SURA PAULUS KA TOPOMPARASAYA RI NGATA
KOLOSE
Tesa nompakanoto isi sura
Ngata Kolose saongu ngata ri Propinsi Asia, daꞌa nakawao nggari ngata Efesus. Riara buku Suro-suro i Pue Yesus, pasal 19, naria tesa nompakanoto iwenu i Paulus nokarajaa ri ngata Efesus namosu tolumpae kasaena. Tempo etu naria sambaꞌa topomparasaya to nosanga ka Epafras nalau nompatolele Kareba Belo ka roana ri ngata Kolose sampe naria to Kolose woꞌu to nomparasaya i Pue Yesus.
Naopu bara sakuya mpae i Paulus nisuaraka riara tarunggu sabana nompatolele Kareba Belo. Tempo iꞌa dariara tarunggu niepena lele to nanguli naria guru-guru topodawa to nompatuduki pepatuduki to nasala ri ngata Kolose. Ira nanguli ane sambaꞌa tau madota rapakasalama daꞌa nagana aga momparasaya i Pue Yesus, tapi paraluu woꞌu rasuna nantuki ada agama Yahudi pade paraluu mantuki ada-ada bo atura-atura ntanina.
Sangga i Paulus nangepe kareba nggari ngata Kolose etu, nitulisinamo sura eꞌi ka topomparasaya ri setu. Patuju nu surana eꞌi ala mompakaroso rara bo pomparasaya ira sampe ira neꞌe rabagiu guru-guru topodawa to nompatuduki to nasalana. Niulina riara sura eꞌi ane kita momparasaya i Pue Yesus naganamo, sabana aga Yesus to namala mompakasalama kita. Iꞌamo to nompajadi langi bo dunia, pade kuasana neliu nggabete nggari pura-pura kuasa ntanina ri dunia. Iꞌa woꞌu to nipakau Alatala manggabasaka manusia nggari silaka-silakata ala kita mamala matuwu mosaongu rara ante Alatala. Paulus nompakanoto pepatuduki to nikeni guru-guru topodawa etu nasala, sabana pepatuduki ira etu daꞌa nomparibaꞌa Yesus Kristus pade aga nopuꞌu nggari pekiri manusia. Riara sura eꞌi Paulus woꞌu nompatuduki bo nompakanoto pokainggu to masipato ka tau-tau to nomparasaya i Pue Yesus.
Isi sura to napokona iweꞌi:
1. Petabe (1:1-2)
2. Paulus nanguli tarima kasi ka Alatala sabana pomparasaya bo towe to Kolose, pade iꞌa nosambaya ka ira (1:3-14)
3. Pepatuduki i Paulus ka to Kolose (1:15-3:17)
Yesus neliu nggakuasa, Iꞌamo to nompoposinggabelo kita ante Alatala (1:15-23)
Paulus notarangga ewa pokarajaana nompatolele Kareba Belo bo nantulungi todea topomparasaya (1:24-2:5)
Kita kana matuwu ante pokainggu to masipato ka tau to nipakasalama i Pue Yesus bo neꞌe rabagiu pepatuduki to nasalana (2:6-23)
Kita kana manggabasaka dota rarata to najaꞌa, pade matuwu ante pokainggu to mompakadamba rara Kristus (3:1-17)
4. Pepatuduki ka toporongo, ngana-ngana bo totuꞌa, batua bo madika (3:18-4:1)
5. Pepatuduki ewa posambaya bo inggu-inggu ri jaꞌi tau-tau daꞌa nomparasaya (4:2-6)
6. Petabe bo tesa kaopuna (4:7-18)