Neꞌe mompangadu roamu ri ngayo ntopotangara to daꞌa nomparasaya
6
Ane maria nggari tatongo komi to nosinggarau ante roana, nokuya iꞌa nabia manggeni roana etu ratangara ntau daꞌa nomparasaya Alatala? Nokuya iꞌa daꞌa nanggeni roana etu ratangara topomparasaya i Pue?
2 Iwenumo? Daꞌa ninjani komi topomparasaya i Pue kana mombatangara pura-pura isi langi bo dunia banepia? Jadi ane isi langi bo dunia kana ratangara komi, natantumo komi kana mompakule mombatangara parakara-parakara to nangaꞌana ri tatongo komi mboto!
3 Daꞌa ninjani komi kita topomparasaya kana mombatangara malaeka-malaeka i Pue? Jadi natantumo komi kana mompakule mombatangara parakara biasa riara nggatuwu komi eo-eo!
4 Jadi ane maria parakara biasa ewa etu nokuya komi nanggeni roamu ratangara tau-tau to daꞌa nomparasaya?
5 Aku nanguli tesa etu ala mompakaeya komi. Natantumo naria sambaꞌa nggari tatongo komi to nanoto sampe iꞌa mamala mombatangara parakara ri olo komi topomparasaya!
6 Tapi etu daꞌa najadi. Komi aga nanggeni roamu topomparasaya ratangara ntopotangara to daꞌa nomparasaya i Pue!
7 Posinggarau komi sambaꞌa bo sambaꞌa etu tandaina komi nidagimo sabana pokainggu komi etu daꞌa ntoto masipato ka topomparasaya. Kakonona nabelopa ane komi mompakamba koromu rapakajaꞌa ntau atau rabagiu ntau.
8 Tapi etu daꞌa nipowia komi! Komi mbotomo nompakajaꞌa bo nombabagiu roa-roamu topomparasaya!
9 Iwenumo? Daꞌa ninjani komi tau-tau to nadenggo rara daꞌa ntoto mamala mombarata bagia riara Poparenta nu Alatala? Neꞌe masalanjala! Tau-tau nogau sala ante tau daꞌa rongona mboto, tau-tau to nompakoni pue-pue ntanina, tau-tau nebualo, bo tau-tau nogau sala langgai mbau langgai besi mbau besi, ira pura-pura daꞌa ntoto mamala mombarata bagia riara Poparenta nu Alatala.
10 Waꞌa woꞌu ante topangangga, tau-tau daꞌa ria kabasa-basana mombarata untu ka korona mboto, tau-tau nanginu sampe malangu, tau-tau nanguli sinjaꞌi roana, bo topebagiu. Ira woꞌu daꞌa ntoto mamala mombarata bagia riara Poparenta nu Alatala.
11 Bopia bara sakuya mbaꞌa nggari tatongo komi noinggu iwetu woꞌu. Tapi silaka komi etu nitapasimo. Katuwu komi nipakagasamo, komi najadi tau nanoa riara mpanggita Alatala. Etu pura-pura najadi nggari pomparasayamu ka Pue Yesus Kristus bo nggari kuasa Nosa Nagasa nu Alatala.
Kita masipato matuwu ante pokainggu to mombabila Alatala
12 Bara naria to nanguli iweꞌi: “Pura-pura pokainggu nipaloga ka aku.” Tapi toramo, daꞌa pura-pura pokainggu nanggeni belo ka aku. “Pura-pura pokainggu nipaloga ka aku,” tapi aku daꞌa mompaloga sangele mombakuasai aku.
13 Naria woꞌu to nanguli iweꞌi: “Panggoni nipowia ala rakoni, pade taꞌita nipowia rapangisi panggoni.” Tapi toramo, Alatala kana mompakaropu panggoni bo taꞌita banepia. Korota daꞌa nipowia ala mogau sala ante tau daꞌa rongota mboto tapi ala mombabila i Pue. Pade Puemo to manggeniaka korota.
14 Ante kuasana mboto Alatala nompakatuwu bali i Pue Yesus nggari kamatena, pade iwetu woꞌu Iꞌa kana mompakatuwu bali kita nggari kamateta.
15 Daꞌa ninjani komi korota ewa sipa nu koro Kristus? Jadi masipato kita mompake korota to najadi ewa sipa nu koro Kristus ala mogau sala ante besi bajinga? Natantumo daꞌa ntoto masipato!
16 Daꞌa ninjani komi tau to nogau sala ante besi bajinga najadi saongu koro ante iꞌa? Sabana naria to nitulisi riara Buku Nagasa iweꞌi: “Ira rombaꞌa kana majadi sambaꞌa.” a
17 Tapi tau to najadi topomparasaya i Pue kana majadi saongu rara ante Iꞌa.
18 Neꞌe ntoto mogau sala ante tau daꞌa rongomu mboto. Sabana pura-pura silaka ntanina to nipowia manusia nompakajaꞌa tau ntanina. Tapi ane iꞌa mogau sala ante tau daꞌa rongona mboto iꞌa mompakajaꞌa korona mboto.
19 Iwenumo? Daꞌa ninjani komi koromu najadi ewa sapo mpepue to nipetoꞌo Nosa Nagasa nu Alatala? Iꞌa naria riara ntaꞌi komi. Iꞌa nipopanaꞌu Alatala ka komi. Jadi koromu daꞌa komi puena tapi Alatala puena.
20 Komi naopumo nitolo Alatala ante oli to nasulina. Sabana etu komi masipato matuwu ante pokainggu to mombabila Alatala.