PEPATUDUKI KAOPUNA (16:1-24)
Pepatuduki Paulus ewa petulungi ka topomparasaya ri Bagia Yudea
16
Ane pompekutana komi ewa doi rapasiromu ala mantulungi topomparasaya i Pue iweꞌimo pesonoku: Komi kana mowia nasimbayu ewa to nipakauku ka todea topomparasaya ri Bagia Galatia.
2 Etumo ri eo-eo Aka komi kana mompatani sabagia nggari doi pombaratamu nantuki kadea nu pombaratamu sambaꞌa bo sambaꞌa. Pade doi etu kana raboli komi sampe aku momai ri jaꞌi komi ala neꞌe doi etu aga rapamula rapasiromu tempo aku lako momai ri jaꞌi komi.
3 Tempo etu aku kana mompakau tau-tau to rapelisi komi manggeni doi petulungi nggari jaꞌi komi mpaka ri ngata Yerusalem. Ira kana kuwai ka sura mompakanoto isema ira bo bago nuapa to niparasaya ka ira.
4 Pade ane rapekiri komi mabelopa ane aku woꞌu mantuki ira, kami kana malau mpasanggani-nggani.
Nia Paulus bo roana mantalioda to Korintus
5 Aku kana momai mantalioda komi maopu aku mompebutu Propinsi Makedonia, sabana patujuku malau mokolu mpaka ri Makedonia.
6 Pade bara aku mamala metoꞌo ante komi bara sakuya kasaena, bara sampe maopu tempo leni, ala komi mamala mantulungi aku riara mpolumakoku mpaka ri petoꞌo ntanina.
7 Sabana aku daꞌa madota aga mesai sampalai ri jaꞌi komi. Tapi nisarumakaku aku mamala metoꞌo ante komi masae sakedi ane etu rapaloga i Pue.
8 Tapi weꞌi-weꞌi aku kana maroo ri ngata Efesus sampe Eo Bete Pentakosta,
9 sabana nadeamo loga niwai ka aku ri seꞌi mompowia pokarajaa to mamala manggeni belo ka tau dea, naupa nadea woꞌu baliku ri seꞌi.
10 Ane i Timotius mesai ri jaꞌi komi tarimamo iꞌa ante mabelo ala iꞌa daꞌa maeka ri tatongo komi, sabana iꞌa nantui bago i Pue nasimbayu ewa aku mboto.
11 Jadi neꞌe sampe maria tau manjauru iꞌa. Tapi tulungimo iꞌa mompapola polumakona ante mabelo ala iꞌa mamala manjili ri jaꞌiku, sabana aku nompopea karatana ri seꞌi nosanggani-nggani ante sampesuwu-sampesuwu topomparasaya ntanina.
12 Ane pompekutana komi ewa sampesuwuta Apolos, nadea ngganimo aku nanguli ka iꞌa ala malau mantalioda komi mosanggani-nggani ante topomparasaya-topomparasaya ntanina. Tapi iꞌa daꞌapa madota malau weꞌi-weꞌi. Ane maria logana iꞌa kana momai ri jaꞌi komi.
Tesa kaopuna
13 Komi kana mainga bo maroo momparasaya. Komi kana mabia bo maroso.
14 Nuapa-nuapa rapowia komi kana rapowia ante towe.
15 Natantumo komi nosinjani ante ira i Stefanus saongu njapo. Ira tau-tau pamulana ri Propinsi Akhaya to nomparasaya i Pue Yesus, pade ira nompasimbuku ante mpuꞌu-mpuꞌu rara mantulungi todea topomparasaya. Jadi sampesuwu-sampesuwu, kuperapi ka komi ante mpuꞌu-mpuꞌu raraku,
16 pekoumo komi ri jaꞌi ntau ewa ira pade ri jaꞌi butu mbaꞌa tau to nokarajaa ntomo ante ira nantulungi todea topomparasaya.
17 Nadambamo raraku tempo i Stefanus, i Fortunatus bo Akhaikus nomai ri jaꞌiku ri seꞌi, sabana ira nanjaliku komi nantulungi aku ri seꞌi.
18 Ira nompakasana raraku nasimbayu ewa ira nompakasana rara komi. Jadi etu sampe kuperapi ka komi, bilamo tau-tau ewa ira etu.
19 Nadea tabe nggari jaꞌi ntodea topomparasaya ri Propinsi Asia. Pade tarima woꞌu nadea tabe riara sanga i Pue nggari jaꞌi Akwila bo i Priskila nosanggani-nggani ante todea topomparasaya to nodade ri sapo ira.
20 Pade nadea tabe woꞌu nggari jaꞌi pura-pura topomparasaya ri seꞌi. Posipakasampemo tabe sambaꞌa bo sambaꞌa ante towe.
21 Ante paleku mboto aku nantulisi ka komi iweꞌi: Tabe nggari jaꞌiku i Paulus.
22 Isema-sema daꞌa nompotowe i Pue, masurukawumo iꞌa! Maranata, karatamo i Pue!
23 Perapi i Pue Yesus mombagane komi.
24 Aku nompotowe komi pura-pura to nosaongu rara ante Yesus Kristus.
Tabe nggari jaꞌiku,
Paulus