POKAINGGU TO MASIPATO KA TOPOMPARASAYA I PUE YESUS (4:1-6:20)
Topomparasaya i Pue Yesus kana masintuwu
4
Jadi nantora etu aku to nitarunggu ri seꞌi sabana nomparasaya i Pue merapi ala komi matuwu ante pokainggu to masipato ka tau to nipokio Alatala majadi todeana.
2 Komi kana tunggai matuwu ante maede bo malusu rara. Ane komi rapandasa, komi kana mosabara mandate. Neꞌe masalisa makedi rara ka roamu, tapi popokita ka iꞌa towemu.
3 Pasimbukumo ante mpuꞌu-mpuꞌu rara matuwu mosinggabelo ala mompiara kasintuwu to nirasai komi sabana Nosa Nagasa nu Alatala nompakasaongu rara komi sambaꞌa bo sambaꞌa.
4 Kita pura-pura ewa saongu koro riara i Pue. Kita pura-pura nipesua Nosa Nagasa nu Alatala. Iwetu woꞌu kita pura-pura nipokio Alatala najadi todeana ala mosaongu panjarumakata.
5 Kita pura-pura nomparasaya sambaꞌa lau Pue pade nantuki sangele lau pepatuduki. Kita pura-pura nidiu ewa tandaina kita topomparasaya i Pue Yesus.
6 Aga sambaꞌa lau Alatala, Umata pura-pura. Iꞌamo to nomparenta kita pura-pura bo to naria nosanggani-nggani ante kita pade to naria ri tatongota pura-pura.
7 Tapi naupa iwetu daꞌa nasimbayu pompakule to niwai ka kita. Pompakule to niwai ka kita nantuki to nipakatantu Kristus mboto.
8 Etu sampe naria nitulisi riara Buku Nagasa iweꞌi:
“Tempona Iꞌa neore mpaka ri petoꞌo to nalangana
nadea balina to nikenina.
Pade Iꞌa nompalele pompakule-pompakule ka manusia.” (Mzm. 68:19)
9 Jadi ane niuli, “Iꞌa neore,” natantumo Iꞌa nokolu nanaꞌu sampe ri tambe nu dunia.
10 Pade Iꞌa to nanaꞌuna etu, Iꞌa woꞌu to neore ri petoꞌo to neliu nggalanga nggari pura-pura langi ala pura-pura langi bo dunia maponu ante kuasana.
11 Iꞌamo to nompalele pompakule-pompakule ka manusia. Santongo niwaina ka pompakule majadi suro, santongo niwaina ka pompakule majadi nabi to nompasimbayu tesa nggari jaꞌi Alatala. Santongo woꞌu niwaina ka pompakule majadi topompatolele Kareba Belo, pade ntanina niwaina ka pompakule manggeniaka bo mompatuduki topomparasaya.
12 Etu nipowiana ala mompakaroso topomparasaya i Pue Yesus ala kita mompakule mantui bago to nipodota Alatala. Patujuna ala kita to najadi koro Kristus mantambai maroso
13 sampe kaopuna kita mpasanggani-nggani mosaongu pomparasaya bo mosaongu pangginjanita ewa Ana nu Alatala. Pade kita mpasanggani-nggani mantambai manoto bo maroso sampe majadi masimbayu ewa Kristus mboto.
14 Ante iwetu kita mana ewa ngana-ngana nggedi to nagampa rakeni mantuki mpengaya-ngaya pepatuduki nasimbayu ewa sakaya nagampa nitawui mpoiri gusaꞌa guseꞌi. Kita mana nagampa rabagiu ntau ante mpengele-ngele akala to mompakasalanjala.
15 Tapi kita tunggai matuwu nantuki pepatuduki to nakonona ante mosipotowe sambaꞌa bo sambaꞌa, sampe riara mpengele-ngele kita mantambai maroso bo manoto nasimbayu ewa Kristus mboto.
Iꞌamo to najadi balenggata
16 pade kitamo to najadi ewa korona. Pura-pura sipa to naria ri koro niposidumpa mpakabelo-belo pade niposiumpu ante karaua-karaua ala majadi saongu. Pade ane pura-pura sipa etu mokarajaa mantuki pompakule to niwai ka iꞌa, njumaongu koro etu matuwu mabelo bo mantambai eona mantambai maroso. Waꞌa woꞌu ante kita topomparasaya i Pue Yesus. Ane kita mbau mompake pompakule to niwai i Pue ka kita ante mosipotowe, mantambai eona mantambai maroso pomparasayata bo kasintuwuta.
Topomparasaya kana matuwu nantuki inggu to nabou
17 Jadi sampesuwu-sampesuwu, ante kuasa i Pue aku merapi ante mpuꞌu-mpuꞌu ka komi, neꞌe mana matuwu nasimbayu ewa tau-tau to daꞌa nosinjani ante Alatala pade aga natuwu ante nompekiri anu daꞌa ria gunana.
18 Narumaumo pekiri ira, pade nakampatanimo ira nggari katuwua nabelo nggari jaꞌi Alatala, sabana nakoꞌo rara ira sampe nabungu pekiri ira.
19 Mana ninjani ira naeya pade pura-pura katuwu ira tunggai nantuki dota rara to najaꞌana. Ira daꞌa nabasa nompowia mpengele-ngele to najaꞌana.
20 Tapi daꞌa iwetu to nipatuduki ka komi ewa Kristus.
21 Natantu niepe komimo karebana, pade komi nipatuduki nantuki pepatuduki to nakono nggari jaꞌina.
22 Etumo komi nipatuduki manggabasaka pokainggu to naliu-liuna to nituki komi tempo komi daꞌapa nomparasaya i Pue Yesus. Pokainggu komi etu nipakagero dota rara to najaꞌana to nanggeni komi nantuki jala to nasalana.
23 Komi woꞌu nipatuduki ala mompaloga Alatala mompakabou pekiri bo rara ntaꞌi komi.
24 Pade komi nipatuduki woꞌu mantuki pokainggu to nabou ewa tau to nipajadi Alatala nantuki ingguna mboto to nanoa bo mpuꞌu-mpuꞌu nagasa.
25 Sabana etu, sampesuwu pura-pura, neꞌe mana modawa, tapi tunggai motesa to nakonona sambaꞌa bo sambaꞌa, sabana kita pura-pura ewa sipa nu koro Kristus.
26 Ane komi manggarau neꞌe sampe rau raramu mompakasilaka komi. Neꞌe woꞌu mombaboli rau rara sampe masolo eo.
27 Neꞌe mombawai loga ka Magau nu Seta riara nggatuwu komi.
28 Tau topangangga kana menonto mangangga. Nabelopa iꞌa mokarajaa ante palena mboto mangelo katuwua ante akala to nanoa ala iꞌa mamala mantulungi tau ntanina riara kapepana.
29 Sampesuwu-sampesuwu, ane komi motesa, neꞌe tesa to najaꞌa mesuwu nggari sumbamu, tapi suwurakamo tesa-tesa to nompakabelo bo masipato ka tau-tau ntanina ala tesa komi etu mamala mantulungi tau-tau to nangepena.
30 Pade neꞌe komi mompakasusa rara Nosa Nagasa nu Alatala. Toramo! Nosa Nagasa etumo tandaina to nompakanoto komi Alatala puena. Pade Nosa Nagasana etu woꞌu najadi panjokota sampe marata tempona kita rakabasaka nggari dunia to najaꞌa eꞌi.
31 Pakalipomo mpengele-ngele juꞌa rara. Neꞌe mana momboli rau rara bo mosinggarau. Neꞌe mana mosipongare ante mosiuli sinjaꞌi. Pade neꞌe mana mompakajaꞌa tau ntanina.
32 Tapi komi kana mabelo bo malusu rara sambaꞌa bo sambaꞌa. Pade komi kana mosiampungi sambaꞌa bo sambaꞌa nasimbayu ewa Alatala nombaampungi komi nantuki nuapa to nipowia Kristus.