Pepatuduki Paulus ewa posinggarau ri tatongo ntopomparasaya
3
Sampesuwu-sampesuwu, tempo aku naria ri tatongo komi aku daꞌa namala notesa ka komi nasimbayu ewa aku notesa ka tau-tau to nipesua Nosa Nagasa nu Alatala. Tapi aku aga notesa ka komi ewa tau-tau to natuwu nantuki dota rara manusia. Aku aga notesa ka komi ewa komi danangana riara pomparasaya komi ka Kristus.
2 Aku aga nombawai ka komi panggoni ngana nggedi, daꞌa panggoni to nakoꞌona, sabana komi daꞌapa nompakule manggoni panggoni to nakoꞌona. Pade kakonona sampe weꞌi-weꞌi komi batena daꞌapa nompakule manggoni etu.
3 Komi danatuwu nantuki dota rara manusia. Sabana naria nggari tatongo komi to nasiriati bo nosinggarau. Natantumo pokainggu ewa etu nompopokita komi danatuwu nantuki dota rara manusia. Komi danatuwu ewa tau-tau to daꞌa nosinjani ante Alatala.
4 Nanotomo etu sabana naria nggari tatongo komi to nanguli, “Aku eꞌi topantuki i Paulus,” pade naria sanupa nanguli, “Aku eꞌi topantuki Apolos.” a Pokainggumu etu nompakanoto komi danatuwu ewa tau-tau to daꞌa nosinjani ante Alatala.
5 Pekirimo! Isema Apolos? Bo isema i Paulus? Natantu kami aga batua-batua Alatala to nanggeni komi nomparasaya i Pue Yesus. Kami aga batua to nantui bago to niwai Pue ka kami.
6 Aku eꞌi notuja pade Apolos nombajunju. Tapi Alatalamo to mompakatuwu tuja-tuja.
7 Jadi to masipato rabila daꞌa topotuja bara topojunju, tapi Alatala. Iꞌamo to mompakatuwu tuja-tuja.
8 Kakonona topotuja bo topojunju nosaongu patuju, pade ira mbau nantarima tambona nantuki bago to nipowia ira.
9 Sabana kami bo Apolos roa sampokarajaa ante Alatala, pade komimo to najadi ewa tinalu Alatala.
Komimo to najadi ewa sapo nu Alatala.
10 Nggari towe belo Alatala aku eꞌi najadi ewa sambaꞌa topowia sapo to napandena. Ante noto nggari jaꞌi Alatala aku nompowia pondasi sapo, pade tau ntanina nombabangu sapo ri bunggu nu pondasi etu. Tapi ira kana mombabangu sapo etu mpakabelo-belo.
11 Sabana daꞌa ria tau to mamala mompowia pondasi ntani nggari pondasi to nipowiamo, etumo Yesus Kristus.
12 Naria to nombabangu sapo ri bunggu mpondasi etu ante bulawa, naria to nombabangu ante salaka, naria ntanina to nombabangu ante watu to nasulina, pade naria to nombabangu ante kayu, jono bo kada mpae.
13 Tapi pokarajaa ira sambaꞌa bo sambaꞌa kana rapakanoto kabelona banepia. Sabana tempo i Pue Yesus marata bali ri dunia pokarajaa ira etu kana rapakanoto. Pokarajaa ira etu kana rauji ante apu ala manoto iwenu kabelo nu pokarajaa etu.
14 Ane sapo to nipowia ntau ri bunggu mpondasi etu bate-batena maroo tempo niuji ante apu, topowia sapo kana mombarata tambona nggari jaꞌi Alatala.
15 Tapi ane sapo to nipowiana mapapu riara apu etu iꞌa kana marugi. Iꞌa mboto kana masalama, tapi ewa tau sakedika namate riara apu.
16 Iwenumo, sampesuwu-sampesuwu? Daꞌa nitora komi, komimo to najadi ewa Sapo nu Alatala pade Nosa Nagasana netoꞌo riara ntaꞌi komi pura-pura?
17 Isema-sema mombagero Sapo nu Alatala etu kana rasuku Alatala, sabana Sapo nu Alatala etu nagasa. Toramo! Komimo Sapo nu Alatala etu!
18 Neꞌe mombabagiu koromu mboto! Ane maria nggari tatongo komi to nompekiri korona nanoto riara mpanggita manusia, agina iꞌa menonto mompekiri ewa etu ala iꞌa mpuꞌu-mpuꞌu mamala majadi manoto riara mpanggita Alatala.
19 Sabana tau to nireke nanoto riara mpanggita manusia nabodo riara mpanggita Alatala. Ewa to nitulisi riara Buku Nagasa iweꞌi: “Alatala mompakanawu topande riara kapandena mboto.” b
20 Pade naria tesa ntanina to nanguli iweꞌi: “Pue nangginjani pompekiri tau-tau topande ri dunia daꞌa ria gunana.” c
21 Jadi ane iwetu, neꞌe mana mombatoiya topanggeniaka-topanggeniaka komi, sabana kakonona komi naopu niwai ka mpengele-ngele to niparaluu.
22 Paulus, Apolos bo i Petrus niwai Alatala ka komi majadi topantulungi komi. Niwaina ka komi katuwua to nabou, pade nikabasakana komi nggari kamatena. Nuapa-nuapa to naria riara dunia eꞌi, nuapa-nuapa to najadi weꞌi-weꞌi, pade nuapa-nuapa to majadi banepia nipakatantu Alatala manggeni belo ka komi. Mpengele-ngele etu bagia komi,
23 pade komi najadi bagia Kristus, pade Kristus bagia nu Alatala.