tapi nabelopa komi majadi jonjo to masipato rapasiala ira.
4 Pade tempo Kristus, Topoewu to Nabete marata bali ri dunia, Iꞌa kana mombawai ka komi hadia, etumo bagia riara kuasa bo kagayana to nipogumaa sampe ri kasae-saena.
5 Iwetu woꞌu komi to danamuda. Komi kana mekou ri jaꞌi totuꞌa. Pade komi topomparasaya pura-pura kana mompakaede rara bo mositulungi sambaꞌa bo sambaꞌa. Sabana naria nitulisi iweꞌi:
“Alatala nangewa tau to nalanga rarana,
tapi Iꞌa nompotowe tau to naede rarana.” (Ams. 3:34)
6 Jadi sampesuwu-sampesuwu, pakaedemo raramu, bo pekoumo ri jaꞌi Alatala to nakuasa ala Iꞌa mompakalanga komi ane maratamo tempona.
7 Waimo pura-pura kakini raramu ka Iꞌa sabana Iꞌa batena nompariara komi.
8 Komi kana mainga bo manoto rara, sabana balimu, Magau nu Seta nalau gusaꞌa guseꞌi ewa singa to nongao-ngao mangelo sokona.
9 Tapi ewamo iꞌa ante pomparasaya to naroso, sabana ninjani komi mboto topomparasaya ri umba-umba ri dunia nipandasa nasimbayu ewa komi woꞌu.
10 Pade ane maopu komi mombarasai kasusa sampalai, Alatala mbotomo, Puꞌu nu towe belo, kana mompakagana nuapa to nakura ri jaꞌimu. Iꞌa kana mompakaroo raramu, mompakaroso komi pade mombasaro komi. Sabana Iꞌamo to nompokio komi mombarata bagia riara kuasa bo kagayana sampe ri kasae-saena sabana komi nosaongu rara ante Kristus.
11 Iꞌamo to nakuasa sampe ri kasae-saena. Amin!
Petabe kaopuna
12 Aku nantulisi suraku to nambukuna eꞌi ante petulungi i Silas, sampesuwuta riara i Pue to nirekeku sambaꞌa topomparasaya to namala raparasaya. Patujuku nantulisi sura eꞌi ala mompakaroso rara komi bo mompakanoto ka komi nuapa to nitulisiku eꞌi mpuꞌu-mpuꞌu tesa ewa towe belo nu Alatala to nakonona. Sokomo mpakaroso tesa etu ante mpuꞌu-mpuꞌu raramu.
13 Tabe nggari jaꞌi sampesuwu komi topomparasaya to naria ri seꞌi ri ngata Babilon to nipelisi Alatala nasimbayu ewa komi. Pade tabe woꞌu nggari jaꞌi anaku i Markus.
14 Posipabotemo tabe sambaꞌa bo sambaꞌa ante towe.
Perapi Pue Alatala mombawai katuwua mabelo ka komi pura-pura to nosaongu rara ante Kristus.
Tabe nggari jaꞌiku,
Petrus