Pepatuduki ewa pompakule nggari jaꞌi Nosa Nagasa nu Alatala
12
Sampesuwu-sampesuwu, ane pompekutana komi ewa pompakule nggari jaꞌi Nosa Nagasa nu Alatala, iweꞌimo pesonoku: To nipodotaku ala komi mangginjani pepatuduki to nakonona ewa pompakule-pompakule etu.
2 Ninjani komi mbotomo tempo komi daꞌapa nomparasaya i Pue Yesus komi batena nikeni mepue ka pue-pue ntanina to daꞌa nasowa notesa.
3 Etu sampe aku manguli ka komi daꞌa ria tau to nikuasai Nosa Nagasa nu Alatala mamala manguli, “Nasurukawumo Yesus.” Pade iwetu woꞌu daꞌa ria tau mamala mompangaku, “Yesusmo Pueku,” ane iꞌa daꞌa nikuasai Nosa Nagasa nu Alatala.
4 Naria mpengele-ngele pompakule nggari Nosa Nagasa nu Alatala, tapi etu pura-pura nopuꞌu nggari jaꞌi Nosa Nagasa nu Alatala to sambaꞌa lau.
5 Naria mpengele-ngele bago mantulungi Pue ,tapi aga sambaꞌa lau Pue to nitulungi.
6 Pade naria mpengele-ngele baraka ri tatongo topomparasaya, tapi aga sambaꞌa lau Alatala to nombawai baraka etu ka pura-pura tau.
7 Kita pura-pura niwai ka pompakule nggari jaꞌi Nosa Nagasa nu Alatala ala manggeni belo ka tau ntanina.
8 Naria tau to niwai Nosa Nagasa ka pompakule mompasimbayu noto nggari jaꞌi Pue. Tau ntanina niwai Nosa Nagasa etu ka pompakule mompasimbayu pangginjani to niratana nggari jaꞌi Pue.
9 Tau ntanina niwai Nosa Nagasa ka pompakule momparasaya neliu nggari biasa. Pade tau ntanina niwai Nosa Nagasa ka baraka mompakabelo juꞌa-juꞌa ntau. Pade etu pura-pura nggari jaꞌi Nosa Nagasa to nasimbayu.
10 Pade tau ntanina niwai ka pompakule mowia kabaraka. Tau ntanina niwai ka pompakule mompasimbayu tesa nggari jaꞌi Pue, pade tau ntanina niwai ka pompakule mompoposisala nuapa to nopuꞌu nggari Nosa Nagasa nu Alatala ante nuapa to nopuꞌu nggari kuasa-kuasa ntanina. Pade tau ntanina niwai ka pompakule notesa basa-basa to nopuꞌu nggari jaꞌi Nosa Nagasa nu Alatala. Pade to sambaꞌana niwai ka pompakule mompakanoto batuana tesa-tesa nggari basa-basa etu.
11 Pompakule etu pura-pura nggari kuasa Nosa Nagasa nu Alatala to sambaꞌa lau. Butu-butu mbaꞌa nipalele ka pompakule to natantuna nantuki dota Nosa Nagasa nu Alatala etu.
Topomparasaya Kristus nirapaka ewa saongu koro to nadea sipana
12 Koro batata saongu lau naupa nadea sipana. Tapi naupa nadea sipa nu koro etu, ira bate-batena saongu koro. Iwetu woꞌu kita topomparasaya Kristus to nirapaka ewa saongu koro. Naupa kita nadea, kita bate-batena nosaongu.
13 Kita pura-pura nidiu Nosa Nagasa to sambaꞌa lau ala majadi saongu koro, nabeloka tau-tau to Yahudi, nabeloka tau-tau daꞌa to Yahudi, nabeloka batua-batua, nabeloka tau daꞌa batua. Kita pura-pura nipesua Nosa Nagasa to sambaꞌa lau.
14 Koro batata daꞌa aga saongu lau sipana tapi nadea.
15 Ane rapana kadata manguli, “Aku eꞌi daꞌa sipa nu koro sabana aku daꞌa pale,” natantumo etu daꞌa nakono. Kada etu batena sipa nu korota.
16 Pade ane rapana talingata manguli, “Aku eꞌi daꞌa sipa nu koro sabana aku daꞌa mata,” natantumo etu daꞌa woꞌu nakono. Talinga etu batena sipa nu korota.
17 Ane rapana pura-pura korota majadi mata, iwenumo kita meepe? Pade ane rapana pura-pura korota majadi talinga, iwenumo kita meenga?
18 Tapi kakonona Alatala nompakatantu butu-butu sipa nu koro ri petoꞌo to masipatona nantuki dotana mboto.
19 Ane rapana aga saongu lau sipa nu koro, natantumo daꞌa ntoto ria koro bata.
20 Kakonona nadeamo sipa ri korota, tapi pura-pura sipa etu batena saongu koro.
21 Jadi mata daꞌa mamala manguli ka pale, “Aku daꞌa nomparaluu iko.” Pade iwetu woꞌu balengga daꞌa mamala manguli ka kada, “Aku daꞌa nomparaluu iko.”
22 Tapi sipa-sipa nu koro to nireke nalente, kakonona to neliu nggapokona.
23 Pade sipa to nireke daꞌa nibila, sipa etumo to neliu nibilata. Pade sipa to daꞌa nagaya nikita, sipa etumo to nipariara ntaꞌita mpakabelo-belo.
24 Tapi sipa to nagayana daꞌa paraluu rapariara ntaꞌita iwetu. Alatala mboto nompowia pura-pura korota sampe sipa-sipa to nireke daꞌa nibila niwai neliu nggadea pebila
25 ala korota neꞌe matibagi-bagi. Butu-butu sipa kana mompekiri kabelo nu sipa-sipa ntanina.
26 Ane saongu sipa nandasa, pura-pura sipa nu koro etu woꞌu nandasa. Ane saongu sipa nibila, pura-pura sipa nu koro woꞌu nibila.
27 Komi pura-pura ewa koro Kristus pade komi sambaꞌa bo sambaꞌa ewa sipa nu korona.
28 Pade ri tatongo todea topomparasaya, Alatala nangonggotaka tau-tau mantui mpengele-ngele bago. Pamulana naria tau-tau nionggotakana majadi surona. Pade karongelena naria tau-tau nionggotakana majadi nabi to nompasimbayu tesa nu Alatala. Katolungelena naria tau-tau to nionggotakana majadi guru. Pade naria woꞌu to niwaina ka pompakule mowia kabaraka. Naria to niwaina ka pompakule mompakabelo juꞌa-juꞌa ntau. Naria to niwaina ka pompakule mantulungi tau-tau ntanina, naria to niwaina ka pompakule manggeniaka todea, pade naria to niwaina ka pompakule motesa basa-basa to nopuꞌu nggari jaꞌi Nosa Nagasa.
29 Natantumo daꞌa pura-pura tau nionggotaka majadi suro! Daꞌa pura-pura tau nionggotaka majadi nabi. Daꞌa pura-pura tau nionggotaka majadi guru. Daꞌa pura-pura tau niwai ka pompakule mowia kabaraka.
30 Daꞌa pura-pura tau niwai ka pompakule mompakabelo juꞌa-juꞌa ntau. Daꞌa pura-pura tau niwai ka pompakule motesa basa-basa to nopuꞌu nggari jaꞌi Nosa Nagasa. Pade daꞌa pura-pura tau niwai ka pompakule mompakanoto batuana tesa-tesa nggari basa-basa etu.
31 Jadi komi kana mpuꞌu-mpuꞌu maria dota rara mombarata pompakule-pompakule to neliu mpuꞌu kagunana. Pade weꞌi-weꞌi aku kana mompopokita ka komi sangele to neliu mpuꞌu kabelona.