PEPATUDUKI EWA PANGGONI TO NIPAKONI KA PUE-PUE NTANINA (8:1-11:1)
Neꞌe mompakagero pomparasaya roamu ante manggoni panggoni to nipakoni ka pue-pue ntanina
8
Ane pompekutana komi ewa panggoni to nipakoni ka pue-pue ntanina, iweꞌimo pesonoku: Komi nanguli, “Kita pura-pura naria pangginjanita.” Nakonomo etu, tapi toramo, pangginjani nompakasombo tau tapi towe nompakaroso rara ntau.
2 Tau to nompekiri nariamo pangginjanina tapi iꞌa daꞌa nompotowe tau ntanina, kakonona daꞌapa nangginjani ante nanoto ewa to masipato ranjanina.
3 Tapi tau to nompotowe Alatala, iꞌamo to niposinjani Alatala.
4 Jadi ane mantesa panggoni to nipakoni ka pue-pue ntanina, ninjanitamo parantau-parantau to nipake tempo nompakoni pue-pue ntanina etu nombagambara sangele to daꞌa ria. Pade ninjanita woꞌu Alatala aga sambaꞌa lau, daꞌa ria ntanina.
5 Naria mamimo nadea ngele to nipesomba manusia to niuli ira pue bo karampua, nabeloka ri langi, nabeloka ri dunia. Tapi naupa iwetu to niparasaya tau ntanina,
6 ninjanita Alatala aga sambaꞌa lau. Iꞌamo Umata to nompajadi mpengele-ngele to naria ri langi bo dunia. Iꞌamo to najadi patuju katuwuta. Pade aga sambaꞌa lau Pueta, etumo Yesus Kristus. Nggari Iꞌamo sampe mpengele-ngele ri langi bo dunia nipajadi, pade nggari Iꞌamo sampe kita matuwu.
7 Tapi naupa iwetu, daꞌa pura-pura tau nangginjani etu. Naria topomparasaya to nabiasa nompakoni pue-pue ntanina daꞌapa ira nomparasaya Kristus. Jadi sampe weꞌi-weꞌi ane ira manggoni panggoni to nipakoni ka pue-pue ntanina, panggoni etu nireke ira mpuꞌu-mpuꞌu panggoni nu pue-pue etu. Ante nanggoni panggoni etu nirasai ira nasilaka sabana pomparasaya ira daꞌapa naroso.
8 Kakonona panggoni daꞌa manggeni kita mompakamosu Alatala. Ane kita daꞌa manggoni panggoni etu posinggamosuta ante Alatala daꞌa mantambai makura. Pade ane kita manggoni panggoni etu kita daꞌa mantambai mamosu ante Alatala.
9 Tapi sampesuwu-sampesuwu, pakabelo-belo ala neꞌe sampe tau-tau to nalente pomparasayana rapakagero pomparasayana sabana komi nomparasaya pura-pura panggoni namala rakoni.
10 Patujuku iweꞌi: Rapana komi to nangginjani pura-pura panggoni mamala rakoni malau manggoni ri sapo mpesomba nu pue-pue ntanina. Pade rapana maria sambaꞌa roamu topomparasaya to daꞌapa naroso pomparasayana manggita komi manggoni ri setu. Manggita etu natantumo iꞌa woꞌu kana mabia manggoni panggoni to nipesomba ka pue-pue ntanina etu.
11 Tapi ante iwetu roamu topomparasaya etu to nitolo ante lei Kristus kana rapakagero pomparasayana sabana “pangginjani” komi etu.
12 Pade ane komi mompowia silaka iwetu ri jaꞌi sampesuwumu ante mompakagero pomparasayana to nalentena, komi woꞌu mompowia silaka ri jaꞌi Kristus mboto.
13 Jadi sampesuwu-sampesuwu, ane panggoni to nikoniku mompakagero pomparasaya sampesuwuku, aku mana manggoni panggoni etu ala neꞌe aku mompakagero pomparasayana.