Pepatuduki ewa pompakule nggari jaꞌi Nosa Nagasa
14
Jadi pasimbukumo ante mpuꞌu-mpuꞌu rara mompotowe tau ntanina. Pade komi kana mpuꞌu-mpuꞌu maria dota rara mombarata pompakule-pompakule nggari jaꞌi Nosa Nagasa nu Alatala, neliu-liupa pompakule mompasimbayu tesa nggari jaꞌi Pue.
2 Ane sambaꞌa tau notesa basa-basa to nopuꞌu nggari jaꞌi Nosa Nagasa iꞌa notesa ka Alatala daꞌa ka manusia, sabana daꞌa ria tau to namala mangginjani batuana tesa etu. Ante pekeniaka Nosa Nagasa iꞌa notesa anu daꞌapa ninjani manusia.
3 Tapi ane sambaꞌa tau nompasimbayu tesa nggari jaꞌi Pue iꞌa notesa ka manusia ala mompakaroso pomparasaya ira, mompatuduki ira bo mompakawoe rara ira.
4 Tau to notesa basa to nopuꞌu nggari jaꞌi Nosa Nagasa nompakaroso pomparasayana mboto, tapi tau to nompasimbayu tesa nggari jaꞌi Alatala nompakaroso pomparasaya todea topomparasaya i Pue.
5 To nipodotaku ala komi pura-pura mamala motesa basa-basa to nopuꞌu nggari jaꞌi Nosa Nagasa. Tapi neliu nggari etu to kupodota ala komi pura-pura mamala mompasimbayu tesa nggari jaꞌi Pue. Tau to nompasimbayu tesa nggari jaꞌi Pue riara mpodade neliu nggaguna nggari tau to notesa basa-basa to nopuꞌu nggari jaꞌi Nosa Nagasa. Tapi ane iꞌa mamala mompakanoto batuana tesa-tesa etu, nasimbayu gunana ante nompasimbayu tesa nggari jaꞌi Pue, sabana todea topomparasaya mamala mangginjani batuana tesa etu, pade pomparasaya ira mamala rapakaroso.
6 Sampesuwu-sampesuwu, ane rapana aku marata ri jaꞌi komi pade motesa basa-basa to nopuꞌu nggari jaꞌi Nosa Nagasa, nuapa gunana etu ka komi? Natantu daꞌa ntoto ria gunana! Tapi kana maria gunana ka komi ane aku mompakanoto ka komi sangele tesa nggari jaꞌi Alatala, atau motarangga ka komi sangele kareba anu daꞌapa ninjani komi, atau mompasimbayu ka komi tesa nggari jaꞌi Pue, atau mompatuduki komi.
7 Pekirimo jonjo parewa-parewa musi to daꞌa nonosa ewa sasuli bara koronjo. Ane parewa musi etu daꞌa rapopomoni ante manoto daꞌa ria tau mamala mangginjani dade to nipopomoni.
8 Pade ane kololio daꞌa rapopomoni ante manoto mompokio tantara malau mangewa bali-bali ira, natantu daꞌa maria tantara mompakasadia korona malau mosibali ante balina.
9 Iwetu woꞌu ante komi. Ane komi motesa basa-basa to daꞌa ninjani roa-roamu, iwenu ira mangginjani patuju nu tesamu? Tesa-tesamu daꞌa ria gunana. Komi aga masimbayu ewa tau notesa ka lombona.
10 Ri dunia eꞌi nadea ngele basa, daꞌa ninjaniku sakuya kadeana. Tapi naupa iwetu, pura-pura basa naria batuana.
11 Tapi ane aku daꞌa nangginjani batuana basa to nitesa sambaꞌa tau, aku majadi ewa torata nggari sawaliku ngata riara mpanggitana, bo waꞌa woꞌu iꞌa riara mpanggitaku.
12 Jadi iwetu woꞌu ane komi motesa ka roamu riara basa to nopuꞌu nggari jaꞌi Nosa Nagasa. Sampesuwu-sampesuwuku, ninjaniku komi mpuꞌu-mpuꞌu madota mombarata pompakule nggari jaꞌi Nosa Nagasa nu Alatala. Jadi nabelopa komi mompasimbuku mompopoguna pompakule-pompakule to mantulungi topomparasaya ala mantambai maroso pomparasaya ira.
13 Sabana etu tau to notesa basa-basa to nopuꞌu nggari jaꞌi Nosa Nagasa riara mpodade kana mosambaya merapi ala iꞌa rawai pompakule mompakanoto batuana tesa-tesa etu.
14 Sabana ane aku mosambaya riara basa to nopuꞌu nggari jaꞌi Nosa Nagasa pekiriku daꞌa najala, tapi aku aga notesa nantuki tesa-tesa to niwai Nosa Nagasa ka aku.
15 Jadi nuapa masipato kupowia? Iweꞌimo: Aku kana mosambaya riara basa to nopuꞌu nggari jaꞌi Nosa Nagasa, pade aku kana mosambaya woꞌu nantuki pekiriku. Aku kana modade riara basa to nopuꞌu nggari jaꞌi Nosa Nagasa, pade aku kana modade woꞌu nantuki pekiriku mboto.
16 Ane komi mosukuru ka Alatala riara basa to nopuꞌu nggari jaꞌi Nosa Nagasa pade maria tau-tau ntanina riara mpodade etu to daꞌa nangginjani batuana tesamu etu, iwenu ira mantakono posambayamu etu? Sabana daꞌa ninjani ira batuana tesamu etu.
17 Naupa posambayamu etu nabelo mpuꞌu, tapi tau ntanina etu daꞌa ntoto nipakaroso pomparasayana.
18 Aku nosukuru ri jaꞌi Alatala sabana aku niwai ka pompakule motesa basa-basa to nopuꞌu nggari jaꞌi Nosa Nagasa neliu nggari komi pura-pura.
19 Tapi naupa iwetu, riara kasiromu todea topomparasaya nipokonokupa motesa limambela tesa to ninjani ntodea ala mompatuduki ira. Etu neliu nggabelo nggari motesa njobu-njobu mbela tesa riara basa to nopuꞌu nggari jaꞌi Nosa Nagasa nu Alatala.
20 Sampesuwu-sampesuwuku, neꞌe mana mompekiri ewa ngana-ngana! Ane mompekiri kajaꞌana komi kana masimbayu ewa ngana nggedi to daꞌapa nangginjani mompowia kajaꞌana. Tapi ane mompekiri pompakule nggari jaꞌi Nosa Nagasa etu komi kana manoto ewa tau to nabetemo.
21 Riara Buku Nagasa naria nitulisi iweꞌi:
“Nangulimo i Pue, ‘Nggari tau-tau to notesa basa-basa ntanina,
etumo nggari tau-tau nggari sawaliku ngata,
Aku kana motesa ka todeaku eꞌi.
Tapi naupa iwetu ira daꞌa mompetalinga tesaku.’” (Yes. 28:11-12)
22 Jadi pompakule motesa basa-basa to nopuꞌu nggari jaꞌi Nosa Nagasa sangele tandaina to nompakanoto isema tau-tau daꞌa nomparasaya. Etu daꞌa tandaina to nompakanoto isema topomparasaya i Pue. Pade pompakule mompasimbayu tesa nggari jaꞌi Alatala tandaina to nompakanoto isema topomparasaya, daꞌa nompakanoto isema tau-tau daꞌa nomparasaya.
23 Jadi ane pura-pura topomparasaya masiromu sanggani pade komi pura-pura motesa basa-basa to nopuꞌu nggari jaꞌi Nosa Nagasa, nuapa majadi ane maria tau-tau to daꞌapa nangginjani Tesa nu Alatala atau tau-tau daꞌa nomparasaya mesua ri setu? Natantumo ira kana mompekiri komi pura-pura aga tau nagila.
24 Tapi ane tau-tau daꞌa nomparasaya atau tau to daꞌapa nangginjani Tesa nu Alatala mesua ri kasiromu komi tempo pura-pura topomparasaya mompasimbayu tesa nggari jaꞌi Pue, tesamu etu kana mompakanoto silaka-silaka ira etu. Pura-pura pokainggu ira kana rapakanoto nggari tesa-tesa etu.
25 Pura-pura pompekiri ira to nitabuniaka riara ntaꞌi ira kana rapakanoto sampe ira kana motimbakotu mombasomba Alatala ante manguli, “Mpuꞌu-mpuꞌu Alatala naria ri tatongo komi ri seꞌi.”
Atura mompake pompakule nggari jaꞌi Nosa Nagasa riara mpodade
26 Jadi sampesuwu-sampesuwuku, nuapa patuju to napokona nggari tesaku eꞌi? Iweꞌimo: Ane komi masiromu modade, kana maria tau to modade, pade maria tau ntanina to mompatuduki, kana maria tau mompakanoto tesa nggari jaꞌi Alatala. Pade tau ntanina kana motesa riara basa-basa to nopuꞌu nggari jaꞌi Nosa Nagasa, pade tau ntanina kana mompakanoto batuana tesa-tesa etu. Tapi pura-pura etu kana rapowia komi ala mompakaroso pomparasaya ntodea.
27 Ane maria to motesa basa-basa to nopuꞌu nggari jaꞌi Nosa Nagasa neꞌe meliu nggari rombaꞌa atau tolumbaꞌa, pade ira kana motesa mosimpaliu sambaꞌa bo sambaꞌa. Pade kana maria to mamala mompakanoto batuana tesa-tesa etu.
28 Ane daꞌa ria to mamala mompakanoto batuana tesa-tesa etu, agina topotesa basa-basa etu malino riara mpodade etu. Agina ira motesa-tesa basa etu riara ntaꞌi ira mboto ka Alatala.
29 Ane tau mompasimbayu tesa nggari jaꞌi Alatala nabelopa aga rombaꞌa atau tolumbaꞌa motesa pade tau ntanina kana mompetalinga mpakabelo-belo ala mompoposisala tesa-tesa etu.
30 Pade ane sambaꞌa tau ntanina to nekatoko ri setu mombarata tesa-tesa nggari jaꞌi Alatala, topotesa pamulana kana menonto.
31 Komi pura-pura mamala mompasimbayu tesa nggari jaꞌi Pue mosimpaliu sambaꞌa bo sambaꞌa ala pura-pura topomparasaya mamala rapatuduki bo rapakaroso.
32 Toramo! Tau to nompasimbayu tesa nggari jaꞌi Pue namala motesa atau menonto motesa nantuki dotana mboto.
33 Sabana to nipokono Alatala daꞌa kagadona tapi kaamana.
Naria sangele pepatuduki to nalaku ri tatongo topomparasaya ri umba-umba ngata,
34 etumo, besi-besi kana malino riara mpodade. Ira daꞌa nipaloga motesa-tesa. Tapi ira kana mekou ewa to nitulisi riara Atura-atura agama.
35 Ane maria to madota ranjani ira, agina ira mekutana ka rongo ira tempo ira manjili ri sapo ira mboto. Sabana daꞌa masipato besi-besi motesa mompakagado podade ntopomparasaya.
36 Iwenumo? Daꞌa nasituju komi ante atura-atura etu? Toramo! Tesa nu Alatala daꞌa nopuꞌu nggari jaꞌi komi! Pade daꞌa aga komi to nipatolele ka tesa etu!
37 Ane maria tau to mompekiri iꞌa sambaꞌa nabi to niwai ka pompakule mompasimbayu tesa nggari jaꞌi Alatala atau to niwai ka pompakule ntanina nggari jaꞌi Nosa Nagasa, kana ranjanina tesa-tesa to nitulisiku eꞌi parenta nggari jaꞌi Pue mboto.
38 Tapi ane iꞌa daꞌa madota mantarima tesaku eꞌi neꞌe komi mompariara tesana.