SURA PAULUS KARONGGANINA KA TOPOMPARASAYA RI NGATA
KORINTUS
Tesa nompakanoto isi sura
Ngata Korintus saongu ngata bete ri Propinsi Akhaya. Paulus mboto tau pamulana nompatolele Kareba Belo ri setu (kitamo Suro-suro 18:1-17). Sangga Paulus nompalasi ngata Korintus malau mpaka ri ngata ntanina, naria bara sakuya mbaꞌa guru topodawa narata ri ngata Korintus. Ira nanjapuaka kuasa i Paulus pade nanguli iꞌa daꞌa sambaꞌa suro i Pue Yesus. Jadi nangepe lele etu i Paulus nantulisi santaꞌu sura nipakatuna ka topomparasaya ri Korintus ante i Titus, sambaꞌa roana sampokarajaa. Sura etu nalipo, mana ria ri jaꞌita. Riara surana etu i Paulus nangontiaka ante nakoꞌo mpuꞌu tau-tau to nanjapuaka kuasana ewa suro i Pue (2:3; 7:8-13), pade nipakauna to Korintus mombasuku tau to najaꞌa pokaingguna etu (2:5-11).
Tempo i Titus nanjili nggari ngata Korintus pade nosirata ka i Paulus ri Propinsi Makedonia, nitesana ka i Paulus, “Topomparasaya ri ngata Korintus nombasuku tau etu nantuki parentamu. Nadeamo ira to najea nggari powia ira nanjapuaka kuasamu ewa suro i Pue Yesus, pade nalentoramo rara ira manggita komi. Tapi naria sanupa to nompakakoꞌo rara daꞌa madota mekou ri jaꞌimu ewa suro i Pue.” Sangga nangepe tesa i Titus etu i Paulus nantulisi sura eꞌi to nabiasa niuli Sura Paulus karongganina ka topomparasaya ri ngata Korintus.
Isi sura to napokona iweꞌi:
1. BAGIA PAMULANA: Paulus ante topomparasaya ri Korintus (pasal 1-7)
Petabe (1:1-2)
Alatala nompakaroso rarata riara kasusa bo kapari (1:3-11)
Paulus nompakanoto ka to Korintus iwenu sampe niana malau mantalioda ira nabalimo (1:12-2:13)
Paulus notesa ka ira ewa pokarajaana nanggeni Kareba Belo (2:14-6:13)
Paulus nerapi ala to Korintus mosinggabelo bali ante iꞌa pade neꞌe mana mantuki guru-guru topodawa (6:14-7:1)
Paulus nantesa kadamba nu rarana nangepe tesa to nikeni i Titus to nanguli topomparasaya ri Korintus madota mosinggabelo bali ante iꞌa (7:2-16)
2. BAGIA KARONGELENA: Tewai i Paulus ewa doi petulungi ka topomparasaya to nakasiasi ri Bagia Yudea (pasal 8-9)
3. BAGIA KATOLUNGELENA: Paulus mombabali tesa to nanguli iꞌa daꞌa sambaꞌa suro i Pue Yesus (10:1-13:10)
Paulus nanggarau tau-tau to dananjapuaka kuasana ewa suro i Pue Yesus (pasal 10)
Paulus nompopatora ka topomparasaya ri Korintus ala neꞌe mantuki guru-guru topodawa to nangewa iꞌa (11:1-15)
Paulus nantesa pokarajaana ewa suro i Pue Yesus, panggita-panggita to nikitana pade kasusa to nirasaina (11:16-12:13)
Paulus nantesa kakini rarana nompekiri to Korintus (12:14-21)
Popatora-popatora kaopuna (13:1-10)
Petabe kaopuna (13:11-13)