SURA PAULUS PAMULANA KA
TIMOTIUS
Tesa nompakanoto isi sura
Timotius sambaꞌa topomparasaya i Pue Yesus nggari ngata Listra ri Propinsi Galatia. Indona tau to Yahudi pade umana tau to Yunani. Tempo iꞌa danamuda iꞌa najadi roa sampokarajaa ante i Paulus nanggeni Kareba Belo. Riara mpolumakona nanggeni Kareba Belo, i Paulus nompakau i Timotius maroo metoꞌo ri ngata Efesus ala manggeniaka todea topomparasaya ri setu.
Tempo etu naria pepatuduki to nasalana neumba ri tatongo todea topomparasaya ri ngata Efesus. To nanggeni pepatuduki to nasala etu nompatuduki daꞌa nagana momparasaya Kareba Belo to nipatolele suro-suro i Pue Yesus. Kana maria pangginjani ntanina ala rapakasalama (6:20-21). Ira nomparibaꞌa kabali-kabali to nipetowali manusia mboto bo tuntu-tuntu ntotuꞌa nggaolu (1:4). Ira nompatuduki daꞌa nabelo ane tau morongo, pade bara sakuya ngele panggoni nipopali ira (4:3). Pade pokainggu ira ri tatongo todea topomparasaya daꞌa nabelo. Nggari pepatuduki ira to nasala etu todea topomparasaya ri ngata Efesus nompamula nagado.
Jadi i Paulus nantulisi sura eꞌi ka i Timotius ante tolungele patuju to napokona: 1) mompakaroso rara i Timotius mantui bagona ewa topanggeniaka todea topomparasaya ri Efesus, 2) mompatuduki ka i Timotius akala mangewa pepatuduki to nasala etu, pade 3) mombawai pepatuduki ewa pokainggu-pokainggu to masipato ka topomparasaya tempo ira nasiromu nodade.
Isi sura to napokona iweꞌi:
1. Petabe (1:1-2)
2. Popatora ala mangewa guru-guru topodawa (1:3-11)
3. Posukuru i Paulus sabana naria towe belo nu Alatala riara nggatuwuna (1:12-17)
4. Patuju nu tewai-tewai i Paulus (1:18-20)
5. Pepatuduki ewa todea topomparasaya bo topanggeniaka ira (2:1-3:16)
6. Pepatuduki ewa akala mangewa pepatuduki to nasala (4:1-16)
7. Pepatuduki ewa akala manggeniaka todea topomparasaya (5:1-6:2a)
8. Pepatuduki kaopuna bo petabe (6:2b-21)