SURA PAULUS PAMULANA KA TOPOMPARASAYA RI NGATA
KORINTUS
Petabe
1
Sura eꞌi nggari jaꞌiku i Paulus to nipelisi najadi suro Yesus Kristus nantuki dota Alatala mboto, pade nggari jaꞌi sampesuwuta i Sostenes,
2 ka todea topomparasaya Alatala to naria ri ngata Korintus. Komi nipakagasa sabana nosaongu rara ante Yesus Kristus. Pade komi nipokio matuwu ante pokainggu to nagasa mosanggani-nggani ante pura-pura tau ri njumaongu dunia to nekakai ka sanga Pueta Yesus Kristus. Iꞌa Pue ira bo Pueta woꞌu.
3 Perapi Umata Pue Alatala bo Pue Yesus Kristus mombagane bo mombawai katuwua mabelo ka komi.
Paulus nanguli tarima kasi ka Alatala
4 Aku daꞌa nenonto nanguli tarima kasi ka Alatala ewa katuwu komi, sabana towe belona niwai ka komi to nosaongu rara ante Yesus Kristus.
5 Riara mpengele-ngele katuwu komi nipakasugi sabana komi nosaongu rara ante Yesus Kristus. Komi niwai ka pompakule motesa ante napande bo komi niwai ka mpengele-ngele pangginjani to nabelona.
6 Kareba ewa Kristus to nipatolele ka komi nipakanoto kakonona riara nggatuwu komi.
7 Jadi weꞌi-weꞌi daꞌa ntoto nakura pompakule nggari jaꞌi Nosa Nagasa ri jaꞌi komi tempo komi mompopea karata Pueta Yesus Kristus bali ri dunia.
8 Iꞌa kana mompakaroso komi sampe ri kaopuna sampe komi daꞌa mamala rapakasala tempo Pueta Yesus Kristus marata bali ri dunia.
9 Alatala namala raparasaya mompowia etu. Iꞌamo to nompokio komi majadi saongu rara ante Anana Yesus Kristus, Pueta pura-pura.
TESA PAULUS EWA POSINGGARAU BO SILAKA RI TATONGO TOPOMPARASAYA (1:10-6:20)
Topomparasaya ri ngata Korintus natibagi mboto
10 Sampesuwu-sampesuwu, aku merapi ka komi riara sanga Pueta Yesus Kristus ala komi masintuwu bo mosaongu rara. Neꞌe sampe magero sintuwu komi, tapi komi kana masintuwu mosaongu rara bo pekiri sambaꞌa bo sambaꞌa.
11 Niuliku iwetu sabana naria ira nggari sapo i Kloe notesa ka aku naria posinggarau ri tatongo komi.
12 To nipatujuku iweꞌi: Ri tatongo komi naria to nanguli, “Aku eꞌi topantuki i Paulus,” pade naria sanupa to nanguli, “Aku eꞌi topantuki Apolos,” a pade naria ntanina nanguli, “Aku eꞌi topantuki i Petrus,” b pade naria ntanina nanguli, “Aku eꞌi topantuki Kristus.”
13 Toramo! Kristus daꞌa natibagi-bagi! Paulus daꞌa nipaku ri kayu parika manjaliku sala komi! Komi daꞌa nidiu ewa tandaina komi najadi topantuki i Paulus!
14 Aku nosukuru sabana daꞌa ria ntanina nggari tatongo komi to nidiuku, aga i Krispus bo i Gayus.
15 Neꞌe sampe maria to manguli iꞌa nidiu ewa tandaina iꞌa najadi topantuki aku!
16 (O, nitoraku, ira i Stefanus saongu njapo woꞌu nidiuku. Tapi ntanina nggari ira etu daꞌa nitoraku ane naria to nidiuku.)
17 Aku daꞌa nipakau Kristus mombadiu tau tapi ala mompatolele Kareba Belo. Pade tempo aku nompatolele Kareba etu aku daꞌa notesa nantuki noto nggari jaꞌi manusia ala neꞌe sampe tau aga nanjarumaka kataꞌuku notesa. Ane iwetu, kamate Kristus ri kayu parika daꞌa ria gunana.
Kareba Belo neliu nggakuasa nggari noto manusia
18 Kareba Belo ewa kamate Kristus ri kayu parika nireke ntau to daꞌa nipakasalama sangele tesa ntodoyo. Tapi ane kita to nipakasalama, kareba etu nireketa kuasa nu Alatala mboto.
19 Riara Buku Nagasa naria Tesa nu Alatala to nanguli iweꞌi:
“Aku kana mompakaropu noto ntau to nanotona,
pade kapande ntau to napandena kana kupakalipo.” (Yes. 29:14)
20 Jadi nuapa gunana tau-tau to nanoto? Nuapa gunana tau-tau to napande? Nuapa gunana tau-tau to napande nosisono ri dunia eꞌi? Pura-pura noto manusia ri dunia eꞌi nipakanoto Alatala aga sangele to daꞌa ria gunana.
21 Sabana manusia daꞌa namala mosinjani ante Alatala ane aga manjarumaka notona mboto. Tapi nggari kabelo rara nu Alatala Iꞌa madota mompakasalama isema-sema to nomparasaya Kareba Belo. Tapi Kareba etu aga nireke tau-tau ri dunia eꞌi sangele tesa ntodoyo.
22 Tau-tau to Yahudi madota manggita tandai to nipogumaa ala mantakono Kareba to nipatolele. Pade tau-tau to Yunani aga mangelo noto nggari dunia eꞌi.
23 Tapi kami nompatolele Kareba Kristus to namate nipaku ri kayu parika. Kareba etu nompakajuꞌa rara tau-tau to Yahudi, pade nireke tau-tau to Yunani sangele tesa ntodoyo.
24 Tapi ka tau-tau to nipokio Alatala majadi todeana kareba Kristus etu nompakanoto iwenu Alatala nompopokita kuasa bo notona ka manusia, nabeloka tau-tau to Yahudi, nabeloka tau-tau to Yunani.
25 Sabana powia Alatala to nireke manusia nadoyo neliu nggabelo nggari noto manusia. Pade powia Alatala to nireke manusia nalente neliu nggaroso nggari karoso manusia.
26 Sampesuwu-sampesuwu, toramo iwenu katuwu komi bopia tempo Alatala nompokio komi majadi todeana. Sakedi lau nggari tatongo komi to nanoto riara mpanggita dunia. Sakedi lau komi to nakuasa bo nalanga katuwuna.
27 Tapi to nireke nadoyo riara mpanggita manusia ri dunia nipelisi Alatala ala mompakaeya tau-tau to nanotona. To nireke nalente riara mpanggita manusia ri dunia nipelisina ala mompakaeya tau-tau to narosona.
28 To daꞌa ria gunana, to nisalai pade to nireke daꞌa ntoto ria batuana riara mpanggita manusia nipelisi Alatala ala mompakanoto nuapa to nitoiya manusia ri dunia eꞌi daꞌa ria gunana.
29 Patujuna ala neꞌe maria manusia to mamala mombatoiya korona mboto ri ngayo Alatala.
30 Nggari Alatala mbotomo kita najadi saongu rara ante Yesus Kristus. Pade nggari Kristus kita nangginjani noto nggari jaꞌi Alatala. Iꞌamo to nompakanoa kita riara mpanggita Alatala sampe kita najadi bagia nu Alatala to nagasana. Pade Iꞌamo to nantolo silakata.
31 Jadi ewa to nitulisi riara Buku Nagasa, “Isema-sema madota mombatoiya sangele iꞌa kana mombatoiya nuapa to nipowia i Pue.” c