Pepatuduki Paulus ewa tau nogau sala ante rongo nu umana mboto
5
Naria lele niepeku to nanguli naria sambaꞌa nggari tatongo komi to nogau sala ante rongo nu umana mboto. Nau ri tatongo ntau daꞌa nomparasaya Alatala daꞌa ntoto nirata pokainggu to najaꞌa ewa etu!
2 Tapi naupa iwetu komi aga nasombo-sombo nompekiri kajaꞌana etu. Kakonona komi masipato masusa mpuꞌu rara, pade masipato komi mompopalai tau to nompowia etu nggari tatongo komi.
3 Naupa aku daꞌa naria ri tatongo komi weꞌi-weꞌi nirasaiku ewa aku naria mamimo ri setu. Pade aku naopumo nompakatantu pesuku to masipato rapawela ka tau to nompowia kajaꞌana etu nasimbayu ewa aku naria ri tatongo komi ri setu.
4 Jadi ane komi masiromu mpasanggani-nggani riara sanga Pue Yesus, powiamo nasimbayu ewa aku woꞌu nosanggani-nggani ante komi. Ante kuasa nggari jaꞌi Pueta Yesus
5 komi kana mombawai tau etu riara mpale Magau nu Seta sampe dota rarana to najaꞌa rapakalipo a ala kaopuna iꞌa mamala rapakasalama tempo i Pue Yesus marata bali ri dunia.
6 Daꞌa masipato komi nasombo-sombo mompekiri kajaꞌa ntau etu. Natantu ninjani komimo sangele powia to najaꞌa namala mompakujaꞌa pura-pura todea nasimbayu ewa sakedi lau ragi namala mompopebombo pura-pura labu nu gando.
7 Jadi tajiakamo ragi to nasaena, etumo pokainggu nasilaka, ala komi majadi magasa nasimbayu ewa labu nu gando nabou to daꞌapa nawela ragi. Pade niparasayaku iwetu to najadi ante komi, sabana Kristus nipatesi manjaliku silakata. Iꞌa nasimbayu ewa ana bimba to nipatesi ri Posusa Paska nto Yahudi. b
8 Jadi ewa to nipowia tempo Posusa Paska, kamaimo kita mantajiaka ragi to nasae, etumo manggabasaka pokainggu to nasilaka bo najaꞌa. Pade kamaimo kita manggoni roti daꞌa nipowia ante ragi, etumo matuwu ante pokainggu to magasa bo manoa.
9 Riara suraku bopia nitulisiku neꞌe mosigalo ka tau nogau sala ante tau daꞌa rongona mboto.
10 Tau-tau to nipatujuku daꞌa tau ri dunia eꞌi to nogau sala, to daꞌa ria kabasa-basana mombarata untu ka korona mboto, to nebagiu, pade to nompakoni pue-pue ntanina. Daꞌa ira to nipatujuku, sabana ane iwetu komi kana malai nggari dunia eꞌi ala neꞌe mosigalo ka ira.
11 To nitulisiku ka komi etumo, neꞌe mosigalo ka tau to nompangaku korona topomparasaya i Pue tapi ira nogau sala ante tau daꞌa rongo ira mboto, ira daꞌa ria kabasa-basana mombarata untu ka korona mboto, ira nompakoni pue-pue ntanina, ira nanguli sinjaꞌi tau ntanina, ira topanginu, atau ira topebagiu. Neꞌe mosanggani ante tau to noinggu iwetu nau aga manggoni mpasanggani-nggani!
12-13 Daꞌa urusaku mombatangara tau-tau daꞌa topomparasaya. Ira kana ratangara Alatala. Tapi komi kana mombatangara tau-tau to nomparasaya. Jadi ewa to nitulisi riara Buku Nagasa, “Popalaimo tau najaꞌa nggari tatongo komi!” c