SURA PAULUS PAMULANA KA TOPOMPARASAYA RI NGATA
KORINTUS
Tesa nompakanoto isi sura
Ngata Korintus saongu ngata bete ri Propinsi Akhaya to nesua Poparenta Magau Roma. Paulus netoꞌo ri Korintus sampae santongo ala mompatolele Kareba Belo sampe naria to Korintus to nomparasaya i Pue Yesus (Suro-suro 18:1-11). Tempo i Paulus nalai nggari Korintus naratamo sambaꞌa topomparasaya i Pue Yesus to nataꞌu nompatuduki Tesa nu Alatala, sangana Apolos (Suro-suro 18:24-19:1). Iꞌa nompatuduki pade nantulungi topomparasaya ri ngata Korintus.
Tempo i Paulus ri ngata Efesus iꞌa nantulisi sura eꞌi ka topomparasaya ri ngata Korintus. Naria tolungele sabana sampe iꞌa nantulisi sura eꞌi ka ira: 1) Nitarimana sura nggari jaꞌi ira nompekutana iꞌa ewa bara sakuya ngele. 2) Niepena kareba nggari jaꞌi ntau to narata nggari ngata Korintus to nanguli naria posinggarau bo silaka ri tatongo topomparasaya ri ngata Korintus. 3) Naria guru-guru topodawa to narata ri ngata Korintus to nangewa i Paulus ante nanguli iꞌa daꞌa sambaꞌa suro i Pue Yesus. Jadi i Paulus nantulisi surana eꞌi ala mombasono pompekutana ira pade ala mompadutuki ira mompalasi inggu-inggu to daꞌa masipato ka topomparasaya i Pue Yesus.
Isi sura to napokona iweꞌi:
1. Petabe bo posukuru i Paulus ka i Pue (1:1-9)
2. Tesa i Paulus ewa posinggarau bo silaka ri tatongo topomparasaya ri Korintus (1:10-6:20)
3. Pepatuduki i Paulus ewa toporongo bo tau daꞌapa norongo (7:1-40)
4. Pepatuduki i Paulus ewa panggoni to nipakoni ka pue-pue ntanina (8:1-11:1)
5. Pepatuduki i Paulus ewa pokainggu to masipato riara mpodade ntopomparasaya (11:2-14:40)
Pokainggu besi-besi to masipato riara mpodade (11:2-16)
Pepatuduki ewa posusa mombatora kamate i Pue Yesus (11:17-34)
Pepatuduki ewa pompakule nggari jaꞌi Nosa Nagasa nu Alatala (12:1-14:40)
6. Pepatuduki ewa tau namate rapakatuwu bali (15:1-58)
7. Tesa kaopuna (16:1-24)