Pokainggu to masipato ka topomparasaya
3
Komi kana mompopatora ka topomparasaya ri setu ira masipato mekou ri jaꞌi pomarenta bo ri jaꞌi ntau to nipakakuasa riara ngata. Ira kana matundu bo masadia mantui pura-pura pokarajaa to nabelona.
2 Neꞌe ira manguli sinjaꞌi tau-tau ntanina. Neꞌe ira mosinggarau ante isema-sema. Tapi ira kana mabelo bo malusu rara ri jaꞌi ntau pura-pura.
3 Toramo, kita woꞌu bopia danadoyo ewa etu. Kita daꞌa natundu pade kita nantuki jala to nasalana. Kita woꞌu bopia nipobatua mpengele-ngele dota rara to najaꞌana bo aga nompekiri kasana nu korota mboto. Kita woꞌu najaꞌa bo nasiriati, pade kita nosiporau rara sambaꞌa bo sambaꞌa.
4 Tapi naupa kita tunggai nompowia pokainggu to najaꞌa ewa etu bopia, Alatala, Magau to Mompakasalama kita, nompopokita kabelona bo towena ka kita.
5 Iꞌa nompakasalama kita, daꞌa sabana kita nompowia to nanoana, tapi sabana Iꞌa mboto naasi matana nanggita kita. Iꞌa nompakasalama kita ante nompegasa kita nggari silakata pade nombawai ka kita katuwua nabou. Iꞌa nombabali katuwuta najadi nabelo ante kuasa Nosana to Nagasa
6 to nipopanaꞌuna ka kita ante kajoi nu rarana niposabana Yesus Kristus, Magau to Mompakasalama kita.
7 Etu nipowia Alatala ala nggari towe belona kita rarekena tau nanoa, pade ala kita majadi tau to namala manjarumaka matuwu mabelo sampe ri kasae-saena.
8 Tesa-tesaku eꞌi mpuꞌu-mpuꞌu nakono. Jadi to nipodotaku ala komi momparoꞌo tesa eꞌi ala topomparasaya Alatala tunggai mompasimbuku mowia to nabelo bo noguna ka pura-pura tau.
9 Tapi pakakawaomo komi nggari pompekutana to daꞌa ria gunana, pade nggari tesa-tesa tuntu ntotuꞌa nggaolu to nipetowali manusia. Pakakawao woꞌu nggari posisono bo posinggarau ntau mantesa Atura-atura agama to nipapola i Musa, sabana etu pura-pura daꞌa ntoto ria gunana bo untuna.
10 Komi kana mangontiaka tau to nompakagado todea topomparasaya. Ane iꞌa daꞌa menonto mowia etu, ontiakamo iꞌa sangganipa. Ane naganamo ronggani iꞌa niontiaka tapi iꞌa daꞌa woꞌu nenonto, neꞌe mana mowega ante iꞌa,
11 sabana ninjanimu tau to noinggu ewa etu nasalanjalamo. Iꞌa tunggai nowia silaka pade silaka-silakana mboto nompakasala iꞌa.
Tewai-tewai bo petabe kaopuna
12 Ane aku mompakau Artemas atau i Tikhikus mpaka ri jaꞌimu, komi kana mompasimbuku masalisa momai ri jaꞌiku ri ngata Nikopolis, sabana nipakatantukumo metoꞌo ri setu sampe maopu tempo leni.
13 Komi kana mpuꞌu-mpuꞌu mompasimbuku mantulungi i Zenas, topotangara, bo Apolos riara mpolumako ira ala daꞌa ria makura nuapa-nuapa ka ira.
14 Roa-roata topomparasaya i Pue Yesus woꞌu kana meguru mompowia to nabelona ala mompakagana to niparaluu roa-roa ira to nakabuna. Neꞌe sampe katuwu ira daꞌa ria gunana.
15 Nadea tabe nggari jaꞌi pura-pura sampesuwuta to naria ante aku ri seꞌi. Pakasampe tabe kami ka roa-roa saongu pomparasaya ri setu to nompotowe kami.
Perapi Pue mombagane komi pura-pura.
Tabe nggari jaꞌiku,
Paulus