Mosinjani ante Kristus neliu nggabelo nggari mantuki ada-ada agama
3
Sampesuwu-sampesuwu, kapolana, komi kana madamba-damba sabana komi nosaongu rara ante i Pue. Daꞌa nakaja raraku mombasili nuapa to nitulisiku ka komi bopia, sabana pepatuduki etu manggalendu komi nggari pura-pura to najaꞌana.
2 Komi kana mainga ri jaꞌi ntau to nompowia to najaꞌana, to noinggu mpoasu. Komi kana mainga ri jaꞌi ira to nanguli komi kana rasuna ala majadi todea nu Alatala.
3 Kakonona kita, daꞌa ira, todea nu Alatala to nakonona, sabana kita nombasomba Alatala ante pekeniaka Nosa Nagasana mboto, pade kita nadamba-damba sabana nosaongu rara ante Yesus Kristus. Kita daꞌa aga manjarumaka ada-ada to nitukita, ewa ada mposuna, ala rapakasalama.
4 Kakonona aku mamala manjarumaka ada-ada etu. Ane maria tau to nompekiri iꞌa kana ratarima Alatala sabana iꞌa natutu nantuki ada-ada agama, neliu-liupa aku eꞌi.
5 Aku nisuna tempo aku danoumuru walumbengi. Aku nipoanaka sambaꞌa tau to Israel nggari muli Benyamin. Aku mpuꞌu-mpuꞌu tau to Yahudi mami, pade aku mpuꞌu-mpuꞌu natutu nantuki pura-pura Atura agama to nipapola i Musa, sabana aku tau to Parisi.
6 Bopia newoya mpuꞌu raraku nantuki Atura-atura agama sampe aku nompandasa topomparasaya i Pue Yesus. Pura-pura Atura etu nitukiku, daꞌa ria sangele to niliunakaku.
7 Tapi pura-pura etu to nirekeku noguna riara nggatuwuku bopia, weꞌi-weꞌi nirekeku mana ria gunana sabana aku nomparasaya Kristus.
8 Daꞌa aga etu, tapi pura-pura nuapa nirekeku mana ria gunana rapoposisala ante sangele to neliupa kabelona, etumo nosinjani ante Pueku Yesus Kristus. Pura-pura nikabasakakumo bo nirekeku ewa rumpu ala aku mamala mosinjani belo ante Kristus
9 bo mosaongu rara ante Iꞌa. Aku nireke Alatala nanoa daꞌa sabana powiaku mantuki Atura-atura agama, tapi sabana aku nomparasaya Kristus. Kanoana etu nggari Alatala mboto nantuki pomparasaya ka Kristus.
10 To nipodotaku etumo mosinjani belo ante Iꞌa pade mombarasai kuasa to nompakatuwu bali Iꞌa nggari kamatena. Aku madota mombarasai kasusa bo kapari to nirasaina, pade matundu sampe mamate nasimbayu ante Iꞌa
11 ante panjarumaka aku woꞌu mamala rapakatuwu bali nggari tatongo ntau namate.
Pasialamo jonjo Paulus ala mombarata hadia padagi
12 Aku daꞌa nanguli etu pura-pura nadupamo riara nggatuwuku atau aku najadi tau daꞌa ria salana. Tapi aku bate-batena mompasimbuku ala etu kana madupa riara nggatuwuku, sabana etumo patuju Yesus Kristus nompokio aku majadi bagiana.
13 Sampesuwu-sampesuwu, aku daꞌa nompekiri etu pura-pura nadupamo riara nggatuwuku. Tapi naria sangele to kupowia, etumo aku bate-batena manggalinga pura-pura to naria ri talikuku pade aku mompasimbuku ante mpuꞌu-mpuꞌu raraku mombarata nuapa to naria ri ngayoku.
14 Aku nompari-mpari mongowa mpaka ri pantaꞌana ala mombarata hadia padagi nggari jaꞌi Alatala, etumo matuwu mabelo ri suruga ante momparasaya Yesus Kristus, sabana etumo patuju Alatala nompokio kita.
15 Jadi kamaimo kita to naroso pomparasayata mosaongu pombarata ewa etu. Tapi ane maria pombarata komi ntanina, etu woꞌu kana rapakanoto Alatala ka komi.
16 To napokona kita kana maroo mantuki noto to naria ri jaꞌita sampe weꞌi-weꞌi.
17 Sampesuwu-sampesuwu pura-pura, pasialamo pokaingguku pade pariara ntaꞌi woꞌu pokainggu tau ntanina to natuwu nantuki jonjo kami.
18 Sabana nadea ngganimo aku nanguli ka komi bopia, pade weꞌi-weꞌi ante nageo aku nombasili bali ka komi, nadeamo tau to natuwu ante pokainggu to nanjapuaka kamate Kristus.
19 Natantumo ira kana rasuku sampe ri kasae-saena, sabana “Pue” ira aga dota rara ira mboto to najaꞌana. To nipodamba-damba ira aga powia-powia to nepakaeya. Ira aga nompekiri nuapa-nuapa to najaꞌana ri dunia eꞌi.
20 Tapi pokaingguta daꞌa iwetu, sabana kita todea nu suruga. Pade nggari setumo karata Pue Yesus Kristus, Magau to Mompakasalama to nipopeata ante kalentora nu rarata.
21 Iꞌa kana mombabali korota to nalente-lente eꞌi majadi nasimbayu ewa korona mboto to neliu kakuasana ante baraka to nipakena nompatundu pura-pura nuapa ri jaꞌina.