Nompotowe tau ntanina pokainggu to neliu mpuꞌu kabelona
13
Naupa aku mamala motesa mpengele-ngele basa manusia bo basa malaeka woꞌu, tapi ane aku daꞌa mompotowe tau ntanina, tesa-tesaku etu daꞌa ntoto ria gunana, aga nasimbayu ewa goo to naonina atau gimba to nagai onina.
2 Pade naupa aku mamala mompasimbayu tesa-tesa nggari jaꞌi Alatala, pade aku mamala mangginjani mpengele-ngele to nitabuniaka bo mangginjani mpengele-ngele pangginjani ntanina, pade pomparasayaku maroso mpuꞌu sampe aku mamala mompakau bulu molinja, tapi ane aku daꞌa mompotowe tau ntanina, katuwuku daꞌa ntoto ria gunana.
3 Pade naupa aku mombawai pura-pura mbara-mbaraku ka tau to nakasiasi, pade aku mombawai koroku mboto rapalabu, tapi ane aku daꞌa mompotowe tau ntanina, pura-pura pewaiku etu daꞌa ntoto ria gunana.
4 Tau to nompotowe roana nandate posabarana bo nabelo rarana. Iꞌa daꞌa nasiriati, iꞌa daꞌa nompakalanga korona bo daꞌa nasombo.
5 Iꞌa daꞌa nompowia to nompakaeya mata bo iꞌa daꞌa aga nangelo kabelo nu korona mboto. Iꞌa daꞌa nagampa nakedi rara bo iꞌa daꞌa nomboli kasala to nipowia ntau ri jaꞌina.
6 Iꞌa daꞌa nadamba-damba nanggita pokainggu ntau to nadenggona, tapi iꞌa nadamba-damba nanggita pokainggu ntau to nanoana.
7 Iꞌa bate-batena nantaha nantingayo mpengele-ngele to najadi. Iꞌa bate-batena nomparasaya roana, iꞌa bate-batena nanjarumaka pokainggu roana, pade iꞌa bate-batena nosabara riara mpengele-ngele.
8 Pepotowe daꞌa ria kaopuna. Ane pompakule mompasimbayu tesa nggari jaꞌi Alatala, etu kana malipo banepia. Pade pompakule motesa basa-basa to nopuꞌu nggari jaꞌi Nosa Nagasa bo pompakule mangginjani to nitabuniaka kana malipo banepia.
9 Sabana pangginjanita danakura, pade pompakuleta nompasimbayu tesa-tesa nggari jaꞌi Alatala daꞌapa nagana.
10 Tapi tempo Alatala mompakagana mpengele-ngele banepia, pompakule-pompakule to danakura etu kana malipo.
11 Jonjona, tempo aku danangana aku notesa ewa sambaꞌa ngana, aku nombarasai ewa sambaꞌa ngana, aku nompekiri ewa sambaꞌa ngana. Tapi tempo aku nabetemo, inggu-inggu ngana etu nikabasakaku puramo.
12 Weꞌi-weꞌi kita nasimbayu ewa tau nanggita lenje to nagawu-gawu riara pompewayo. Tapi tempo banepia kita kana manggita ante manoto ewa tau mosinggita lenje. Weꞌi-weꞌi pangginjaniku danakura, tapi tempo banepia etu aku kana mangginjani pura-pura nuapa ante manoto nasimbayu ewa Alatala nangginjani pura-pura nuapa ewa koroku eꞌi.
13 Jadi naria tolungele to maroo sampe ri kasae-saena, etumo pomparasaya, panjarumaka bo towe. Pade nggari tolungele etu to neliu nggabetena etumo towe.