Kita kana mompasiala kaede nu rara Yesus Kristus
2
Jadi sampesuwu-sampesuwu, ninjaniku narosomo pomparasaya komi sabana komi nosaongu rara ante Kristus, pade rara komi nipakawoe ante towena. Nasintuwumo komi ante Nosa Nagasa nu Alatala pade komi woꞌu nosipotowe bo nosipoasi mata sambaꞌa bo sambaꞌa.
2 Sabana etu aku merapi ala komi mompakagana kadamba raraku ante matuwu mosaongu rara sambaꞌa bo sambaꞌa ante mosipotowe bo mosaongu pekiri bo patuju.
3 Neꞌe aga mantora bo mantoiya koro komi mboto, tapi nabelopa komi ante maede rara manguli roa komi neliu nggabelopa nggari komi mboto.
4 Neꞌe komi aga mompekiri katuwu komi mboto, tapi pekiri woꞌumo katuwu roa ntanina.
5 Komi kana moinggu ewa Yesus Kristus iweꞌi:
6 Naupa Iꞌa Alatala,
Iꞌa daꞌa nantaꞌamaka kuasana bo kasimbayu katuwuna ewa Alatala ri suruga.
7 Tapi Iꞌa nanggabasaka pura-pura etu
pade netimbali najadi sambaꞌa batua.
Iꞌa najadi nasimbayu ewa manusia,
8 pade ewa sambaꞌa manusia
Iꞌa nompakaede korona ante matundu ri jaꞌi Alatala sampe namate,
etumo namate nipaku ri kayu parika ewa sambaꞌa tau najaꞌa.
9 Etumo sabana Alatala nangonggotaka Iꞌa ri petoꞌo to neliu nggalanga
pade nombawai ka Iꞌa sanga to neliu nggakuasa nggari pura-pura sanga ntanina.
10 Etu nipowia Alatala ala ane mangepe sanga Yesus
pura-pura to naria ri suruga, ri dunia bo ri tambe nu dunia kana motimbakotu mombasomba Iꞌa, a
11 pade ira pura-pura kana mompangaku Yesus Kristusmo Pue.
Ante iwetu ira mombabila bo mombatoiya Umata Pue Alatala.
Alatala mboto mantulungi kita matuwu mantuki dotana
12 Jadi sampesuwu-sampesuwu to nipotoweku, nasimbayu ewa komi nantuki tesaku bopia tempo aku danosanggani-nggani ante komi, neliu-liupa weꞌi-weꞌi tempo kita nosinggakawao. Kuperapi ka komi pasimbukumo matuwu ante mpuꞌu-mpuꞌu maeka ri jaꞌi Alatala ala patujuna mompakasalama komi madupa riara nggatuwu komi.
13 Sabana Iꞌa mbotomo to nokarajaa riara ntaꞌi komi nombawai ka komi dota rara bo pompakule mompowia patujuna to nabelo etu.
14 Nuapa-nuapa to rapowia komi kana rapowia ante daꞌa mongua atau mosinggarau,
15 ala daꞌa maria sala komi, bo pokainggu komi manoa pura ewa ana-ana nu Alatala to naria ri tatongo manusia to nadenggo bo najaꞌa rarana. Komi ewa poindo to nombawanta ira
16 sabana komi nompatolele ka ira tesa to namala manggeni ira matuwu mabelo sampe ri kasae-saena. Ane komi matuwu iwetu meliu nggadamba raraku tempo Kristus marata bali ri dunia, sabana katuwu komi etu mompakanoto daꞌa nalenge bayangi aku nokarajaa ntomo ri tatongo komi bopia.
17 Pomparasaya komi ka Alatala nasimbayu ewa pesomba ka Iꞌa. Pade kamateku banepia masimbayu ewa ue anggur to nitoli topanggeni agama Yahudi ri pesomba to nikenina rapesomba ka Alatala. Tapi naupa etu majadi aku kana mosukuru bo madamba-damba mpasanggani-nggani ante komi.
18 Iwetu woꞌu komi kana mosukuru bo madamba-damba mpasanggani-nggani ante aku.
Timotius bo Epafroditus
19 Nisarumakaku ante petulungi i Pue Yesus aku mamala masalisa mompakau i Timotius mpaka ri jaꞌi komi, ala ane iꞌa manjili aku madamba mangepe kareba komi.
20 Sabana daꞌa ria roaku ntanina to nosaongu pekiri mompekiri kabelo komi.
21 Pura-pura roaku ntanina aga nasiwu nompekiri bago ira mboto, daꞌa nompekiri bago Yesus Kristus.
22 Tapi ninjani komi mboto pokainggu i Timotius. Iꞌa nokarajaa ntomo nosanggani-nggani ante aku mompatolele Kareba Belo nasimbayu ewa sambaꞌa ngana mantulungi umana.
23 Jadi ane ninjaniku nuapa to majadi ri jaꞌiku ri seꞌi, aku kana masalisa mompakau iꞌa mpaka ri jaꞌi komi.
24 Tapi nisarumakaku ante petulungi i Pue aku mboto woꞌu mamala momai ri jaꞌi komi.
25 Tapi daꞌapa etu majadi, nipekiriku paraluu sampesuwuta Epafroditus, to nisuro komi mantulungi aku, kupakau manjili mpaka ri jaꞌi komi. Iꞌa roaku sampokarajaa to najadi tantara Kristus nosanggani-nggani ante aku.
26 Nalentoramo rarana manggita komi pura-pura, pade nasusa rarana sabana niepe komimo lelena iꞌa najuꞌa.
27 Nakono mpuꞌu iꞌa najuꞌa, sakedika namate. Tapi Alatala naasi matana nanggita iꞌa pade daꞌa aga iꞌa, ante aku woꞌu, ala neꞌe mantambai kasusa raraku.
28 Etu sampe aku nasalisa nompakau iꞌa manjili mpaka ri jaꞌi komi ala ane komi mosirata ante iꞌa, madamba rara komi pade mana masusa gaga pekiriku.
29 Jadi tarimamo iꞌa ante madamba-damba ewa sambaꞌa sampesuwu riara i Pue. Pade bilamo tau-tau ewa iꞌa
30 sabana iꞌa sakedika namate nompapola bago Kristus. Iꞌa daꞌa ntoto nompekiri katuwuna mboto nanjaliku komi mantulungi aku ri seꞌi.