Nggari towe belo nu Alatala kita nipakasalama
2
Sampesuwu-sampesuwu, tempo komi daꞌapa nomparasaya i Pue Yesus komi ewa namate sabana komi batena nowia silaka bo nombaliunaka parenta-parenta Alatala.
2 Komi batena natuwu nantuki kabiasa-kabiasa manusia ri dunia eꞌi. Komi batena nantuki dota Magau nu Seta, balengga nu kuasa-kuasa ri laerawa. Iꞌamo to nombakuasai rara ntau to daꞌa natundu ri jaꞌi Alatala.
3 Nokolu kita pura-pura noinggu nasimbayu ewa ira. Kita woꞌu natuwu nantuki mpengele-ngele dota rarata to najaꞌa. Kita aga nompowia nuapa to nompakasana korota bo pekiri rara ntaꞌita mboto to najaꞌana. Kakonona kita masipato rapawela pesuku nu Alatala nasimbayu ewa tau-tau ntanina to najaꞌana.
4 Tapi naasi mpuꞌu mata Alatala nanggita kita. Nabete mpuꞌu towena to nipopokitana ka kita
5 sampe tempo kita da ewa namate sabana daꞌa natundu ri jaꞌina, Iꞌa nompakatuwu bali kita nosanggani-nggani ante Kristus. Toramo! Aga nggari towe belo nu Alatala komi nipakasalama.
6 Pade kita niorena pade niwaina pekatoko to nibila nosanggani-nggani ante Yesus Kristus ri suruga sabana kita nosaongu rara ante Kristus.
7 Patujuna ala ri tempo nggapurina kabete nu towe belona to neliu-liuna to nipakanotona ka kita nggari kabelo powia Yesus Kristus mamala rapopokita.
8 Nggari towe belo nu Alatala komi nipakasalama sabana komi nomparasaya i Pue Yesus. Etu daꞌa asele powia komi mboto tapi etu pewai Alatala bayangi.
9 Kita daꞌa nipakasalama ante powiata mboto. Jadi daꞌa ria tau to mamala mompakalanga korona ante manguli, “Aku eꞌi nipakasalama ante powiaku mboto!”
10 Kita eꞌi nipajadi Alatala manusia nabou sabana kita nomparasaya Yesus Kristus. Patuju Alatala ala kita manggawia powia to nabelona to nipakatantuna mamimo ka kita nggaolu.
Tau to Yahudi bo tau daꞌa to Yahudi nipakasaongu Kristus
11 Jadi sampesuwu-sampesuwuku, toramo iwenu katuwu komi tempo nokolu. Komi muli ntau daꞌa to Yahudi pade komi niuli nto Yahudi tau daꞌa nisuna, etumo tau daꞌa todea nu Alatala. Ira to Yahudi niuli tau to nisuna, etumo tau to najadi todea nu Alatala. Tapi kakonona ada mposuna aga tandai to nipowia manusia ri koro ira.
12 Toramo, nokolu komi daꞌapa nangginjani Kristus, komi daꞌa nipaloga mosanggani-nggani ante tau-tau to Israel to najadi todea nu Alatala. Pojanji nu Alatala ka todeana daꞌa nalaku riara nggatuwu komi. Komi aga natuwu riara dunia eꞌi ante daꞌa nangginjani Alatala. Daꞌa ria panjarumaka komi nuapa-nuapa.
13 Tapi weꞌi-weꞌi komi nosaongu rara ante Yesus Kristus. Nokolu komi nakawao nggari jaꞌi Alatala, tapi weꞌi-weꞌi komi nipakamosu ante Iꞌa sabana nggari lei Kristus to nantapasi sala komi.
14 Kristus mbotomo topomposinggabelo kita. Iꞌa nompakasaongu rara tau-tau to Yahudi ante tau-tau daꞌa to Yahudi ante nompakalipo pura-pura posibali to nompopogaꞌa kita nasimbayu ewa wala nompopogaꞌa tau.
15 Ante kamatena ri kayu parika nipopenontona Atura-atura agama to nipapola i Musa ante pura-pura parenta bo pepatudukina. Patujuna ala tau to Yahudi bo tau daꞌa to Yahudi rapakasaongu majadi manusia nabou to nosaongu rara ante Iꞌa. Ante jala iwetumo Iꞌa nompoposinggabelo kita.
16 Patujuna woꞌu ala nggari kamatena ri kayu parika kita to nipakasaonguna rapoposinggabelona ante Alatala sampe maropu pura posibalita.
17 Kristus narata nompatolele Kareba Belo ewa posinggabelo etu ka kita pura-pura, nabeloka komi tau daꞌa to Yahudi to nakawao nggari jaꞌi Alatala, nabeloka kami tau to Yahudi to namosu ante Iꞌa.
18 Nggari powia Kristus kita pura-pura namala mantingayo Umata Alatala ante petulungi Nosana to Nagasa.
19 Jadi sampesuwu-sampesuwu daꞌa to Yahudi, bopia komi daꞌa nireke todea nu Alatala, pade komi aga nireke tau topesowo. Tapi weꞌi-weꞌi mana iwetu. Komi woꞌumo nireke todea nu Alatala nosanggani-nggani ante topomparasaya i Pue Yesus ntanina. Komi woꞌu ananjapo nu Alatala mboto.
20 Kita topomparasaya i Pue Yesus nasimbayu ewa sapo to nibangu Alatala. Suro-suro i Pue Yesus bo nabi-nabi nasimbayu ewa pondasi sapo etu. Yesus Kristus mboto ewa palo mpondasi to neliu nggaroso pade komi woꞌu ewa sapo to nibangu Alatala ri bunggu nu pondasi etu.
21 Tau to nosaongu rara ante i Pue Yesus nasimbayu ewa parewa nu sapo to nisunju mpakabelo-belo sampe kaopuna majadi saongu sapo mpepue to nagasa to masipato rapetoꞌo i Pue.
22 Pade ewa topomparasaya i Pue Yesus komi woꞌu nibangu nosanggani-nggani ante topomparasaya ntanina majadi sapo to nipetoꞌo nu Alatala mboto. Nanotomo Iꞌa netoꞌo ri tatongota sabana naria Nosa Nagasana riara ntaꞌita pura-pura.