SURA PAULUS KA TOPOMPARASAYA RI NGATA
FILIPI
Petabe
1
Sura eꞌi nggari jaꞌi kami i Paulus bo i Timotius, batua Yesus Kristus, ka pura-pura topomparasaya Yesus Kristus to naria ri ngata Filipi, ante topanggeniaka-topanggeniaka bo topantulungi-topantulungi topomparasaya.
2 Perapi Umata Pue Alatala bo Pue Yesus Kristus mombagane bo mombawai katuwua mabelo ka komi.
Posukuru bo posambaya Paulus
3 Sampesuwu-sampesuwu pura-pura, butu nggani aku nantora komi aku nosukuru ri jaꞌi Pue Alatalaku.
4 Pade butu nggani aku nosambaya ka komi aku batena nosambaya ante nadamba mpuꞌu raraku,
5 sabana komi nasintuwu nantulungi aku nompatolele Kareba Belo nggari jaꞌi Alatala, nompamula nggari eo pamulana sampe weꞌi-weꞌi.
6 Pue Alatala mbotomo to nompamula panggawia to nabelona etu riara ntaꞌi komi. Pade niparasayaku Iꞌa woꞌu kana mompakapola panggawia etu sampe maopu ri tempo Yesus Kristus marata bali ri dunia.
7 Masipato aku mantora komi pura-pura ante nadamba mpuꞌu raraku sabana komi mpuꞌu-mpuꞌu nipotoweku. Pade komi nombarata bagia nggari towe belo to niwai Alatala ka aku, nabeloka tempo aku riara tarunggu, nabeloka tempo aku ri sawalikuna nantakono bo nompakanoto kakono Kareba Belo.
8 Alatala mboto nangginjani iwenu kalentora raraku nantora komi ante towe nggari jaꞌi Yesus Kristus mboto.
9 Iweꞌimo pomperapiku ri jaꞌi Pue Alatala: Aku mosambaya ala komi mantambai mepotowe pade mantambai mangginjani nuapa to nakonona bo mantambai kanoto pekiri komi.
10 Ante iwetu komi mamala mompelisi nuapa to nabelona ala katuwu komi majadi magasa pade daꞌa ria salana sampe Kristus marata bali.
11 Aku woꞌu mosambaya ala komi bate-batena mompowia to nanoana ante petulungi Yesus Kristus sampe nadea mpuꞌu tau mombabila bo mantoiya Alatala.
Posabi Paulus riara tarunggu
12 Sampesuwu-sampesuwu, to nipodotaku ala komi mangginjani nuapa to najadi ri jaꞌiku eꞌi daꞌa najaꞌa. Tapi kakonona etumo to nompakatolele Kareba Belo
13 sampe nanotomo ka pura-pura tantara to nombajagai sapo magau bo ka pura-pura tau ntanina ri seꞌi aku eꞌi nitarunggu sabana aku batua Kristus.
14 Pade sabagia bete nggari topomparasaya ri seꞌi nantambai karoso pomparasaya ira ri jaꞌi Pue, sabana nanggita nuapa to najadi ri jaꞌiku ri tarunggu. Kaopuna nantambai kabia ira nompatolele Tesa nu Alatala ante daꞌa ria eka rara.
15 Naria bara sakuya mbaꞌa nggari tatongo ira to nompatolele Kareba Kristus sabana nasiriati nanggita aku, pade ira aga madota mosinggarau. Tapi naria woꞌu ntanina to nompatolele Kareba Kristus ante patuju to nabelo.
16 Ira etumo nompatolele ante towe sabana ninjani ira aku nionggotaka Alatala ala mantakono Kareba Belo.
17 Tapi ira to nasiriati etu nompatolele Kareba Kristus sabana aga nompekiri koro ira mboto, daꞌa ante rara to nabelo. Nipekiri ira powia ira etu mantambai kasusaku riara tarunggu.
18 Tapi daꞌa mokuya. Sabana nau iwenu, nabeloka etu nipowia ante patuju to nadenggo, nabeloka etu nipowia ante patuju to nanoa, Kareba Kristus kana nipatolele. Etumo nompakadamba raraku. Pade aku batena madamba-damba
19 sabana ninjaniku, ante posambaya komi pade petulungi Nosa Nagasa Yesus Kristus, aku kana rakabasaka nggari tarunggu eꞌi.
20 To nipolentoraku bo nisarumakaku ala neꞌe aku maeya riara mpengele-ngele, tapi ala aku weꞌi-weꞌi batena mabia ewa nokolu sampe nau aku matuwu atau mamate Kristus kana rabila bo ratoiya riara nggatuwuku.
21 Sabana patujuku matuwu etumo mantambai mosinjani belo ante Kristus, pade ane aku mamate etu neliupa kabelona.
22 Tapi ane matuwu ri dunia eꞌi batuana aku mamala manggeni tau momparasaya Yesus Kristus, daꞌa mana ninjaniku umbana to kupelisi, matuwu atau mamate.
23 Aku niposidii rongele pompekiri. Aku mpuꞌu-mpuꞌu madota mompalasi dunia eꞌi malau metoꞌo mosanggani-nggani ante Kristus, sabana etumo to neliu kabelona.
24 Tapi neliu kapokona aku maroo ri dunia eꞌi ala mantulungi komi.
25 Jadi natantumo ka aku, aku damatuwu. Pade ninjaniku aku kana maroo mosanggani-nggani ante komi pura-pura ala komi mantambai maroso bo madamba momparasaya i Pue Yesus.
26 Ante iwetu komi kana mantambai mantoiya bo mombabila Yesus Kristus sabana aku danamalapa mosanggani ante komi.
Matuwu ante pokainggu to masipato ante Kareba Belo
27 Nuapa-nuapa majadi ri jaꞌiku, komi kana matuwu ante pokainggu to masipato ante Kareba Belo Kristus. Komi kana matuwu iwetu ala naupa aku marata manggita komi atau daꞌa, aku kana mangepe kareba to nanguli komi naroo nosaongu rara bo pekiri nantaꞌamaka pomparasaya to nipatuduki riara Kareba Belo.
28 Neꞌe maeka ri jaꞌi balimu, tapi komi kana tunggai mabia. Ante iwetu komi mompakanoto ka balimu etu ira pura-pura to rapakaropu banepia tapi komi to rapakasalama. Etu pura-pura nggari jaꞌi Alatala.
29 Komi masipato moinggu iwetu sabana komi niwai Alatala ka loga daꞌa aga momparasaya Kristus, tapi woꞌu mombarasai kasusa bo kapari sabana komi topomparasaya Iꞌa.
30 Weꞌi-weꞌi komi nombarasai kasusa nasimbayu ewa to nirasaiku to nikita komi mboto bopia pade to niepe komi bate-batena nirasaiku sampe weꞌi-weꞌi.