Paulus nerapi ala to Tesalonika mosambaya ka iꞌa
3
Kapolana sampesuwu-sampesuwu, posambayamo ka kami to nompatolele Tesa nu Alatala, ala Tesa etu masasinta matolele pade ratarima bo rabila ntau ante nabelo nasimbayu ewa etu nitarima bo nibila komi bopia.
2 Posambaya woꞌu ka kami ala kami mamala rakabasaka nggari jaꞌi tau-tau to nadenggo bo najaꞌa rarana, sabana daꞌa pura-pura tau nomparasaya Tesa nu Alatala.
3 Tapi daꞌa ria kaopuna petulungi i Pue. Iꞌa bate-batena mompakaroso rara komi bo mombajagai komi nggari kuasa Magau nu Seta.
4 Pue to nanggeniaka komi. Jadi etumo sabana natantumo ka kami nuapa to nitewai kami ka komi, etu nituki komi weꞌi-weꞌi, pade etu bate-batena ratuki komi.
5 Perapi Pue mompoewu komi sampe komi mpuꞌu-mpuꞌu mangginjani towe Alatala ka komi pade komi maroo rara nasimbayu ewa karoo rara Kristus mboto.
Neꞌe masondo rara mokarajaa
6 Sampesuwu-sampesuwu, ante kuasa to niwai Pue Yesus Kristus ka kami, kami momparenta komi, neꞌe ntoto mowega ante topomparasaya to nasondo rarana mokarajaa pade daꞌa nantuki pepatuduki to nipatuduki kami ka komi.
7 Ninjani komi mbotomo pokainggu kami bopia kana masipato rapasiala komi. Kami daꞌa nasondo rara nokarajaa tempo kami naria ri tatongo komi.
8 Kami daꞌa woꞌu nanggoni panggoni ntau anu daꞌa nibayari kami. Tapi eo wengi kami nokarajaa ntomo ala neꞌe mompakatomo komi mompekiri katuwu kami.
9 Kakonona masipato kami merapi tulungi ka komi. Tapi kami daꞌa madota, sabana kami madota mompopokita ka komi saongu jonjo to namala rapasiala komi.
10 Daꞌa aga iwetu. Tempo kami danaria ri tatongo komi bopia, kami nomparenta komi iweꞌi: “Isema-sema daꞌa madota mokarajaa, neꞌe rapakoni iꞌa.”
11 Sampesuwu-sampesuwu, kami nantulisi tesa eꞌi ka komi sabana niepe kami naria tau-tau ri setu to nasondo rarana. Ira daꞌa nasiwu nokarajaa, ira aga nasiwu-siwu mombabago roa-roa ira.
12 Jadi ante kuasa to niwai Pue Yesus Kristus ka kami, kami momparenta bo mompopatora tau-tau etu, “Pokarajaamo komi ante malino mopaelo katuwua komi mboto.”
13 Tapi sampesuwu-sampesuwu pura-pura, kami manguli ka komi, “Neꞌe mabasa mowia to nabelona.”
14 Ane maria tau daꞌa madota mantuki tesa to nitulisi kami riara sura eꞌi, pariara ntaꞌimo iꞌa. Neꞌe mowega ante iꞌa ala kaopuna maeya mboto matana.
15 Aga neꞌe rareke iꞌa bali komi, tapi patudukimo iꞌa ewa sambaꞌa sampesuwumu.
Tesa kaopuna
16 Perapi Pue mboto bate-batena mombawai ka komi katuwua mabelo riara mpengele-ngele, sabana Iꞌamo puꞌu katuwua mabelo etu. Perapi Pue mosanggani-nggani ante komi pura-pura.
17 Tabe nggari jaꞌiku i Paulus. Kaopuna sura eꞌi nitulisiku ante paleku mboto. Etumo tandaina to nitulisiku riara pura-pura suraku ala ranjani komi sura eꞌi nggari jaꞌiku mboto. Etumo akalaku mantulisi sura.
18 Perapi Pueta Yesus Kristus mombagane komi pura-pura.
Tabe nggari jaꞌiku,
Paulus