SURA PAULUS PAMULANA KA TOPOMPARASAYA RI NGATA
TESALONIKA
Tesa nompakanoto isi sura
Ngata Tesalonika saongu ngata bete ri Propinsi Makedonia. Sabagia bete pue ngata tau daꞌa to Yahudi to nombasomba pue-pue ntanina. Paulus, i Silas bo i Timotius nanggeni Kareba Belo ka pue ngata Tesalonika pade naria to nomparasaya i Pue Yesus (Suro-suro 17:1-9). Tapi tau to Yahudi to daꞌa nomparasaya i Pue Yesus nompakapane rara to Tesalonika ntanina sampe ira nompandasa tau-tau to lako nomparasaya. Jadi i Paulus bo i Silas nipakau topomparasaya malau mpaka ri ngata ntanina (Suro-suro 17:10).
Sangga nalaipa i Paulus nggari ngata Tesalonika, nalentora mpuꞌu rarana manggita topomparasaya ri setu. Nakini mpuꞌu rarana neꞌe-neꞌe ira mokanggaura momparasaya sabana nipandasa ntau. Jadi nipakauna i Timotius malau mpaka ri ngata Tesalonika ala manggita topomparasaya ri setu (1Tes. 3:1-2). Tempo i Timotius nanjili bali ri jaꞌi Paulus, iꞌa notesa ka i Paulus to Tesalonika naroo nomparasaya i Pue Yesus nau nipandasa, pade ira bate-batena nosipotowe sambaꞌa bo sambaꞌa.
Timotius woꞌu nompakanoto naria bali i Paulus to nanjalai iꞌa ri ngayo to Tesalonika bo nanguli iꞌa tau nadenggo rarana (1Tes. 2:1-20). Pade naria topomparasaya ri Tesalonika to naingu sabana daꞌa ninjani ira nuapa majadi ante roa ira to namatemo tempo i Pue Yesus marata bali ri dunia. Pade i Timotius woꞌu notesa ka i Paulus bara sakuya pokainggu topomparasaya anu paraluu rapakabelo. Jadi nangepe tesa etu i Paulus nantulisi sura eꞌi ala mantulungi ira maroo momparasaya pade matuwu ante pokainggu to masipato ka topomparasaya i Pue Yesus.
Isi sura to napokona iweꞌi:
1. Petabe (1:1)
2. Posukuru i Paulus sabana katuwu to Tesalonika (1:2-10)
3. Popatora i Paulus ka to Tesalonika ewa bagona bo pokaingguna ri jaꞌi ira bopia (2:1-16)
4. Kalentora rara i Paulus manggita to Tesalonika (2:17-3:13)
5. Pepatuduki i Paulus ewa pokainggu to mompakadamba rara Alatala (4:1-12)
6. Pepatuduki ewa karata i Pue Yesus bali ri dunia (4:13-5:11)
7. Tesa kaopuna bo petabe (5:12-28)