Paulus nantesa panggawiana ri ngata Tesalonika bopia
2
Sampesuwu-sampesuwu, ninjani komi mbotomo karata kami ri jaꞌi komi daꞌa narata bayangi, tapi nariamo aselena.
2 Ninjani komi daꞌapa kami narata ri ngata komi, kami mpuꞌu-mpuꞌu nipandasa bo nipakajaꞌa ntau ri ngata Filipi. Tapi naupa nadea tau nangewa kami ri setu, Pue Alatalata nompakaroo rara kami ala kami nabia nompatolele ka komi Kareba Belo nggari jaꞌina.
3 Pepatuduki kami etu daꞌa nasala. Daꞌa woꞌu naria patuju kami to najaꞌana, atau patuju mombabagiu tau.
4 Tapi kami nompatuduki ewa tau to nireke Alatala masipato raparasaya ka Kareba Belo etu. Kami daꞌa notesa ala mompakadamba rara manusia, tapi kami notesa ala mompakadamba rara Alatala, sabana Iꞌamo to nomparesa rara ntaꞌi kami.
5 Ninjani komi mbotomo daꞌa ria sanggani kami nompadidi komi, pade daꞌa woꞌu naria akala kami mantabuniaka patuju aga mompakauntu koro kami mboto. Alatala mbotomo mamala mantakono tesa kami eꞌi!
6 Kami daꞌa woꞌu miki ratoiya ntau, nabeloka komi, nabeloka tau-tau ntanina. Kakonona masipato kami rabila bo ratoiya komi sabana kami eꞌi suro-suro Kristus mboto.
7 Tapi daꞌa iwetu patuju kami. Tempo kami naria ri tatongo komi ri setu, kami nalusu rara nasimbayu ewa sambaꞌa indo to nompatomi bo nompotowe anana mboto.
8 Nabete mpuꞌu pepotowe kami ka komi, sampe kami nasadia nompatolele Kareba Belo ka komi. Pade neliu nggari etu, kami woꞌu nasadia mamate mantulungi komi, sabana kami mpuꞌu-mpuꞌu nompotowe komi!
9 Sampesuwu-sampesuwu, tantu danitora komi iwenu kami nokarajaa ntomo ri tatongo komi. Eo wengi kami nokarajaa ala neꞌe mompakatomo komi mompekiri katuwu kami tempo kami nompatolele ka komi Kareba Belo nggari jaꞌi Alatala.
10 Pokainggu kami ri jaꞌi komi to nomparasaya i Pue Yesus nagasa bo nanoa, pade daꞌa ria nuapa-nuapa to masipato rasalai. Komi mbotomo bo Alatala woꞌu namala mantakono pokainggu kami etu.
11-12 Ninjani komi mbotomo kami tunggai nompatuduki komi nasimbayu ewa sambaꞌa uma nompatuduki anana mboto. Kami nompakaroso rara komi pade kami tunggai nompopatora ka komi ala matuwu masipato ewa sambaꞌa topomparasaya Alatala. Iꞌamo to nompokio komi majadi todea riara poparentana, ala komi mombarata bagia riara kareme bo kagayana to nipogumaa.
Paulus nosukuru sabana Kareba Belo nitarima to Tesalonika
13 Naria sangelepa ntanina sampe kami daꞌa nenonto nanguli tarima kasi ka Alatala. Etumo tempo komi nangepe Tesa nu Alatala to nipatolele kami ka komi, tesa etu daꞌa nireke komi aga tesa manusia. Tapi etu nitarima komi ewa tesa nggari jaꞌi Alatala mboto. Pade etu mpuꞌu-mpuꞌu Tesa nu Alatala to nokarajaa riara nggatuwu komi to nomparasaya i Pue Yesus.
14 Sampesuwu-sampesuwu, nuapa to najadi ri jaꞌi komi nasimbayu ewa to najadi ri jaꞌi topomparasaya Yesus Kristus ri Bagia Yudea. Komi woꞌu nipandasa roamu nggari ngata komi mboto nasimbayu ewa ira nipandasa roa ira to Yahudi ri ngata ira mboto.
15 Tau-tau to Yahudi etu woꞌu nompatesi i Pue Yesus bo nabi-nabi nu Alatala pade nompandasa kami woꞌu. Ira daꞌa ntoto nompakadamba rara Alatala, pade ira nobali ka pura-pura tau
16 ante nombalawa kami mompatolele Kareba Belo ka tau daꞌa to Yahudi ala ira mamala rapakasalama. Ante powia ira etu, silaka ira to Yahudi bate-batena natetambai sampe nadea gagamo. Kaopuna ira nawela pesuku nu Alatala.
Paulus nalentora rara manggita to Tesalonika
17 Tapi sampesuwu-sampesuwu, nompamula nggari tempo kita nipopogaꞌa sampalai, nalentora mpuꞌu rara kami manggita komi. Naupa kita nosinggakawao petoꞌo, kami batena nalentora nompekiri komi. Jadi ante mpuꞌu-mpuꞌu rara kami nompasimbuku masalisa momai mantalioda komi.
18 Naria mamimo nia kami momai ri jaꞌi komi. Aku mboto nompasimbuku momai ri jaꞌi komi bara sakuya ngganimo, tapi Magau nu Seta batena nombalawa kami.
19 Nalentora mpuꞌumo rara kami manggita komi, sabana komimo to nompakadamba rara kami. Komimo to niposabana sampe nariamo panjarumaka kami to natantuna mompopea karata i Pue Yesus bali ri dunia. Kami kana madamba-damba ri ngayona banepia sabana nariamo asele pobago kami.
20 Mpuꞌu-mpuꞌu nggari komimo sampe kami kana rabila ri ngayo i Pue Yesus. Nggari komimo sampe nadamba mpuꞌu rara kami.