PEPATUDUKI EWA TAU NAMATE RAPAKATUWU BALI (15:1-58)
Yesus Kristus mpuꞌu-mpuꞌu natuwu bali
15
Sampesuwu-sampesuwu, aku madota mompopatora ka komi Kareba Belo to nipatoleleku ka komi to nitarima komi pade to naroso niparasaya komi.
2 Kareba Belo etu namala manggeni komi rapakasalama ane komi maroo momparasaya tesa to nipatoleleku ka komi. Ane daꞌa, pomparasaya komi daꞌa ria gunana.
3 Aku nompasimbayu ka komi bopia pepatuduki to neliu nggapokona to nitarimaku mboto, etumo Kristus namate nanjaliku silakata ewa to nitulisi riara Buku Nagasa. a
4 Iꞌa nitana riara dayo, pade ri eo katolueona Iꞌa nipakatuwu bali nggari kamatena ewa to nitulisi riara Buku Nagasa. b
5 Naopu etu Iꞌa nompopokita korona ka i Petrus pade ka anaguru-anaguruna sampulu rombaꞌa.
6 Pade naopu etu nipopokitana korona ka topantuki-topantuki Iꞌa nelabi nggari limatu mbaꞌana sanggani. Pade sabagia bete nggari jaꞌi ira danatuwu sampe weꞌi-weꞌi, tapi naria bara sakuya mbaꞌa to namatemo.
7 Naopu etu nipopokitana korona ka Yakobus, pade ka pura-pura tau to najadi surona.
8 Pade kaopuna nipopokitana korona woꞌu ka aku to nasimbayu ewa ngana nesuwu daꞌapa nagana mbulana.
9 Sabana aku eꞌi suro i Pue Yesus to neliu nggaede katuwuku. Kakonona aku eꞌi daꞌa masipato rauli sambaꞌa suro i Pue sabana aku nompandasa todea topomparasaya Alatala bopia.
10 Tapi nggari towe belo nu Alatala aku najadi sambaꞌa suro i Pue Yesus. Pade towe belona etu naria aselena riara nggatuwuku. Aku nokarajaa neliu nggatomo nggari pura-pura suro i Pue ntanina. Tapi kakonona daꞌa aku to nokarajaa ntomo iwetu. Etu asele nu towe belo nu Alatala to naria ri jaꞌiku.
11 Jadi daꞌa napokona ane komi nangepe Kareba Belo nggari jaꞌiku atau nggari jaꞌi suro-suro ntanina. To napokona kami nompatolele Kareba Belo pade Kareba etu niparasaya komimo.
Ane Kristus daꞌa nipakatuwu bali pomparasayata daꞌa ria gunana
12 Jadi ane kami nompatolele ka komi tesa to nanguli Kristus nipakatuwu bali nggari kamatena, nokuya naria tau ri tatongo komi to nanguli tau namate daꞌa ntoto rapakatuwu bali?
13 Ane tau namate daꞌa ntoto rapakatuwu bali batuana Kristus woꞌu daꞌa nipakatuwu bali nggari kamatena.
14 Pade ane Kristus daꞌa nipakatuwu bali nggari kamatena daꞌa ntoto ria gunana nggari Kareba Belo to nipatolele kami, pade daꞌa woꞌu ria gunana pomparasaya komi.
15 Pade daꞌa aga etu. Ane tesa ira nakono kami nodawa, sabana kami nanguli Alatala nompakatuwu bali Kristus nggari kamatena. Tapi ane rapana nakono tau namate daꞌa rapakatuwu bali batuana Alatala daꞌa nompakatuwu bali Kristus.
16 Sabana ane tau namate daꞌa rapakatuwu bali natantumo Kristus daꞌa nipakatuwu bali.
17 Pade ane Kristus daꞌa nipakatuwu bali, pomparasaya komi daꞌa ntoto ria gunana, komi bate-batena nasilaka.
18 Pade topomparasaya-topomparasaya Iꞌa to namatena mana ria panjarumaka.
19 Ane kita mamala manjarumaka Kristus aga tempo kita natuwu ri dunia eꞌi kitamo tau-tau to neliu nggandasa.
Kristus mpuꞌu-mpuꞌu nipakatuwu bali pade kita woꞌu kana rapakatuwu bali
20 Tapi kakonona Kristus mpuꞌu-mpuꞌu nipakatuwu bali nggari kamatena. Pade kajadia etu nompakanoto tau-tau namate kana rapakatuwu bali.
21 Nggari powia sambaꞌa tau, manusia kana mamate. Iwetu woꞌu nggari powia to sambaꞌana, manusia mamala rapakatuwu bali nggari kamatena.
22 Pura-pura manusia kana mamate sabana silaka Adam nawela kita pura-pura. Iwetu woꞌu kita pura-pura kana rapakatuwu bali nggari kamateta sabana nosaongu rara ante Kristus.
23 Tapi tau-tau to namatena kana rapakatuwu bali nantuki posisunjuna to nipakatantu. Kristus tau pamulana nipakatuwu bali. Pade maopu etu tau-tau to nosaongu rara ante Iꞌa kana rapakatuwu bali tempo Iꞌa marata bali ri dunia.
24 Maopu etu pade marata kaopu nu dunia. Tempo etu Kristus kana mompakaropu mpengele-ngele kuasa to naria, nabeloka balengga-balengga seta, nabeloka kuasa-kuasa to nipokaeka manusia, nabeloka pue-pue ntanina. Maopu etu Iꞌa kana mombawai kuasana moparenta ewa magau ka Umana Pue Alatala.
25 Kristus kana moparenta ewa magau sampe Alatala mompowia pura-pura balina mekou ri jaꞌina.
26 Pade bali kaopuna to rapakaropuna etumo kamatea.
27 Nanotomo pura-pura balina kana mekou ri jaꞌina sabana naria to nitulisi riara Buku Nagasa iweꞌi: “Alatala nompowia pura-pura nuapa to naria nekou ri jaꞌina.” c Nanotomo Alatala mboto daꞌa nekou ri jaꞌi Kristus mosanggani-nggani ante pura-pura nuapa to naria, sabana Iꞌamo to mompowia ira pura-pura mekou ri jaꞌi Kristus.
28 Jadi tempo pura-pura nuapa to naria mekou ri jaꞌi Kristus, Iꞌa mboto ewa Ana nu Alatala kana mekou ri jaꞌi Umana to nompowia pura-pura nuapa mekou ri jaꞌina, ala kaopuna Alatala kana momparenta mpengele-ngele to naria.
Ane tau namate daꞌa rapakatuwu bali powiata ka Pue daꞌa ria gunana
29 Ane tau namate daꞌa rapakatuwu bali rapokuya tau nidiu ewa tandaina ira topomparasaya i Pue Yesus manjaliku tau-tau to namatemo? Nuapa gunana mowia ada etu ane tau namate daꞌa ntoto rapakatuwu bali?
30 Pade ane tau namate daꞌa rapakatuwu bali rapokuya kami madota mantingayo kasusa bo kapari butu-butu eona?
31 Eo-eo aku ntora namate. Aku daꞌa nodawa! Nanotomo kasana nu raraku nompekiri komi to nosaongu rara ante Pueta Yesus Kristus. Pade iwetu woꞌu nanoto kakono nu tesaku eꞌi!
32 Pekirimo! Nuapa gunana aku nosibali ante tau-tau najaꞌa ri ngata Efesus nasimbayu ewa tau nosibali ante binata-binata nasoa? Natantumo daꞌa ntoto ria gunana ane aku nowia etu ewa sambaꞌa manusia to daꞌa ria panjarumakana rapakatuwu bali nggari kamatena! Ane tau namate daꞌa rapakatuwu bali agina kita mantuki popata to nanguli iweꞌi: “Kamaimo kita manggoni bo manginu ala madamba-damba, sabana naile kita kana mamate.” d
33 Tapi neꞌe masalanjala! Ane komi masintuwu ante tau-tau to nadenggo pekirina pokainggu komi woꞌu rapakadenggo.
34 Jadi pakanoto raramu weꞌi-weꞌi. Neꞌe mana mowia silaka! Kakonona komi kana maeya mata sabana danaria ri tatongo komi tau-tau to daꞌapa nomparasaya Alatala!
Iwenumo koro bata ntau namate rapakatuwu bali
35 Tapi bara naria to nekutana iweꞌi: “Iwenu sampe tau namate rapakatuwu bali? Iwenumo koro bata ira ane rapakatuwu bali?”
36 Nadoyo tanu komi nompekutana iwetu! Ane komi nombatuja ri tinalu daꞌa ntoto ria to matuwu ane ongu to nituja daꞌa mokolu raiwu ntana nasimbayu ewa tomate!
37 Pade to nituja komi etu daꞌa tuja-tuja mboto. To nituja komi aga onguna, bara ongu gando atau ongu tuja-tuja ntanina.
38 Tapi Alatala nompakatuwu ongu-ongu to nituja etu nantuki dotana sampe butu-butu ongu najadi ewa lio nu tuja-tuja etu mboto.
39 Koro bata anu natuwu ri dunia eꞌi daꞌa butu nasimbayu. Koro bata manusia nosisala ante koro bata nu binata-binata bo koro bata tonji bo bau.
40 Pade iwetu woꞌu nuapa to naria ri langi nosisala ante to naria ri dunia. Pade nosisala kagayana to naria ri suruga ante to naria ri dunia eꞌi.
41 Kagaya nu mata eo sangele, bo kagaya nu wula sangele ntanina. Pade kagaya nu betuꞌe sangele woꞌu, bo betuꞌe mboto mbau nosisala kagayana.
42 Iwetu woꞌu ante koro bata ntau namate to rapakatuwu bali. Watabaku to nitana namala mapopo. Tapi koro bata to rapakatuwu bali daꞌa mana mamala mapopo.
43 Watabaku to nitana najaꞌa nikita bo nalente. Tapi koro bata to rapakatuwu bali nagaya bo naroso.
44 Watabaku to nitana koro manusia biasa, tapi koro bata to rapakatuwu bali koro nipakakuasa Nosa Nagasa nu Alatala. Naria koro manusia biasa, pade naria woꞌu koro to nipakakuasa Nosa Nagasa nu Alatala.
45 Ewa to nitulisi riara Buku Nagasa iweꞌi: “Manusia pamulana, Adam, najadi anu to natuwu.” e Tapi Kristus, to nireke Adam kaopuna, nombawai katuwua ka manusia sampe ri kasae-saena.
46 To najadi nokolu koro manusia biasa, daꞌa koro to nipakakuasa Nosa Nagasa nu Alatala. Koro to nipakakuasa Nosa Nagasa najadi ri purina.
47 Manusia pamulana etu nopuꞌu nggari tana ri dunia eꞌi, tapi Kristus, to nireke manusia karongelena, nopuꞌu nggari suruga.
48 Koro manusia ri dunia eꞌi nasimbayu ewa koro Adam to nopuꞌu nggari tana etu. Tapi tau-tau to nosaongu rara ante Kristus kana mombarata koro nggari suruga nasimbayu ewa koro Kristus.
49 Weꞌi-weꞌi korota ri dunia nasimbayu ewa koro Adam to nopuꞌu nggari dunia eꞌi. Tapi kita topomparasaya Kristus kana mombarata koro nggari suruga nasimbayu ewa koro Kristus.
50 Sampesuwu-sampesuwu, iweꞌimo patujuku: Korota to nipajadi nggari isi bo lei daꞌa ntoto mamala mombarata bagia riara Poparenta nu Alatala. Korota to mamala mapopo daꞌa ntoto mamala mosanggani-nggani ante Alatala to daꞌa ria kamate-matena.
51 Epemo! Kupopanjani ka komi sangele to nitabuniaka Alatala nggari lamba pamulana. Kita pura-pura daꞌa mamate, tapi kita pura-pura kana rabali
52 riara sampida mata tempo kololio i Pue kaopuna rapopomoni. Sabana kololio etu kana rapopomoni, pade tau-tau to namatena kana rapakatuwu bali ante koro to mana mapopo, pade kita pura-pura kana rabali.
53 Sabana korota to namala mapopo kana rasambei ante koro to mana mapopo. Koro to mamala mamate kana rasambei ante koro to daꞌa mana mamate.
54 Pade ane koro to mamala mamate bo mapopo rasambei ante koro to daꞌa mana mamate bo mapopo, kana madupa tesa to nitulisi riara Buku Nagasa iweꞌi:
“Nipakaopumo kamatea!
Padagimo Alatala!” (Yes. 25:8)
55 “Nidagimo kamatea!
Mana ria kuasana mompandasa manusia!” (Hos. 13:14)
56 Nggari silaka manusia sampe naria kuasa kamatea. Pade silaka nakuasa riara nggatuwu manusia sabana naria Atura-atura agama nompakanoto nuapa to niuli silaka.
57 Tapi ratoiyata Pue Alatala! Iꞌamo to manggeni kita majadi padagi sabana kita nosaongu rara ante Pueta Yesus Kristus!
58 Jadi sampesuwu-sampesuwu to nipotoweku, mantora etu pura-pura komi kana maroo momparasaya. Neꞌe mompakamba nuapa-nuapa mombagagoya pomparasaya komi. Neꞌe menonto mompasimbuku ante mpuꞌu-mpuꞌu raramu mantui bago to niwai Pue ka komi, sabana ninjani komi, pura-pura nuapa to rapowia komi ka i Pue natantumo kana maria aselena.