Bago Paulus nanggeni Kareba Belo ka tau-tau daꞌa to Yahudi
3
Jadi etumo sabana aku, i Paulus nomposambaya komi. Aku eꞌi tau to nitarunggu weꞌi-weꞌi sabana nomparasaya Yesus Kristus bo nompatolele Kareba Belo ka komi tau-tau daꞌa to Yahudi.
2 Natantu niepe komimo iwenu sampe Alatala nombawai ka aku bago manggeni Kareba Belo etu ala katuwu komi rapakabelo. Etu nipowiana nggari towe belona mboto.
3 Iꞌa nompopanjani ka aku niana to nitabuniaka nggari lamba pamulana ewa to nitulisiku sakedi ri baꞌana.
4 Ane komi mombabasa nuapa to nitulisiku etu, kana manoto ka komi pangginjaniku ewa nia Alatala to nipakadupa riara nggatuwu Kristus etu.
5 Ri tempo nggaolu nia etu daꞌapa nipopanjani ka manusia. Tapi weꞌi-weꞌi Nosa Nagasa nu Alatala nompopanjani nia etu ka suro-suro i Pue Yesus bo nabi-nabina to nagasana.
6 Iweꞌimo nia to nipopanjanina etu: Ante momparasaya Yesus Kristus tau-tau daꞌa to Yahudi woꞌu masipato mantarima rasi-rasi nggari jaꞌi Alatala mosanggani-nggani ante tau to Yahudi. Tau-tau daꞌa to Yahudi woꞌu najadi ewa sipa ri saongu koro, pade ira woꞌu masipato mantarima pura-pura nuapa to nijanji Alatala. Etu pura-pura najadi riara nggatuwu ira sabana ira nomparasaya Kareba Belo.
7 Aku eꞌi nionggotaka najadi topanggeni Kareba Belo etu nantuki towe belo nu Alatala. Pade nggari kuasana mboto Iꞌa nombawai ka aku pompakule manggeni kareba etu.
8 Nggari pura-pura topomparasaya i Pue Yesus akumo to neliu nggaede katuwuku. Tapi naupa iwetu akumo to nipelisi Alatala nompatolele Kareba Belo ka tau-tau daꞌa to Yahudi ewa kabelo Kristus to neliu-liuna to daꞌa namala rareke.
9 Aku nipelisi ala mompakanoto ka pura-pura tau iwenu Alatala to nompajadi langi bo dunia nompakadupa niana to nitabuniakana nggari lamba pamulana.
10 Patujuna ala weꞌi-weꞌi Iꞌa mompopanjani ka pura-pura kuasa ri laerawa mpengele-ngele notona mantulungi manusia. Etu pura-pura rapopanjanina nggari nuapa to majadi riara nggatuwu topomparasaya-topomparasaya i Pue Yesus.
11 Alatala nompowia etu pura-pura nantuki niana mboto to naria mami nggari lamba pamulana sampe ri kasae-saena. Pade niana etu nipakadupana ante karata Pueta Yesus Kristus.
12 Ante nomparasaya bo nosaongu rara ante Iꞌa kita nipaloga mompakamosu Alatala riara posambaya ante daꞌa maeka sabana ninjanita Iꞌa kana mantarima kita.
13 Sabana etu, sampesuwu-sampesuwu, aku merapi ka komi, neꞌe malente rara mompekiri aku riara tarunggu, sabana pura-pura kasusa to nirasaiku ri seꞌi nanggeni belo ka komi.
Nabete mpuꞌu towe Kristus
14 Jadi tempo aku nantora etu pura-pura, aku nekadede nosambaya ri ngayo Umata Alatala
15 to nipoumata pura-pura, nabeloka kita ri dunia, nabeloka ira to naria ri suruga.
16 Aku nerapi ka Alatala ala nggari kabete nu kuasana bo kabelona Iꞌa mombawai ka komi kuasa nggari jaꞌi Nosa Nagasana ala komi maroo momparasaya
17 sampe Kristus bate-batena metoꞌo riara ntaꞌi komi. Etu kana majadi ane komi tunggai momparasaya Iꞌa. Pade aku nerapi ala komi batena maroo manjarumaka towe nu Alatala sampe komi maroso nasimbayu ewa kayu to nandala kalena bo sapo to naroso pondasina.
18-19 Aku woꞌu nerapi ala komi mpasanggani-nggani ante pura-pura topomparasaya ntanina mamala mangginjani bo mombarasai kabete nu towe Kristus ka kita to neliu nggari pangginjani manusia. Daꞌa namala raukuruta kaluona, kandatena, kalangana bo kandala nu towe etu. Pade aku nerapi ka Alatala ala komi mamala mombarasai towe Kristus etu sampe kaopuna pura-pura to naria ri jaꞌi Alatala maria woꞌu ri jaꞌi komi.