4
Jadi sampesuwu-sampesuwu to nipotoweku bo to nipolentoraku, pakaroomo pomparasaya komi ka i Pue. Komimo to najadi tandaina bagoku naria aselena, komimo to nompakadamba raraku.
Tewai-tewai kaopuna
2 Sampesuwuku Euodia bo i Sintikhe, aku mpuꞌu-mpuꞌu merapi ala komi mosaongu rara ewa topomparasaya i Pue.
3 Pade kuperapi ka wega rapaku woꞌu, tulungimo besi rombaꞌa eꞌi ala mosaongu rara bali. Ira nokarajaa ntomo ante aku nompatolele Kareba Belo nosanggani-nggani ante i Klemens bo roa-roaku sampokarajaa ntanina. Sanga ira naria nitulisi riara Buku nu Alatala to nompakatantu isema matuwu mabelo sampe ri kasae-saena.
4 Sampesuwu-sampesuwu pura-pura, neꞌe menonto madamba-damba sabana komi nosaongu rara ante i Pue. Sangganipa kuuli ka komi, neꞌe menonto madamba-damba!
5 Komi kana malusu rara ri jaꞌi ntau pura-pura. Toramo! Mana masaeka i Pue marata.
6 Neꞌe makini-kini rara riara mpengele-ngele, tapi kenimo pura-pura riara mposambaya komi. Perapimo nggari jaꞌi Alatala ante mosukuru,
7 pade belo nu Alatala to neliu nggari pompekiri manusia, kana mompakaroo rara ntaꞌi bo pekiri komi to nosaongu rara ante Yesus Kristus.
8 Kaopuna, sampesuwu-sampesuwu, paraluu komi tunggai mantondoaka nuapa to nakonona, nuapa to masipato rabila bo nuapa to nanoana. Pekirimo nuapa to nagasana, nuapa to nagayana, bo nuapa to nabelo raepe ntau. Tondoakamo pokainggu to neliu nggabelo, bo nuapa to masipato ratoiya.
9 Tukimo nuapa to nipeguru bo nitarima komi nggari jaꞌiku, nabeloka to niepe komi, nabeloka jonjo to nikita komi riara nggatuwuku. Ane etu rapowia komi, Alatala, puꞌu katuwua nabelo, kana mosanggani-nggani ante komi.
Paulus notarima kasi ka to Filipi
10 Ante nadamba mpuꞌu raraku aku nantoiya i Pue sabana weꞌi-weꞌi komi nantulungi aku woꞌumo. Daꞌa patujuku manguli komi daꞌa nantora aku bopia, tapi ninjaniku daꞌapa ria loga komi mompakatu pewai komi ka aku.
11 Aku nanguli etu daꞌa sabana aku nakabu, sabana aku negurumo matuwu masana naupa iwenu-wenu katuwuku.
12 Ninjanikumo natuwu nakabu pade ninjaniku woꞌu natuwu nelabi. Nipegurukumo akala matuwu masana mantingayo mpengele-ngele katuwu, nabeloka tempo nabosu taꞌi, nabeloka tempo naoro taꞌi, nabeloka aku nelabi, nabeloka aku nakabu.
13 Aku nompakule mantingayo mpengele-ngele ante petulungi Kristus to nompakaroso aku.
14 Naupa etu, nabelo mpuꞌumo rara komi nantulungi aku riara kasusaku ri seꞌi.
15 Sampesuwu-sampesuwu to Filipi, ninjani komi mbotomo tempo Kareba Belo pamulana nipatolele ka komi pade aku nompalasi Propinsi Makedonia, daꞌa ria topomparasaya ntanina nasintuwu nantulungi aku mompapola bago etu, aga komi mboto.
16 Daꞌa aga etu, tempo aku danaria ri ngata Tesalonika, daꞌa aga sanggani komi nompakatu pewai ka aku.
17 Etu daꞌa batuana aku aga madota mantarima pewai komi. Tapi to nipodotaku ala nggari powia komi etu maria aselena to mantambai rasi ka komi.
18 Nitarimaku puramo pewai nggari jaꞌi komi, pade etu kakonona neliu nggagana. Pura-pura pewai to nipakatu komi nitarimakumo nggari jaꞌi Epafroditus sampe nagana puramo to niparaluuku. Pewai komi etu nasimbayu ewa pesomba to nawongi to nikonoa bo nipodamba rara Alatala.
19 Alatalaku kana mompakagana ka komi nuapa pura to niparaluu nantuki kasugina to nelabi-labina to naria ante Yesus Kristus.
20 Kana ratoiya bo rabila Umata Pue Alatala sampe ri kasae-saena. Amin!
Petabe kaopuna
21 Pakasampe tabeku ka pura-pura topomparasaya Yesus Kristus ri setu. Pade tarima tabe nggari jaꞌi roa-roa to nosanggani-nggani ante aku ri seꞌi.
22 Tarima woꞌu tabe nggari jaꞌi pura-pura topomparasaya ri seꞌi, neliu-liupa ira nggari sapo Magau Kaisar.
23 Perapi towe belo nggari jaꞌi Pue Yesus Kristus mosanggani-nggani ante komi pura-pura. Amin!
Tabe nggari jaꞌiku,
Paulus