SURA PAULUS PAMULANA KA TOPOMPARASAYA RI NGATA
TESALONIKA
Petabe
1
Sura eꞌi nggari jaꞌi kami tolumbaꞌa, etumo, i Paulus, i Silas bo i Timotius, ka topomparasaya i Pue Yesus ri ngata Tesalonika to nosaongu rara ante Umata Pue Alatala bo Pue Yesus Kristus. Perapi Pue Alatala mombagane bo mombawai katuwua mabelo ka komi.
Paulus nanguli tarima kasi ka Alatala
2 Kami daꞌa nenonto nanguli tarima kasi ka Pue Alatala sabana katuwu komi pura-pura, pade kami tunggai nanggeni komi pura-pura riara posambaya.
3 Tempo kami nosambaya ka Umata Pue Alatala kami batena nantora powia komi to nompopokita pomparasaya komi. Kami nantora iwenu komi nantulungi tau ntanina ante towe, pade nitora kami woꞌu iwenu komi naroo rara tempo nipandasa ntau sabana komi bate-batena manjarumaka Pueta Yesus Kristus.
4 Sampesuwu-sampesuwu to nipotowe Alatala, ninjani kami komi nipelisi Alatala najadi todeana.
5 Nanotomo etu sabana tempo kami nompatolele Kareba Belo ka komi, etu daꞌa nipatolele kami ante tesa bayangi, tapi ante kuasa bo petulungi nggari jaꞌi Nosa Nagasa nu Alatala. Pade kami mboto nombarasai kuasa Alatala nokarajaa riara ntaꞌi kami tempo kami nompatolele tesa etu ka komi. Ninjani komi mbotomo pokainggu kami tempo kami danaria ri tatongo komi ri setu. Kami noinggu iwetu ala manggeni belo ka komi.
6 Pade komi nompasiala pokainggu kami etu bo pokainggu i Pue woꞌu. Naupa komi nipandasa mpuꞌu komi nantarima Tesa nu Alatala ante nadamba rara. Nosa Nagasa nu Alatala mbotomo to nompakadamba rara komi.
7 Etu sampe katuwu komi najadi jonjo to nipasiala pura-pura topomparasaya i Pue Yesus ri Propinsi Makedonia bo Propinsi Akhaya.
8 Nompamula nggari ngata komi Tesa i Pue natolelemo sampe ri umba-umba ri Makedonia bo Akhaya. Pade daꞌa aga etu. Tesa ewa pomparasaya komi ka Alatala woꞌu natiepe ri umba-umba. Ri umba polumako kami daꞌa paraluu kami motesa ka tau ewa pomparasaya komi, sabana tesa etu naopu ninjani ira.
9 Ira mboto notesa ka kami iwenu komi nantarima kami tempo kami narata ri jaꞌi komi bopia. Pade nitesa ira woꞌu iwenu komi nenonto mepue ka pue-pue ntanina pade nompamula mepue ka Alatala to natuwuna bo to nakonona.
10 Nitesa ira woꞌu iwenu komi nompopea karata Anana nggari suruga, etumo Yesus. Iꞌamo to nipakatuwu Alatala bali nggari kamatena. Pade Iꞌamo to mombakabasaka kita nggari pesuku Alatala to rapawela ka tau nasilaka banepiana.