SURA PAULUS KA
TITUS
Petabe
1
Sura eꞌi nggari jaꞌiku i Paulus, batua Alatala bo suro Yesus Kristus, ka anaku i Titus. Aku nipelisi bo nisuro Alatala mantulungi tau-tau to nipelisina ala ira maroo momparasaya Iꞌa. Pade aku woꞌu nisurona manggeni ira momparasaya pepatuduki to nakonona to nanggeni ira matuwu ante inggu to masipato ka topomparasaya Alatala.
2 Isi pepatuduki etu to napokona, ira mamala manjarumaka matuwu mabelo sampe ri kasae-saena. Etu to nijanji Alatala ri lamba pamulana tempo dunia eꞌi daꞌapa nipajadina. Pade ninjanitamo Alatala daꞌa nodawa. Pojanjina namala raparasayata.
3 Weꞌi-weꞌi ri tempo to nipakatantuna mboto Iꞌa nompopanjani pojanjina etu ka manusia riara tesa to niuli Kareba Belo. Pade kareba etu niparasaya ka aku ala rakeni ka pura-pura tau nantuki parenta Alatala, Magau to Mompakasalama kita.
4 Titus, komi mpuꞌu-mpuꞌu ewa anaku mboto sabana komi woꞌu nomparasaya i Pue Yesus nasimbayu ewa aku. Perapi Pue Alatala bo Pue Yesus Kristus, Magau to Mompakasalama kita, mombagane bo mombawai katuwua mabelo ka komi.
Pokarajaa to nipakau Paulus ka Titus ri Lewuto Kreta
5 Patujuku nompalasi komi ri Lewuto Kreta ala komi mompakasiayu anu daꞌapa nasiayu ri setu, pade ala komi mangonggotaka topanggeniaka-topanggeniaka topomparasaya ri pura-pura ngata. Toramo atura-atura to nipakatantuku ka komi iweꞌi:
6 Tau to masipato raonggotaka majadi topanggeniaka topomparasaya aga tau daꞌa naria inggu to nasalana, to natutu rarana nompiara rongona sambaꞌa lau. Ana-anana kana momparasaya i Pue Yesus bo neꞌe aga mompebasa matuwu masana ri dunia, bo neꞌe mawatu.
7 Topanggeniaka topomparasaya etu kana matuwu ante daꞌa ria ingguna to nasalana, sabana iꞌa wakele Alatala mboto. Iꞌa daꞌa mamala masombo atau masalisa marau, pade daꞌa topanginu anu mepakalangu, pade daꞌa toposibaga bo daꞌa tau nadoko nu doi.
8 Iꞌa sambaꞌa tau to najoi rarana mantarima torata riara njapona, bo tau nompokono to nabelona. Iꞌa kana sambaꞌa tau to nanoto, to nanoa bo nagasa rarana, bo tau to namala mantaꞌamaka dota rarana.
9 Iꞌa kana maroo mantuki pepatuduki to nakonona to nipatuduki ka iꞌa ala iꞌa mamala mompatuduki topomparasaya mantuki pepatuduki etu, pade ala iꞌa woꞌu mamala mompakanoto sala ntau to nombasapuaka pepatuduki etu.
Titus kana mangewa topanggeni pepatuduki to nasala
10 Sampe niuliku iwetu sabana nadeamo tau to nangewa pepatuduki to nakonona. Ira nombabagiu tau ante nompatuduki anu daꞌa ria gunana. To nadeana ira tau to Yahudi to nesua agama Karistee.
11 Ira kana ratagi, sabana nadea ongu njou nipakagado ante pepatuduki ira to daꞌa nasipatona. Patuju ira aga mangala doi ntau ante akala to nadenggo-denggona.
12 Naria sambaꞌa nabi nggari ira to Kreta mboto to nanguli iweꞌi: “To Kreta bate-batena topodawa. Ira nasimbayu kajaꞌana ewa binata to nasoana. Ira tau nadoko to nabuto rarana.”
13 Tesa nabi etu nakono. Sabana etu komi kana makoꞌo mangontiaka ira to nompatuduki to nasala etu ala ira majea bo mantuki pepatuduki to nakonona.
14 Neꞌe mana ira momparasaya kabali-kabali nto Yahudi bo atura-atura to nipakatantu manusia to nombasapuaka pepatuduki to nakonona.
15 Ka tau to nagasamo pura-pura nuapa nagasa. Tapi ka tau to natantorumo bo daꞌa nomparasaya Alatala, daꞌa ria sangele to nagasa, sabana pekiri bo rara ntaꞌi ira natantoru mami.
16 Ira nanguli ira nosinjani ante Alatala, tapi powia ira nanjapuaka Iꞌa. Ira nompowia to nompakarunggu rara Alatala, bo ira daꞌa madota matundu ri jaꞌina. Daꞌa namala ira nompowia to nabelona.