Filipi i

SURA PAULUS KA TOPOMPARASAYA RI NGATA

FILIPI

Tesa nompakanoto isi sura

Ngata Filipi ngata pamulana ri Eropa to nikalau i Paulus nanggeni Kareba Belo. Ngata etu ri Propinsi Makedonia bo sabagia bete pue ngata Filipi to Roma to nolinja netoꞌo ri setu.

Tempo i Paulus bo i Silas pamulana nanggeni Kareba Belo ka to Filipi ira nipandasa ntau ri Filipi bo nisuaraka riara tarunggu (Suro-suro 16). Tapi danadea to Filipi to nangepe Kareba Belo bo nomparasaya i Pue Yesus.

Sura eꞌi nitulisi i Paulus tempo iꞌa nitarunggu ri ngata Roma (Suro-suro 28). Tempo iꞌa riara tarunggu to Filipi nompakau Epafroditus nanggeni pewai ira ka i Paulus. Pade nggari jaꞌi Epafroditus i Paulus nangepe kareba ewa topomparasaya ri ngata Filipi. Niepena naria tau nompatuduki pepatuduki to nasala to nanguli daꞌa nagana kita momparasaya i Pue Yesus ala masalama, tapi paraluu woꞌu rasuna bo mantuki Atura-atura agama to nipapola i Musa.

Patuju to napokona riara sura eꞌi iweꞌi: 1) Paulus nompakanoto ka to Filipi naupa iꞌa nitarunggu ri Roma daꞌa ria nokuya iꞌa. Kareba Belo batena natolele. 2) Iꞌa nanguli tarima kasi ka to Filipi sabana ira nompakatu pewai ira mantulungi iꞌa. 3) Iꞌa nompopatora ira mainga ka pepatuduki to nasala to nanguli kita kana rasuna bo mantuki Atura-atura agama ala masalama. Paulus nompakanoto pepatudukina to nanguli kita masalama bo majadi manoa riara mpanggita Alatala ante momparasaya i Pue Yesus.

Isi sura to napokona iweꞌi:

1. Petabe bo posukuru i Paulus (1:1-11)

2. Posabi i Paulus riara tarunggu (1:12-26)

3. Pokainggu to masipato ka topomparasaya i Pue Yesus (1:27-2:18)

4. Patuju i Paulus ka i Timotius bo Epafroditus (2:19-30)

5. Popatora mainga ka tau nompatuduki pepatuduki to nasalana (3:1-4:1)

6. Tewai-tewai kaopuna (4:2-9)

7. Paulus notarima kasi ka to Filipi sabana pewai ira ka iꞌa (4:10-20)

8. Petabe kaopuna (4:21-23)