Namosu kaopu nu dunia manusia mantambai kajaꞌana
3
Timotius, kana munjani ane mamosumo kaopu nu dunia kana marata tempo to makajana.
2 Manusia aga mompotowe korona mboto. Ira madoko nu doi, ira masombo bo mangoa pade manguli sinjaꞌi tau ntanina. Ira daꞌa matundu ri jaꞌi ntotuꞌa ira mboto bo daꞌa ranjani ira motarima kasi. Ira kana mpuꞌu-mpuꞌu majaꞌa,
3 bo ira mpuꞌu-mpuꞌu daꞌa maria towe. Ira daꞌa madota mosinggabelo bo ira bate-batena mompakawau sanga tau ntanina. Ira daꞌa mamala mantaꞌamaka dota koro ira mboto bo ira aga masoa mpuꞌu. Ira momporau rara pura-pura nuapa to nabelona.
4 Ira mompakanawu roa ira mboto bo ira daꞌa ria rekena, pade ira mompekiri iramo to neliu pangginjanina. Ira melabipa mompotowe kasana koro ira mboto pade mompotowe Alatala.
5 Riara mpanggita eo-eo ira momparasaya Alatala, tapi riara ntaꞌina ira mombasapuaka kuasana.
Pakakawaomo koromu nggari jaꞌi ntau noinggu iwetu,
6 sabana ri tatongo ira naria to nataꞌu akala ira mesua raranjapo ntau ala mombabagiu besi-besi to nadoyo to nadea silakana bo to nikuasai nadea ngele dota rara to najaꞌana.
7 Besi-besi etu batena meguru tapi ira daꞌa sanggani mamala mangginjani pepatuduki to nakonona.
8 Topebagiu etu mpuꞌu-mpuꞌu mangewa pepatuduki to nakonona nasimbayu ewa Yanes bo Yambres nangewa nabi i Musa ri ngayo Magau Firaun nggaolu. a Pekiri ira majaꞌa bo pomparasaya ira daꞌa ntoto makono.
9 Tapi ira daꞌa mamala mompapola powia ira etu, sabana bagiu ira etu kana manoto ka pura-pura tau nasimbayu ewa bagiu Yanes bo Yambres nggaolu najadi nanoto.
Ante mantuki isi Buku Nagasa kita mompakule mompowia to nabelona
10 Tapi ninjanimu mboto aku daꞌa nasimbayu ewa topebagiu etu. Ninjanimu pepatudukiku, pokaingguku bo patujuku matuwu. Ninjanimu mboto pomparasayaku ka Alatala, posabaraku ri jaꞌi ntau pura-pura bo pepotoweku ka sanggamanusiaku.
11 Ninjanimu iwenu aku naroo tempo nipandasa bo nipakasusa ewa to najadi ri ngata Antiokhia, ngata Ikonium bo ngata Listra bopia. Aku mpuꞌu-mpuꞌu nipandasa, tapi i Pue bate-batena nompakasalama aku nggari kasusa etu pura-pura.
12 Kakonona, pura-pura tau to madota matuwu mantuki dota Alatala bo mosaongu rara ante Yesus Kristus kana rapandasa ntau.
13 Aga tau najaꞌa bo topebagiu kana mantambai kajaꞌana. Ira mombabagiu tau bo ira woꞌu rabagiu.
14 Tapi naupa iwetu, komi kana maroo manjoko pepatuduki to nipegurumu bo to mpuꞌu-mpuꞌu niparasayamu, sabana ninjanimu pokainggu tau-tau to nompaguru etu ka komi.
15 Pade ninjanimu woꞌu nggari kakedimu komi nangginjani isi Buku Nagasa to namala mompakanoto ka komi ante momparasaya Yesus Kristus komi namala rapakasalama.
16 Pura-pura tesa to naria riara Buku Nagasa nitulisi ante kuasa nggari jaꞌi Alatala mboto bo noguna mompatuduki to nakonona, mompakanoto sala, mompakabelo pokainggu bo mompatuduki tau mompowia to nanoana.
17 Ante mangginjani isi Buku Nagasa butu mbaꞌa topomparasaya Alatala rapakagana ala iꞌa mompakule mompowia pura-pura powia to nabelona.