11
Jadi pasialamo pokaingguku nasimbayu ewa aku nompasiala pokainggu Kristus.
PEPATUDUKI EWA POKAINGGU TO MASIPATO RIARA MPODADE NTOPOMPARASAYA (11:2-14:40)
Pokainggu besi-besi riara mpodade
2 Sampesuwu-sampesuwu, aku nantoiya komi sabana komi batena nantora aku riara mpengele-ngele, pade komi naroo nantuki pepatuduki to nipatudukiku ka komi.
3 Tapi naria sangele paraluu ranjani komi iweꞌi: Kristusmo to najadi balengga nu butu mbaꞌa langgai, langgai to najadi balengga nu besi, pade Alatala to najadi balengga Kristus.
4 Jadi langgai to nosambaya atau nompasimbayu tesa nggari jaꞌi Alatala riara mpodade ante nombabungu balenggana, iꞌa daꞌa nombabila Kristus to najadi balenggana.
5 Pade besi to nosambaya atau nompasimbayu tesa nggari jaꞌi Alatala riara mpodade ante daꞌa nombabungu balenggana, iꞌa daꞌa nombabila rongona langgai to najadi balenggana. Daꞌa ria posisalana besi etu ante besi to nigau woꞌona.
6 Ane besi daꞌa madota mombabungu balenggana agina woꞌona ragunji sanggani. Tapi ane nireke sangele to nompakaeya mata ane woꞌona ragunji atau ragau iwetu, agina iꞌa mombabungu balenggana riara mpodade.
7 Daꞌa masipato langgai mombabungu balenggana tempo nosambaya atau nompasimbayu tesa nggari jaꞌi Alatala sabana iꞌa nipajadi nantuki lenje Alatala ala mompopokita kuasa bo kagaya nu Alatala mboto. Tapi besi nipajadi ala mompopokita kuasa bo kagaya nu rongona langgai.
8 Sabana langgai daꞌa nipajadi nggari besi, tapi besi nipajadi nggari langgai.
9 Pade iwetu woꞌu langgai daꞌa nipajadi Alatala ala mantulungi besi, tapi besi nipajadi Alatala ala mantulungi langgai.
10 Etu sampe besi masipato mombabungu balenggana ewa tandaina iꞌa nekou ri jaꞌi rongona langgai, sabana pokaingguna etu nikita malaeka-malaeka i Pue.
11 Tapi naupa iwetu toramo! Riara nggatuwuta ewa topomparasaya i Pue, besi paraluu langgai pade langgai paraluu besi.
12 Sabana naupa besi pamulana nipajadi nggari usu langgai, langgai-langgai kana niote nu besi. Tapi pura-pura to nipajadi etu nopuꞌu nggari jaꞌi Alatala.
13 Pekiri komi mbotomo. Masipato besi mosambaya ka Alatala riara mpodade ane balenggana daꞌa nibungu? Natantu daꞌa.
14 Nantuki kabiasa to naria ri jaꞌita mboto ninjanita ane langgai nandoe woꞌona etu sangele to nompakaeya.
15 Tapi ane besi nandoe woꞌona etu sangele to nompakagaya iꞌa. Sabana besi niwai woꞌo ewa sangele pombungu balenggana.
16 Ane maria tau to madota mosinggarau ewa pepatuduki eꞌi, aga sangele lau kutesa ka ira: Daꞌa ria kabiasa ntanina to nituki kami bo pura-pura todea topomparasaya Alatala.
Pokainggu to masipato ri posusa mantora kamate i Pue Yesus
17 Daꞌa namala aku mantoiya pokainggu komi ewa tewai to kuuli ri seꞌi. Sabana kasiromu komi topomparasaya daꞌa nanggeni belo ka komi, tapi aga nanggeni kajaꞌana.
18 To niepeku, tempo komi nasiromu naria komi natibagi-bagi. Pade niparasayaku sabagia nggari kareba to niepeku etu nakono.
19 Kakonona kana maria komi matibagi-bagi iwetu ala manoto isema nggari tatongo komi mpuꞌu-mpuꞌu topomparasaya to nakonona.
20 Tempo komi nasiromu nanggoni mpasanggani-nggani, pokainggu komi daꞌa masipato ka tau to nantuki posusa mantora kamate i Pue.
21 Sabana ri posusa etu komi aga nosimpago nanggoni panggoni komi mboto, komi daꞌa nompopea sampe pura-pura tau nombarata panggonina. Jadi naria tau to daꞌa nombarata panggoni nuapa-nuapa, pade naria ntanina nanginu sampe nakalangu.
22 Nokuya iwetu? Nokuya komi daꞌa manggoni bo manginu ntani ruru ri sapomu mboto? Nokuya komi nompakajaꞌa kasiromu todea topomparasaya Alatala? Nokuya komi nompakaeya tau daꞌa nompakule manggeni panggoni ri posusa etu? Iwenumo? Nuapa masipato kuuli ka komi? Masipato aku mombatoiya pokainggu komi etu? Natantu daꞌa ntoto masipato!
23 Pepatuduki ewa posusa mantora kamate i Pue nitarimaku nggari jaꞌi Pue mboto, pade etumo to nipatudukiku ka komi bopia. Etumo ri tempo nggawengina i Pue Yesus nipobalu ka balina, Iꞌa nangala roti,
24 pade niulina tarima kasi ka Alatala. Naopu etu nibingga-binggana roti etu ante nanguli, “Roti eꞌi koro bataku to niwai manjaliku komi. Kawiamo ada eꞌi ala mombatora Aku.”
25 Pade iwetu woꞌu naopu ira nanggoni nialana saongu sanggiri pade niulina, “Panginu eꞌi tandaina Pojanji Alatala to nabouna to rapakaasa ante leiku. Butu nggani komi manginu panginu ada eꞌi kawiamo etu ala mombatora Aku.”
26 Sabana butu nggani komi manggoni roti bo manginu panginu ada eꞌi komi mompatolele kamate i Pue sampe Iꞌa marata bali ri dunia eꞌi.
27 Sabana etu isema-sema to nanggoni roti atau nanginu panginu ante pokainggu to daꞌa masipato ri posusa mantora kamate i Pue, ira nompowia silaka ri jaꞌi Pue to nombawai koro bo leina manjaliku kita.
28 Jadi butu mbaꞌa tau kana momparesa korona mboto ntani ruru. Pade naopu etu iꞌa mamala manggoni roti bo manginu panginu ri posusa mantora kamate i Pue etu.
29 Sabana tau to manggoni roti bo manginu panginu etu ante daꞌa nantora koro i Pue natantumo kana rasuku Alatala.
30 Etu sampe nadeamo tau ri tatongo komi nalente bo najuꞌa, pade bara sakuya mbaꞌa nggari tatongo komi namatemo.
31 Tapi ane kita momparesa korota ntani ruru daꞌapa mantuki posusa mantora kamate i Pue kita daꞌa rapakawela pesuku.
32 Tapi ane rapana kita rapakawela pesuku Alatala ewa etu, patujuna ala kita rapatudukina ala neꞌe kita rasuku mpasanggani-nggani ante tau-tau ri dunia to daꞌa nomparasaya i Pue.
33 Jadi sampesuwu-sampesuwuku, ane komi masiromu manggoni ri posusa mantora kamate i Pue, komi kana mosipopea pura pade manggoni mpasanggani-nggani.
34 Ane maria tau naoro taꞌina, agina iꞌa manggoni ri sapona mboto ntani ruru, ala neꞌe sampe komi mawela pesuku Alatala sabana pokainggu komi daꞌa nabelo tempo komi masiromu mpasanggani-nggani. Pade ane aku momai ri jaꞌi komi aku kana mompakasiayu nuapa-nuapa ntanina to daꞌapa nasiayu.