Paulus nompatolele Kareba Belo ante kuasa nggari jaꞌi Alatala
2
Sampesuwu-sampesuwu, tempo aku narata ri jaꞌi komi nanggeni Kareba Belo nggari jaꞌi Alatala, aku daꞌa notesa ante tesa-tesa to nalanga bo nagayana, aku daꞌa notesa nantuki noto nggari jaꞌi manusia ri dunia.
2 Sabana nipakatantukumo neꞌe motesa sangele ntanina nggari tesa Yesus Kristus bo kamatena ri kayu parika.
3 Tempo aku narata ri tatongo komi nalentemo raraku pade aku nolalete ante naeka rara.
4 Tempo aku nompatolele Kareba Belo ka komi aku daꞌa nompasimbuku manggeni komi momparasaya ante nompake tesa-tesa to nopuꞌu nggari noto manusia. Tapi aku nompatolele kareba etu ka komi ante nompopokita ka komi kuasa nggari jaꞌi Nosa Nagasa nu Alatala.
5 Patujuku nowia iwetu ala pomparasaya komi neꞌe aga nopuꞌu nggari noto manusia tapi nopuꞌu nggari kuasa nu Alatala mboto.
Noto to nakonona nggari jaꞌi Alatala
6 Naupa iwetu kami nompasimbayu noto ka topomparasaya to naroso pomparasayana. Noto etu daꞌa noto nggari dunia eꞌi atau nggari jaꞌi topanggeniaka-topanggeniaka dunia to najaꞌa eꞌi to rapakalipo kuasana banepia.
7 Tapi noto to nipatolele kami noto nggari jaꞌi Alatala to nitabuniakana nggari dunia eꞌi. Daꞌapa dunia nipajadi, Alatala nonia mompopanjani notona etu ka kita weꞌi-weꞌi, ala kita mamala mombarata bagia riara kuasa bo kagayana to nipogumaa.
8 Daꞌa ria sambaꞌa nggari tatongo topanggeniaka-topanggeniaka dunia to najaꞌa eꞌi to nangginjani noto Alatala etu. Sabana ane rapana noto etu ninjani ira, natantumo ira daꞌa nombapaku i Pue to nakuasa ri kayu parika.
9 Tapi ewa to nitulisi riara Buku Nagasa iweꞌi:
“Nuapa to daꞌa ria sanggani nikita manusia,
nuapa to daꞌa ria sanggani niepe ntalinga ira,
bo nuapa to daꞌa ria sanggani nesua ri pekiri manusia
etumo to nipakasadia Alatala ka tau-tau to nompotowe Iꞌa.” (Yes. 64:4)
10 Tapi etumo to nipakanoto Alatala ka kita nggari Nosana to Nagasa. Sabana Nosa Nagasa nu Alatala nangginjani mpengele-ngele sampe narata ri nia nu Alatala to natetabuniaka.
11 To nangginjani pompekiri sambaꞌa manusia aga tau etu mboto. Iwetu woꞌu to nangginjani pompekiri nu Alatala aga Nosa Nagasana mboto.
12 Kita daꞌa niwai ka noto nggari dunia eꞌi, tapi kita niwai ka Nosa Nagasa nggari jaꞌi Alatala mboto ala kita mamala mangginjani nuapa-nuapa to niwai Alatala ka kita ante najoi rarana.
13 Jadi etu woꞌumo to nipatolele kami. Kami daꞌa nompatolele tesa etu ante tesa-tesa nggari noto manusia, tapi ante tesa-tesa to nipatuduki Nosa Nagasa nu Alatala mboto. Kami nompakanoto pepatuduki to nakonona nggari jaꞌi Nosa Nagasa nu Alatala ka tau-tau to nipesua Nosa Nagasana etu.
14 Tau-tau to daꞌa nipesua Nosa Nagasa nu Alatala daꞌa nantarima pepatuduki nggari jaꞌi Nosa Nagasa, sabana pepatuduki etu nirekena aga sangele tesa ntodoyo. Iꞌa daꞌa namala mangginjani pepatuduki etu sabana pepatuduki etu aga namala ranjani ntau ante pekeniaka Nosa Nagasa nu Alatala.
15 Tapi tau to nipesua Nosa Nagasa nu Alatala naria notona sampe iꞌa namala nompoposisala nuapa to nakono bo nuapa to nasala. Tapi iꞌa daꞌa namala rapakasala tau-tau to daꞌa nipesua Nosa Nagasa nu Alatala.
16 Ewa to nitulisi riara Buku Nagasa iweꞌi:
“Daꞌa ria sambaꞌa to nangginjani pekiri i Pue
sampe iꞌa namala mompatuduki Iꞌa.” (Yes. 40:13)
Tapi kita topomparasaya, pekirita nasimbayu ante pekiri Kristus!