SURA PAULUS KA TOPOMPARASAYA RI NGATA
EFESUS
Petabe
1
Sura eꞌi nggari jaꞌiku i Paulus, to nionggotaka najadi suro Yesus Kristus nggari dota Alatala mboto, ka komi todea nu Alatala ri ngata Efesus to naroo nomparasaya Yesus Kristus.
2 Perapi Umata Alatala bo i Pue Yesus Kristus mombagane komi bo mombawai katuwua mabelo ka komi.
PATUJU NU ALATALA KA TOPOMPARASAYA I PUE YESUS (1:3-3:21)
Rasi bo belo nggari jaꞌi Alatala
3 Masipato ratoiyata Alatala, Uma nu Pueta Yesus Kristus! Iꞌa nombagane kita ante nombawai ka kita mpengele-ngele rasi ri suruga nggari Nosana to Nagasa sabana kita nosaongu rara ante Kristus.
4 Ri lamba pamulana daꞌapa dunia nipajadi, Alatala nompelisi kita majadi todeana nggari powia Kristus ka kita. Patujuna ala kita matuwu magasa ante daꞌa ria inggu to nasala ri ngayona.
5 Nggari towena mboto Iꞌa nompakatantu mami nggari lamba pamulana mangonggotaka kita to nosaongu rara ante Yesus Kristus majadi anana nantuki nia bo dotana mboto.
6 Etu sampe masipato kita mantoiya towe belona to neliu-liuna to niwaina ka kita ante kamomi nu rarana mboto sabana kita nosaongu rara ante Anana to nipotowena.
7 Ante lei i Pue Yesus kita nitolomo, silakata niampungimo nggari towe belo nu Alatala to neliu kabetena.
8 Towe belona etu nipopeliuna ka kita ante mpengele-ngele noto bo pangginjani.
9 Nantuki dotana mboto Alatala nompopanjani ka kita niana to nasae nitabuniaka. Nipakatantunamo nggaolu ala niana etu kana rapakadupa Kristus
10 ane maganamo tempo to nipakatantuna. Iweꞌimo niana etu: Pura-pura nuapa to nariana, nabeloka to ri suruga, nabeloka to ri dunia kana rapakasaongu, pade Kristus mboto majadi balengga panggeniakana.
11 Daꞌa aga etu, tapi kita nipelisi Alatala majadi bagiana sabana kita nosaongu rara ante Kristus. Nggari lamba pamulana kita nipakatantuna majadi bagiana nantuki niana mboto, sabana Iꞌa nompowia mpengele-ngele nantuki nia bo dotana mboto.
12 Etu sampe kami to Yahudi to nokolu nomparasaya Kristus masipato mantoiya kabelo nu Alatala to nipogumaa.
13 Pade iwetu woꞌu komi tau-tau daꞌa to Yahudi. Tempo komi nangepe pepatuduki to nakonona komi nomparasaya Kristus bo komi woꞌu najadi bagia nu Alatala. Pepatuduki to nakonona etumo Kareba Belo to nompakanoto iwenu kita mamala rapakasalama. Pade Alatala nombawai tandai to nompakanoto komi mpuꞌu-mpuꞌu bagiana, etumo nipopanaꞌuna ka komi Nosa Nagasa to nijanjina nggaolu.
14 Nosa Nagasa etumo najadi panjokota to nompakanoto nuapa to nijanji Alatala ka todeana natantumo kana ratarimata. Panjokota etu bate-batena maria ri jaꞌita sampe ri kaopu nu dunia tempo kita to najadi bagia nu Alatala rakabasaka nggari pura-pura kajaꞌana. Etu sampe masipato kita mantoiya kabelo nu Alatala to nipogumaa!
Posambaya Paulus
15 Sabana etu, nompamula nggari tempo aku nangepe kareba to nanguli komi nomparasaya i Pue Yesus bo nompotowe pura-pura topomparasaya,
16 daꞌa nenonto-nonto aku nosukuru ri jaꞌi Alatala sabana katuwu komi. Aku bate-batena nanggeni komi riara posambayaku.
17 Aku nerapi ka Alatala, Uma nu Pueta Yesus Kristus, Umata to Neliu Nggakuasa, ala Iꞌa mombawai ka komi noto nggari jaꞌi Nosana to Nagasa, pade mompopanjani ka komi isema Iꞌa ala kaopuna komi mosinjani belo ante Iꞌa.
18 Aku nerapi ala Iꞌa mombabuka pekiri komi ala manoto ranjani komi nuapa to namala rasarumaka komi nggari jaꞌina to nompokio komi majadi todeana. Pade aku woꞌu nerapi ala ranjani komi kabelo bo kagayana mpengele-ngele to nipakasadia Alatala ka todeana,
19 pade ala ranjani komi woꞌu kabete nu kuasana to nipogumaa to naria riara nggatuwuta to nomparasaya Iꞌa. Kuasa etu nasimbayu ewa kuasana to neliu-liuna
20 to nipakena tempo Iꞌa nompakatuwu bali Kristus nggari kamatena pade nombawai ka Iꞌa pekatoko to nibilana ri pangganana ri suruga.
21 Kristus neliu nggakuasa nggari pura-pura kuasa to naria, nabeloka kuasa balengga-balengga seta, nabeloka kuasa-kuasa to nipokaeka manusia, nabeloka kuasa pue-pue ntanina. Pade Iꞌa neliupa nggari pura-pura tau to nalanga panggana, nabeloka to natuwu weꞌi-weꞌi, nabeloka to matuwu ri tempo marata.
22 Alatala nompowia mpengele-ngele nekou ri jaꞌi Kristus. Pade Kristus, to nombakuasai mpengele-ngele etu, nionggotakana najadi balengga topomparasaya Iꞌa.
23 Kita topomparasaya Yesus Kristus nasimbayu ewa koro Kristus mboto. Iꞌamo balenggata to naria ri umba-umba ri langi bo dunia. Jadi pura-pura nuapa to naria ri jaꞌina naria woꞌu ri jaꞌita.