Pepatuduki ka ngana-ngana bo indo umana
6
Ngana-ngana, komi kana matundu ri jaꞌi indo umamu sabana etumo inggu to masipato ka topomparasaya i Pue Yesus.
2 Bilamo indo bo umamu. Nggari Sampulu Parenta nu Alatala, etumo parenta pamulana to nitambai ante pojanjina.
3 Pade iweꞌimo pojanji etu: Ane komi mombabila uma bo indomu, komi kana masana bo mandate umurumu riara dunia.
4 Komi to najadi uma-uma nu ngana, neꞌe komi mompakarau rara anamu. Tapi pakabetemo ira ante pepatuduki bo pepatora nggari jaꞌi Pue.
Pepatuduki ka batua bo madikana
5 Komi to najadi batua, tukimo parenta madikamu to naria ri dunia eꞌi. Kawiamo etu ante mombabila bo mekou ri jaꞌi ira ante mpuꞌu-mpuꞌu raramu nasimbayu ewa komi nekou ri jaꞌi Kristus mboto.
6 Neꞌe aga miki ratoiya manusia ante mokarajaa mabelo tempo komi rakita madikamu. Tapi pokarajaamo ante mpuꞌu-mpuꞌu raramu ewa batua Kristus to nantuki dota Alatala.
7 Pokarajaa etu kana mukarajaa ante dota rara nasimbayu ewa komi mokarajaa ka i Pue, daꞌa aga ka manusia.
8 Toramo! Butu mbaꞌa tau to nompowia to nabelona, nabeloka iꞌa batua nabeloka daꞌa batua, iꞌa kana mantarima balasina to nabelo nggari jaꞌi Pue nantuki mpengele-ngele belo to nipowiana.
9 Pade komi to najadi madika, komi woꞌu kana moinggu mabelo ri jaꞌi batuamu. Neꞌe mana komi momparangga ira, sabana ninjani komi mboto Puemu bo Pue ira sambaꞌa lau. Iꞌamo to naria ri suruga pade Iꞌa daꞌa nanggita lenje.
Ewamo Magau nu Seta ante parewa mposibali nggari jaꞌi Alatala
10 Kaopuna, komi kana maroso ante kuasa to neliu-liuna to nitarima komi nggari jaꞌi Pue sabana komi nosaongu rara ante Iꞌa.
11 Pakemo pura-pura parewa mposibali nggari jaꞌi Alatala ala komi mompakule mantaꞌamaka mangewa mpengele-ngele akala Magau nu Seta.
12 Sabana kita daꞌa nosibali ka manusia tapi kita nosibali ka balengga-balengga seta, karampua-karampua, bo pue-pue ntanina riara dunia to najaꞌa eꞌi, bo mpengele-ngele seta ntanina ri laerawa.
13 Sabana etu pakemo pura-pura parewa mposibali nggari jaꞌi Alatala ala komi mompakule mangewa bali-balimu ri tempo mposibali to najaꞌa etu. Kawiamo etu ala ane maopumo komi mosibali, komi bate-batena maroso mangewa balimu etu.
14 Jadi taꞌamakamo mangewa balimu ante pura-pura parewa mposibali nggari jaꞌi Alatala. Komi kana mantuki pepatuduki to nakonona. Etumo sulepemu. Komi kana moinggu manoa. Etumo baju asemu to nanggalendu koro batamu.
15 Komi kana malulu rara manggeni Kareba Belo ewa posinggabelo manusia ante Alatala. Etumo sapatumu to naroso.
16 Komi kana maroo momparasaya Pue riara mpengele-ngele. Etumo kaliawomu. Etu kana rapake komi ala komi mompakule mantenggu mpengele-ngele parewa to najaꞌa to nipake Magau nu Seta nombabaga komi.
17 Komi kana maroo manjarumaka Kristus to nompakasalama komi. Etumo songgo wajamu. Pade komi kana mompake Tesa nu Alatala. Etumo gumamu to niwai Nosa Nagasana ka komi.
18 Kawiamo etu pura-pura ante mosambaya bo merapi tulungi ka Alatala. Posambayamo ri butu-butu loga nantuki pekeniaka Nosa Nagasa nu Alatala. Komi kana mainga tempo mosambaya bo neꞌe menonto mosambaya ka pura-pura topomparasaya i Pue Yesus.
19 Pade posambaya woꞌu ka aku ala ane tempo aku motesa Alatala mombawai ka aku tesa-tesa to masipatona ala ante mabia aku mamala mompakanoto isi Kareba Belo to nitabuniaka nggari nggaolu.
20 Sabana nggari Kareba Belo etumo sampe aku najadi suro, pade weꞌi-weꞌi aku naria riara tarunggu. Posambayamo ka aku ala aku mabia mompatolele Kareba Belo, sabana etumo bago to masipato kupowia.
Tesa kaopuna
21 To nipodotaku ala komi mangginjani iwenu katuwuku ri seꞌi. Jadi etu sampe aku nompakau i Tikhikus mpaka ri jaꞌi komi ala iꞌa mamala mompakanoto etu pura-pura ka komi. Iꞌa sambaꞌa sampesuwuta to nipotoweku to natutu nantulungi pokarajaa i Pue.
22 Iꞌa nipakauku mpaka ri jaꞌi komi ala iꞌa mamala mompopanjani ka komi nuapa pura to najadi ri jaꞌiku ri seꞌi, pade ala iꞌa mamala mompakawoe rara komi.
23 Perapi Umata Alatala bo i Pue Yesus Kristus mombawai katuwua mabelo bo towe bo karoso pomparasaya ka pura-pura topomparasaya ri setu.
24 Perapi Alatala mombagane pura-pura tau to nompotowe Pueta Yesus Kristus ante towe to daꞌa ria kaopu-opuna. Amin!
Tabe nggari jaꞌiku,
Paulus