SURA PAULUS KA TOPOMPARASAYA RI NGATA
ROMA
Tesa nompakanoto isi sura
Tempo nggaolu ngata Roma saongu ngata to nabete mpuꞌu sangana sabana ri setumo petoꞌo Magau Roma to nombakuasai nadea mpuꞌu ngata ntanina ri dunia. Paulus nantulisi surana eꞌi ka topomparasaya ri ngata Roma ala mompatuduki ka ira pepatuduki to napokona agama Karistee, sabana daꞌapa ria logana malau mpaka ri setu mompatuduki ira.
Isi sura i Paulus to napokona iweꞌi: Kita kana rareke manoa riara mpanggita Alatala ane kita momparasaya i Pue Yesus, daꞌa ria jala ntanina.
Paulus woꞌu nompatuduki iweꞌi: Pura-pura manusia nasala riara mpanggita Alatala pade masipato rasuku (3:10-12). Daꞌa namala kita majadi manoa riara mpanggitana ante mantuki Atura-atura agama to nipapola i Musa sabana daꞌa ria kamba sambaꞌa tau nompakule mantuki Atura-atura etu (3:27-28; 4:15). Alatala nantolo silaka manusia ante kamate Yesus Kristus (3:25-26; 5:8). Iꞌa nompakasalama kita pade kita nireke tau nanoa riara mpanggitana ane kita momparasaya i Pue Yesus (3:22, 26; 4:24-25; 5:1). Pade ante momparasaya i Pue Yesus kita nikabasaka nggari kuasa silaka sampe kita mompakule mompowia to nompakadamba rara Alatala (Pasal 6-8).
Paulus woꞌu nantulisi ewa patuju Alatala ka tau-tau to Yahudi, to niuli woꞌu muli Israel (Pasal 9-11). Nadea tau to Karistee nggaolu naingu sabana nipekiri ira ewa Alatala nantajiaka tau-tau to Yahudi to nipelisina nggaolu. Paulus nompakanoto sabagia bete tau to Yahudi daꞌapa nipakasalama tempo etu sabana ira daꞌa nadota momparasaya i Pue Yesus (10:1-4). Pade niulina nggari silaka ira nompoara Yesus iwetu jala nibuka ka tau-tau daꞌa to Yahudi mantarima belo nggari jaꞌi Alatala (11:11-18, 30-31). Kajadia etu niboto mamimo nggaolu ri buku nabi-nabi (9:25-29; 10:19-21). Patuju Alatala ala kaopuna “pura-pura tau to Yahudi kana rapakasalama” (11:26).
Isi sura to napokona iweꞌi:
1. Balengga nu sura pade nia i Paulus malau mantalioda topomparasaya ri ngata Roma (1:1-15)
2. Pepatuduki sura to napokona: Jala manusia majadi manoa riara mpanggita Alatala (1:16-17)
3. BAGIA PAMULANA: Pura-pura manusia nasala riara mpanggita Alatala (1:18-3:20)
4. BAGIA KARONGUNA: Iwenu sampe manusia mamala majadi manoa riara mpanggita Alatala (3:21-5:21)
5. BAGIA KATOLUONGUNA: Kita nikabasaka nggari kuasa silaka sabana kita nosaongu rara ante Yesus Kristus (pasal 6-8)
6. BAGIA KAAMPANA: Tau-tau to Israel ante Kareba Belo (pasal 9-11)
7. BAGIA KAALIMANA: Pokainggu to masipato ka topomparasaya i Pue Yesus (12:1-15:13)
8. Tesa kaopuna bo petabe (15:14-16:27)