Pokainggu to masipato ka totuꞌa, tau namuda bo batua
2
Tapi Titus, komi kana mompatuduki ka tau nuapa to masipato ante pepatuduki to nakonona.
2 Patudukimo ka totuꞌa-totuꞌa langgai ira kana mantaꞌamaka dota rara ira mboto. Ira kana matuwu ante inggu to masipato rabila bo ira kana manoto. Ira kana mantuki pepatuduki to nakonona, ira kana mpuꞌu-mpuꞌu mompotowe tau ntanina, pade ira kana maroo momparasaya naupa nipandasa.
3 Waꞌa woꞌu ante totuꞌa-totuꞌa besi. Uli ka ira, ira kana matuwu ante inggu to nagasa to masipato riara mpanggita Alatala. Neꞌe ira mompakajaꞌa tau ntanina, neꞌe ira manggapilaya manginu anu mepakalangu. Tapi ira kana mataꞌu mompaguru to nabelona,
4 ala ante iwetu ira mamala mompatuduki besi-besi to namudana mompotowe rongo bo ana ira mboto.
5 Ira kana majadi tau nanoto rarana to natuwu ante daꞌa mogau sala nuapa-nuapa. Ira kana maraji mompakasiayu awuna. Ira kana majadi tau to nabelo rarana to natundu ri jaꞌi rongona mboto. Ane ira moinggu iwetu, daꞌa ria tau mamala manjalaraka Tesa nu Alatala.
6 Iwetu woꞌu to rapatuduki komi ka langgai-langgai to namudana. Uli ka ira, ira kana mantaꞌamaka mpengele-ngele dota rara ira to najaꞌana.
7 Pade komi mboto kana tunggai mompowia to nabelona ala pokainggumu etu majadi jonjo to mamala rapasiala ntau. Ane komi mompatuduki tau, patudukimo ante manoa bo mpuꞌu-mpuꞌu raramu.
8 Pakemo tesa to nakonona to daꞌa mamala rasalaraka ntau, ala balimu maeya mboto mata ira sabana pura-pura nuapa to niulimu etu nabelo. Daꞌa ria sangele to najaꞌana to namala rasalaraka ira ka kita.
9 Patudukimo batua-batua ala ira bate-batena matundu ri jaꞌi madika ira. Ira kana mokarajaa mompakadamba rara madika ira etu. Neꞌe ira mesapuaka,
10 bo neꞌe ira mompelea mbara-mbara nu madika ira. Kana manoa rara ira ala mompakanoto ira mpuꞌu-mpuꞌu namala raparasaya. Ira kana moinggu iwetu ala mpengele-ngele powia ira mompopokita ka tau kabelo nu pepatuduki ewa Pue Alatala, Magau to Mompakasalama kita.
Tau to nipakasalama masipato matuwu ante pokainggu to nabelo
11 Kita masipato matuwu ante pokainggu to nabelona iwetu, sabana nggari towe belona mboto Alatala narata ri dunia eꞌi ala mompakasalama pura-pura manusia.
12 Nggari towe belona Iꞌa nompatuduki kita ala mompalasi pokainggu to daꞌa nipokonona bo dota rara to najaꞌana. Pade nipatudukina ala kita matuwu ri dunia eꞌi ante inggu to manoto, pade mompowia to nanoana bo to nantuki dota Alatala.
13 Kita kana matuwu iwetu ri dunia eꞌi ante manjarumaka saongu kajadia to mpuꞌu-mpuꞌu mompakasana rarata, etumo karata Yesus Kristus ante kuasa bo karemena to nipogumaa. Iꞌamo Alatalata bo Magau to Mompakasalama kita.
14 Iꞌa nombawai korona rapatesi ala manggabasaka kita nggari pura-pura kajaꞌana, pade mompegasa katuwuta sampe kita majadi todeana mboto to maraji mompowia to nabelona.
15 Jadi Titus, patudukimo pura-pura etu ka topomparasaya i Pue Yesus. Popatora etu ka ira bo ontiakamo ira to daꞌa nantuki pepatuduki etu. Kawiamo etu ante kuasa to niwai Alatala ka komi. Neꞌe rapalamba tau mombasapuaka komi.