PEPATUDUKI PAULUS EWA TOPORONGO BO TAU DAꞌAPA NORONGO (7:1-40)
Pepatuduki Paulus ewa toporongo
7
Weꞌi-weꞌi aku madota mombasono pompekutana-pompekutana to nitulisi komi riara sura. Ane sambaꞌa tau daꞌa norongo etu nabelo.
2 Tapi nantora pesoba-pesoba mogau sala, nabelopa ane butu mbaꞌa langgai bo butu mbaꞌa besi kana morongo.
3 Rongo langgai kana mantuki dota rongona besi mosampaturu, pade iwetu woꞌu rongo besi.
4 Sabana daꞌa rongo besi to nakuasa mompakatantu nuapa to rapowia ri korona mboto, tapi rongona langgai. Pade iwetu woꞌu daꞌa rongo langgai to nakuasa mompakatantu nuapa to rapowia ri korona mboto, tapi rongona besi.
5 Neꞌe mogaꞌa mosampaturu ane daꞌapa ria kasituju mpasanggani-nggani. Komi mamala mogaꞌa mosampaturu bara sakuya kasaena ane rongo langgai bo rongo besi mosituju ala mombarata loga mosambaya. Tapi ane maopumo tempo to nipakatantu etu, komi kana matingguli mosampaturu ala neꞌe komi rapesoba Magau nu Seta mogau sala sabana komi daꞌa mamala mantaꞌamaka dota nasumu.
6 Tesaku eꞌi ewa morongo bara daꞌa morongo daꞌa sangele parenta nggari jaꞌiku, tapi etu aga sangele pombarataku.
7 Kakonona to nipodotaku ala pura-pura tau mamala maloa nasimbayu ewa aku eꞌi. Tapi butu mbaꞌa tau niwai ka pompakulena mboto nggari jaꞌi Alatala. Naria to niwai ka pompakule matuwu maloa sampe mamate, tapi naria ntanina daꞌa niwai ka pompakule ewa etu.
8 Iweꞌimo pepatudukiku ka tau daꞌapa norongo pade ka besi-besi tobalu: Nabelopa ane ira matuwu maloa nasimbayu ewa aku.
9 Tapi ane ira daꞌa mamala mantaꞌamaka nasu ira, agina ira morongo. Sabana nabelopa morongo pade mandasa mantaꞌamaka nasu.
10 Iweꞌimo pepatudukiku ka tau-tau to norongomo. Pepatuduki eꞌi daꞌa nggari jaꞌiku mboto tapi nggari jaꞌi Pue. Rongo besi daꞌa mamala mogaꞌa ante rongona langgai.
11 Tapi ane rapana iꞌa mogaꞌa iꞌa kana maroo matuwu maloa atau matingguli bali ri jaꞌi rongona langgai. Pade sambaꞌa rongo langgai daꞌa mamala mombasompo rongona besi.
12 Pade iweꞌimo pepatudukiku ka tau-tau ntanina. Pepatuduki eꞌi nggari jaꞌiku mboto daꞌa parenta nggari jaꞌi Pue. Ane sambaꞌa topomparasaya norongomo ante besi daꞌa topomparasaya, pade rongona besi etu madota maroo matuwu mpasanggani-nggani, langgai etu daꞌa mamala mombasompo rongona besi etu.
13 Pade ane sambaꞌa topomparasaya besi niporongo langgai daꞌa topomparasaya, pade rongona langgai etu madota maroo matuwu mpasanggani-nggani ante iꞌa, besi etu daꞌa mamala mogaꞌa ante rongona langgai etu.
14 Sabana rongo langgai to daꞌapa nomparasaya i Pue nireke ewa bagia nu Alatala sabana nggari rongona besi etu to nomparasaya. Pade waꞌa woꞌu rongo besi to daꞌa nomparasaya nireke ewa bagia nu Alatala sabana nggari rongona langgai to nomparasaya. Ane daꞌa iwetu ana-ana ira kana rareke natantoru riara mpanggita Alatala nasimbayu ante ana-ana ntau daꞌa nomparasaya. Tapi ane ira maroo matuwu mpasanggani-nggani ana-ana ira kana rareke ewa bagia nu Alatala.
15 Tapi ane rongo langgai atau rongo besi to daꞌa nomparasaya madota mogaꞌa ante rongona topomparasaya, neꞌe ratagi ira mogaꞌa. Ane iwetu rongo langgai atau besi to nomparasaya daꞌa mana nisoko ada mporongo. Tapi toramo! Alatala madota ala komi matuwu mosinggabelo sambaꞌa bo sambaꞌa.
16 Sabana daꞌapa ninjani komi nuapa to majadi. Bara rongo besi to nomparasaya mamala manggeni rongona langgai rapakasalama. Bara rongo langgai to nomparasaya mamala manggeni rongona besi rapakasalama.
Katuwuta kana bate-batena ewa tempo kita nipokio Alatala
17 Butu mbaꞌa tau kana matuwu nantuki to nipakatantu i Pue ka iꞌa. Katuwuna kana bate-batena ewa tempo iꞌa nipokio Alatala majadi todeana. Etumo atura to nipatudukiku ka pura-pura topomparasaya.
18 Jonjona, ane sambaꞌa tau to Yahudi to nisuna tempo iꞌa nipokio Alatala majadi todeana, neꞌe iꞌa mompasimbuku mompakalipo tandai posuna etu. Iwetu woꞌu ane sambaꞌa tau daꞌapa nisuna tempo iꞌa nipokio Alatala majadi todeana, neꞌe iꞌa merapi rasuna.
19 Sabana mantuki ada mposuna atau daꞌa mantuki ada etu daꞌa napoko. To napokona etumo mantuki parenta-parenta nu Alatala.
20 Butu mbaꞌa tau katuwuna kana bate-batena ewa tempo iꞌa nipokio Alatala majadi todeana.
21 Ane komi najadi sambaꞌa batua tempo komi nipokio Alatala, neꞌe masusa-susa rara mompekiri etu. Tapi ane komi mombarata loga ala mana majadi tau nipobatua, pakemo loga etu.
22 Toramo! Sambaꞌa tau to najadi batua tempo iꞌa nipokio i Pue najadi ewa sambaꞌa tau daꞌa nipobatua sabana iꞌa nikabasaka i Pue nggari silakana. Pade sambaꞌa tau daꞌa nipobatua tempo iꞌa nipokio i Pue najadi ewa sambaꞌa batua sabana iꞌa nekou ri jaꞌi Kristus.
23 Toramo! Komi naopumo nitolo Alatala pade olina naopu nibayarina. Sabana etu neꞌe sampe komi rapobatua manusia.
24 Jadi sampesuwu-sampesuwu, butu mbaꞌa tau kana maroo mosanggani-nggani ante Alatala, katuwuna kana bate-batena ewa tempo iꞌa nipokio Alatala majadi todeana.
Pepatuduki Paulus ewa tau daꞌapa norongo
25 Ane pompekutana komi ewa tau daꞌapa norongo, a daꞌa ria parenta nggari jaꞌi Pue kupapola ka komi, tapi kutesa ka komi pombarataku mboto. Pade tesaku eꞌi masipato raparasaya komi sabana aku niwai noto nggari jaꞌi Pue.
26 Jadi iweꞌimo pombarataku: Nantora mpengele-ngele kasusa riara dunia to najadi weꞌi-weꞌi, nabelopa ane katuwu komi bate-batena ewa weꞌi-weꞌi.
27 Ane komi norongomo, neꞌe mangelo jala mogaꞌa ante rongomu. Ane komi daꞌapa norongo, neꞌe mana mangelo morongo.
28 Tapi ane rapana komi morongo, komi daꞌa masilaka. Pade ane sambaꞌa randoo raporongo iꞌa daꞌa masilaka. Tapi toramo, tau-tau to morongo kana mantingayo mpengele-ngele kasusa riara nggatuwu ira. Pade to nipodotaku ala komi neꞌe mawela kasusa etu.
29 Sampesuwu-sampesuwuku, patujuku iweꞌi: Tempota mana masaeka. Jadi mompamula weꞌi-weꞌi tau-tau to norongona neꞌe aga mompekiri rongona.
30 Pade tau-tau to nageo ante nasusa rara neꞌe aga mompekiri kasusa rarana. Tau-tau to nadamba neꞌe aga mompekiri kadamba nu rarana. Tau-tau to nodaga neꞌe aga mompekiri balu-baluna.
31 Pade tau-tau to nomparibaꞌa mbara-mbara dunia eꞌi neꞌe aga mompekiri mbara-mbara etu. Sabana dunia to ninjanita weꞌi-weꞌi mana masaeka malipo.
32 To nipodotaku ala komi matuwu ante daꞌa makini-kini rara. Tau daꞌapa norongo nompakasaungga pekirina ka bago i Pue. Iꞌa nompekiri iwenu iꞌa mamala mompakadamba rara i Pue.
33 Tapi tau to norongomo kana mompakasaungga pekirina ka mpengele-ngele ri dunia eꞌi. Iꞌa kana mompekiri iwenu iꞌa mamala mompakadamba rara rongona besi
34 sampe pekirina matibagi-bagi. Besi-besi to mana norongo bo randoo-randoo nompakasaungga pekiri ira ka i Pue. Ira nompekiri iwenu koro bo pekiri rara ntaꞌi ira mamala magasa riara mpanggita Alatala. Tapi besi-besi to norongomo kana mompekiri mpengele-ngele ri dunia eꞌi. Ira kana mompekiri iwenu mompakadamba rara rongona langgai.
35 Aku nantesa eꞌi ka komi ala mantulungi komi. Daꞌa patujuku ala mompandasa komi ante mpengele-ngele atura, tapi ala komi mowia to makono bo masipato riara mpanggita Alatala. Pade patujuku ala komi maroo mantuki i Pue ante pompekiri to daꞌa matibagi-bagi.
36 Ane maria langgai to nompekiri pokaingguna daꞌa mana masipato ri jaꞌi tingeana, pade iꞌa mana mamala mantaꞌamaka nasuna b sampe nirasaina ira kana morongo, agina iꞌa mompowia to nipodotana etu. Agina ira morongo, etu daꞌa silaka.
37 Tapi ane maria langgai to nompekiri nabelopa iꞌa daꞌa momporongo tingeana, pade ane katantuna etu nipowiana ante daꞌa nipasuꞌu ntau, pade ane iꞌa mamala mombakuasai nasuna, nabelopa ane iꞌa daꞌa morongo.
38 Jadi langgai to momporongo tingeana nompowia kabelona, tapi langgai to daꞌa morongo nompowia to neliu nggabelo.
39 Sambaꞌa besi to norongomo nisoko ada mporongo ane rongona langgai danatuwu. Tapi ane rongona langgai namatemo iꞌa mamala raporongo langgai ntanina to nipokonona. Tapi iꞌa kana raporongo langgai to nomparasaya i Pue.
40 Nantuki pombarataku, masanapa iꞌa ane daꞌa raporongo bali. Etu aga pombarataku mboto, tapi naupa iwetu tesa etu masipato raepe sabana aku eꞌi sambaꞌa tau to nikuasai Nosa Nagasa nu Alatala.