SURA PAULUS KA TOPOMPARASAYA RI
GALATIA
Tesa nompakanoto isi sura
Pue ngata to netoꞌo ri Propinsi Galatia daꞌa tau to Yahudi. Ira nepue ka wiata-wiata bo pue-pue ntanina. Paulus bo i Barnabas narata nompatolele Kareba Belo ka ira, pade naria ira to nomparasaya i Pue Yesus.
Sangga nalaipa i Paulus bo i Barnabas nggari Propinsi Galatia, naratamo tau-tau to nompatuduki pepatuduki to nasala ka to Galatia. Ira nompatuduki iweꞌi: Daꞌa nagana aga momparasaya i Pue Yesus ala rapakasalama, tapi kita kana rasuna bo mantuki Atura-atura agama Yahudi ala kita mpuꞌu-mpuꞌu majadi manoa riara mpanggita Alatala. Ira woꞌu nanguli i Paulus daꞌa suro i Pue Yesus sabana iꞌa daꞌa sambaꞌa nggari suro-suro ri ngata Yerusalem.
Etu sampe i Paulus nantulisi sura eꞌi ka to Galatia. Riara sura eꞌi kita nanggita rau rarana nangewa pepatuduki to nasala. Pamulana i Paulus nompakanoto iꞌa daꞌa nionggotaka manusia manggeni Kareba Belo, tapi iꞌa nionggotaka i Pue Yesus mboto. Pade i Pue Yesus to nombawai ka iꞌa pepatuduki to nipatolelena ka to Galatia. Naopu etu i Paulus nompakanoto pepatuduki Kareba Belo to nanguli iweꞌi: Kita daꞌa majadi manoa riara mpanggita Alatala ante mantuki Atura-atura agama, tapi kita majadi manoa ante momparasaya i Pue Yesus. Kaopuna i Paulus nompatuduki pokainggu bo powia nuapa to masipato ka topomparasaya i Pue Yesus.
Isi sura to napokona iweꞌi:
1. Tesa pamulana (1:1-10)
2. BAGIA PAMULANA: Kuasa i Paulus nanggeni Kareba Belo nggari jaꞌi Pue Yesus mboto (1:11-2:21)
3. BAGIA KARONGUNA: Kita majadi manoa riara mpanggita Alatala ante momparasaya i Pue Yesus, daꞌa ante mantuki Atura-atura agama (3:1-4:31)
4. BAGIA KATOLUONGUNA: Pokainggu to masipato ka topomparasaya i Pue Yesus (5:1-6:10)
5. Tesa kaopuna (6:11-18)