Pura-pura suro i Pue Yesus batua nu Alatala
4
Jadi Apolos ante aku kana rareke komi batua Kristus. Kami eꞌi wakelena to niparasaya ka tesa nggari jaꞌi Alatala to nitabuniaka nggaolu tapi to nipatolele weꞌi-weꞌi.
2 To napokona ante sambaꞌa wakele, iꞌa kana matutu mantuki dota nu madikana.
3 Ane aku eꞌi, daꞌa mokuya ane aku rapakasala komi atau tau ntanina. Tapi aku daꞌa nompakasala koroku mboto.
4 Daꞌa ninjaniku sangele riara nggatuwuku sampe aku masipato rapakasala. Tapi daꞌa etu to nompakatantu aku tau nanoa. Pue mbotomo to mompakatantu ane aku manoa bara daꞌa.
5 Jadi neꞌe komi masalisa mompakasala tau ane daꞌapa narata tempona. Popeamo sampe i Pue marata bali ri dunia. Iꞌamo to mompakanoto pura-pura nuapa to nikalendu nu rumau weꞌi-weꞌi. Iꞌamo to mompakanoto mpengele-ngele nia to naria riara ntaꞌi manusia. Ri tempo etumo Alatala kana mombatoiya butu-butu mbaꞌa to masipatona.
To Korintus masipato mompasiala pokainggu Paulus bo Apolos
6 Sampesuwu-sampesuwuku, to nitesaku ewa Apolos bo aku ri baꞌana nitesaku ala mantulungi komi. Patujuku ala nggari jonjo katuwu kami komi mamala meguru batuana tesa to nanguli, “Neꞌe pompekiri komi meliu nggari to nitulisi riara Buku Nagasa.” Patujuku ala komi neꞌe mombatoiya sambaꞌa nggari topanggeniaka komi pade mompakasala to santanina.
7 Komi daꞌa neliu nggari tau ntanina. Toramo! Pura-pura nuapa to naria ri jaꞌimu niwai ka komi. Jadi nokuya komi nompakalanga rara ante nanguli etu asele powiamu mboto?
8 Iwenumo? Nipekiri komi nagana puramo ri jaꞌi komi, nasugimo komi riara mpengele-ngele? Nipekiri komi aga komi noparenta ewa magau pade kami daꞌa? O, nabelo mpuꞌu ane komi mpuꞌu-mpuꞌu majadi magau ala kami woꞌu mamala moparenta mpasanggani-nggani ante komi!
9 Nantuki pombarataku kami suro-suro i Pue Yesus nipajadi Alatala to neliu nggandasa ri dunia. Kami nireke nasimbayu ewa tau nikeni nisuku mamate ri ngayo ntodea. Kami aga najadi panggoni mata pura-pura isi langi bo dunia, nabeloka manusia, nabeloka malaeka-malaeka i Pue.
10 Kami nireke tau nadoyo sabana kami nanggeni Tesa Kristus. Tapi nantuki pompekiri komi, komimo to nanoto sabana nosaongu rara ante Kristus! Kami nalente-lente tapi nantuki pompekiri komi, komimo to naroso! Kami nisalai ntau tapi nantuki pompekiri komi, komimo to nibila!
11 Sampe weꞌi-weꞌi kami naoro taꞌi bo nabai tambolo. Kami nopakea nte sanjia-njia, kami niboba pade daꞌa ria petoꞌo to nikaroo kami.
12 Kami nokarajaa ntomo ante pale kami mboto ewa batua ala mangelo katuwua. Ane kami nijanjiaka ntau kami nerapi rasi nggari jaꞌi Alatala ka tau etu. Ane kami nipandasa ntau kami bate-batena nosabara.
13 Ane kami niuli sinjaꞌi ntau kami nesono ante tesa to nalusuna. Kami nireke ewa rumpu-rumpu ri dunia eꞌi, kami nireke ewa rangu nu dunia sampe weꞌi-weꞌi.
14 Sampesuwu-sampesuwuku, tesa eꞌi kutulisi ka komi daꞌa ante patuju mompakaeya komi, tapi ala mompatuduki komi ewa ana-anaku to nipotoweku.
15 Sabana naupa naria nonjobu-njobu guru nompatuduki komi, tapi daꞌa nadea umamu. Sabana akumo to najadi ewa umamu riara Yesus Kristus ante nanggeni Kareba Belo ka komi.
16 Jadi etu sampe aku merapi ante mpuꞌu-mpuꞌu ka komi, pasialamo pokaingguku.
17 Etumo patujuku nompakau i Timotius malau mpaka ri jaꞌi komi. Iꞌa ewa anaku mboto to nipotoweku, sambaꞌa topomparasaya i Pue to namala raparasaya. Iꞌa kana mompopatora ka komi pokaingguku ewa topomparasaya Yesus Kristus nasimbayu ewa to nipatudukiku ka pura-pura topomparasaya i Pue Yesus ri umba-umba ngata.
18 Naria bara sakuya mbaꞌa tau ri tatongo komi to najadi nasombo, sabana ira nompekiri aku mana momai ri jaꞌi komi.
19 Tapi ane rapodota i Pue aku kana masalisa momai ri jaꞌi komi. Pade ane aku marata kana kukita mboto ane tau-tau nasombo etu mpuꞌu-mpuꞌu nakuasa atau aga nataꞌu notesa-tesa.
20 Sabana ane sambaꞌa tau najadi todea riara Poparenta nu Alatala, etu nanoto nikita nggari kuasa Alatala to naria riara nggatuwuna, daꞌa aga nggari tesa-tesana.
21 Jadi ane aku momai ri jaꞌi komi ri setu nuapa rapokono komi? Rapokono komi aku momai ri jaꞌi komi mompatuduki komi ante tesa-tesa to nakasara, atau marata mompatuduki komi ante towe bo rara to nalusuna?