Pasialamo pokainggu Alatala
5
Sabana etu sampesuwu pura-pura, pasialamo pokainggu Alatala sabana komi anana to nipotowena.
2 Pade komi kana matuwu ante towe nasimbayu ewa Kristus nompotowe kita. Nggari towena to nabete Iꞌa nombawai korona rapatesi ala mompakasalama kita. Powiana etu nompakadamba rara Alatala nasimbayu ewa sangele pesomba to nawongi to nipesomba ka Iꞌa.
3 Komi todea nu Alatala. Jadi daꞌa ntoto masipato komi mogau sala ante tau daꞌa rongomu mboto, bara mompowia mpengele-ngele to natantoru, atau maino ante daꞌa ria kabasa-basana. Powia etu daꞌa masipato maria ri tatongo komi, nau aga rauli.
4 Iwetu woꞌu ante tesa-tesa njilaka bo tesa-tesa sambara bo kuwawa-kuwawa to daꞌa masipato. Etu pura-pura daꞌa masipato ka komi. Tapi nabelopa komi manguli tarima kasi ka Alatala.
5 Toramo mpakabelo-belo! Tau to nogau sala ante tau daꞌa rongona mboto bo tau to nompowia to natantoru bo tau daꞌa ria kabasa-basana daꞌa ntoto mamala majadi todea riara Poparenta nu Alatala bo Kristus. Sabana powia etu nasimbayu kajaꞌana ewa tau nompakoni pue-pue ntanina.
6 Neꞌe komi rabagiu ntau ante tesa-tesa daꞌa ria gunana to nanguli powia etu daꞌa nasala. Toramo! Nggari powia-powia etumo sampe pesuku Alatala rapawela ka tau-tau daꞌa natundu ri jaꞌina.
7 Sabana etu neꞌe komi mowega ante ira.
Matuwu riara reme
8 Komi mboto woꞌu nokolu natuwu riara karumauna, tapi weꞌi-weꞌi komi najadi reme sabana komi nosaongu rara ante i Pue. Jadi komi kana matuwu ante pokainggu to masipato ka tau to najadi reme,
9 sabana asele nu reme etu mpengele-ngele powia to nabelo bo to nanoa bo to nakono.
10 Pekirimo mpakabelo-belo inggu nuapa to nompakadamba rara i Pue.
11 Neꞌe komi mosintuwu ante tau to nanggawia powia nggarumau to daꞌa ria gunana. Nabelopa powia etu rapakanoto ante jonjo powiamu to nabelo nasimbayu ewa reme nombawanta karumauna.
12 Kakonona pokainggu to nipowia ira nggalino etu mpuꞌu-mpuꞌu nompakaeya mata, nau aga ratesa-tesa.
13 Tapi pura-pura to niwanta nu reme kana manoto rakita.
14 Pade pura-pura to nipakanoto iwetu kana mabali majadi reme. Etu sampe naria niuli iweꞌi:
“Pembangumo komi to naturuna.
Pembangumo nggari tatongo ntomate,
Pade reme Kristus kana mombawanta komi.”
15 Sabana etu, pekirimo mpakabelo-belo pokainggu komi. Neꞌe matuwu ewa tau-tau to nadoyo, tapi komi kana matuwu ewa tau-tau to nanoto.
16 Pakemo loga to naria ri jaꞌi komi mompowia to nabelona, sabana tempo weꞌi-weꞌi tempo to najaꞌa.
17 Jadi neꞌe komi madoyo, tapi pekirimo mpakabelo-belo ala ranjani komi nuapa to nipodota i Pue ka komi.
18 Neꞌe komi malangu ntule, sabana etu aga mompopeumba dota rara to najaꞌa. Nabelopa komi tunggai rakuasai Nosa Nagasa nu Alatala.
19 Pade podademo sambaꞌa bo sambaꞌa ante tesa-tesa nggari buku Mazmur bo podade-podade to mantoiya Alatala bo podade-podade to niwai Nosa Nagasa nu Alatala. Komi kana modade ante madamba mombatoiya Pue ante mpuꞌu-mpuꞌu raramu.
20 Tunggai posukurumo riara mpengele-ngele ka Umata Alatala ante sanga Pueta Yesus Kristus.
Pepatuduki ka totuꞌa besi bo totuꞌa langgai
21 Pekoumo komi ri jaꞌi roamu sambaꞌa bo sambaꞌa sabana komi nombabila Kristus.
22 Totuꞌa besi, pekoumo ri jaꞌi rongomu langgai ewa komi mekou ri jaꞌi Pue,
23 sabana totuꞌa langgai najadi balengga rongona besi nasimbayu ewa Kristus najadi balengga topomparasaya. Iꞌa mboto nompakasalama topomparasaya to najadi ewa sipa nu korona.
24 Jadi nasimbayu ewa topomparasaya nekou ri jaꞌi Kristus, iwetu woꞌu totuꞌa besi kana mekou ri jaꞌi rongona langgai riara mpengele-ngele.
25 Totuꞌa langgai, potowemo rongomu besi nasimbayu ewa Kristus nompotowe todeana bo nombawai korona rapatesi ala mompakasalama kita.
26 Etu nipowia Kristus ala kita rapakagasa bo rapatani ka Iꞌa mboto. Kita nipegasana ante ue pediu bo tesana
27 ala kita mamala ratarimana ewa todeana to nabelo ntoto, ante daꞌa ria jeko atau silaka nuapa-nuapa, tapi nagasa pura ante daꞌa ria sala nuapa-nuapa.
28 Nasimbayu ewa Kristus nompotowe todeana, iwetu woꞌu totuꞌa langgai kana mompotowe rongona besi nasimbayu ewa iꞌa nompotowe korona mboto. Isema-sema nompotowe rongona besi batuana iꞌa nompotowe korona mboto.
29 Daꞌapa ria lelena tau nompandasa korona mboto, tapi iꞌa aga nompiara bo nombajagai korona mpakabelo-belo nasimbayu ewa Kristus woꞌu nompiara bo nombajagai todeana.
30 Etu nipowia Kristus sabana kita ewa sipa nu korona mboto.
31 Riara Buku Nagasa naria nitulisi iweꞌi: “Sambaꞌa langgai kana mompalasi indo umana pade malau maroo ri jaꞌi rongona besi, pade ira rombaꞌa kana majadi sambaꞌa.” a
32 Tesa eꞌi nakumba batuana, tapi nantuki pangginjaniku to nipatuju nu tesa eꞌi etumo posinggamosu Kristus ante todeana.
33 Tapi naudamo iwenu, tesa etu nosinggawela woꞌu ante komi. Butu mbaꞌa totuꞌa langgai kana mompotowe rongona besi nasimbayu ewa iꞌa nompotowe korona mboto, pade butu mbaꞌa totuꞌa besi kana mombabila rongona langgai.