Jonjo nggari katuwu Paulus
9
Aku eꞌi tau daꞌa nipobatua tau ntanina. Aku eꞌi sambaꞌa suro i Pue Yesus. Aku mboto nanggita Pueta Yesus. Pade komi mbotomo asele nu bago to nipowiaku ka i Pue.
2 Naupa riara mpanggita tau ntanina aku daꞌa nireke sambaꞌa suro i Pue, natantumo riara mpanggita komi aku surona mami! Sabana nggari katuwu komi topomparasaya i Pue nanotomo aku eꞌi mpuꞌu-mpuꞌu sambaꞌa suro i Pue.
3 Ane maria tau mompakasala pokaingguku ewa sambaꞌa suro i Pue iweꞌimo pesonoku:
4-5 Kakonona aku masipato manggeni sambaꞌa rongo to nomparasaya mpasanggani-nggani riara mpolumakoku nasimbayu ewa to nipowia suro-suro i Pue ntanina bo sampesuwu-sampesuwu i Pue mboto bo i Petrus. Kakonona aku masipato mantarima panggoni bo panginu nggari jaꞌi ntodea topomparasaya.
6 Kakonona daꞌa aga aku bo i Barnabas to masipato mokarajaa ante pale mangelo katuwua kami mboto. Kami woꞌu masipato ratulungi todea topomparasaya.
7 Natantu daꞌa ria sambaꞌa tantara nombatanggu katuwuna mboto tempo nosibali. Katuwuna kana nitanggu balenggana. Topokarajaa tinalu to nipotuja anggurmo to masipato manggoni asele ntinaluna. Pade topoewu bimbamo to masipato manginu susu nggari bimbana.
8 Nuapa to nitesaku eꞌi daꞌa aga pompekiri manusia, tapi riara Atura-atura agama Yahudi woꞌu naria pepatuduki to nasimbayu.
9 Riara Atura-atura to nipapola i Musa etu naria nitulisi iweꞌi: “Neꞌe mombamumu sumba nu japi tempo mantulungi puena mombalonggo-longgo pae. Palambamo japi manggoni sakedi.” a Jadi iwenumo? Nantuki komi aga japi to nipariara Alatala?
10 Natantu kitamo to nipatujuna ante tesa etu! Tesa etu nitulisi ala mogambara sangele ka kita. Topopajeko bo topomporo nokarajaa ante panjarumaka mantarima sabagia nggari asele ntana to nikarajaa ira etu.
11 Iwetu woꞌu kami suro-suro i Pue Yesus to nombatuja Tesa nu Alatala riara ntaꞌi komi. Natantumo kami masipato manjarumaka petulungi sakedi nggari jaꞌi komi!
12 Ane guru-guru ntanina ri setu masipato manjarumaka petulungi nggari jaꞌi komi, neliu-liupa kami!
Tapi kami daꞌa sanggani nerapi petulungi etu. Kami aga nantaꞌamaka riara mpengele-ngele kasusa ala neꞌe mowia sangele to mombalawa tau mantarima Kareba Belo ewa Kristus.
13 Natantu ninjani komimo topanggeni-topanggeni agama to nokarajaa ri Sapo Mpepue nombarata panggoni ira nggari pesomba to nipesomba ka Alatala ri Sapo Mpepue etu. Ira to nantulungi todea manggeni pesomba ira ri meja mpesomba nombarata sabagia nggari panggoni to nipesomba etu.
14 Iwetu woꞌu Pue nompakatantu ala tau-tau to nanggeni Kareba Belo kana matuwu nggari petulungi tau-tau to nantarima Kareba Belo etu.
15 Naupa iwetu aku eꞌi daꞌa sanggani nerapi tulungi nggari jaꞌi komi. Pade patujuku nantulisi sura eꞌi ka komi daꞌa ala komi mompamula mombatanggu katuwuku. Nabelopa aku mamate pade aku mompakatomo komi mombatanggu katuwuku, sabana etumo kabiasaku to nitoiyaku.
16 Tempo aku nompatolele Kareba Belo daꞌa masipato aku mombatoiya koroku mboto sabana aku nisuro Alatala mowia etu. Mandasamo aku ane daꞌa mompatolele Kareba Belo!
17 Ane aku mompatolele Kareba etu nggari dotaku mboto, aku masipato mombarata tambo. Tapi aku daꞌa nompatolele Kareba Belo nggari dotaku mboto. Etu bago to niparasaya ka aku.
18 Jadi ane iwetu nuapa tamboku? Tamboku iweꞌi: Aku mamala mompatolele Kareba Belo ante daꞌa merapi gaji ka tau-tau to nipatolele ka Kareba etu. Pade aku daꞌa nerapi petulungi to masipato kutarima ewa sambaꞌa topanggeni Kareba Belo.
Paulus nantaꞌamaka dotana mboto ala iꞌa mamala manggeni tau momparasaya i Pue Yesus
19 Aku eꞌi daꞌa nipobatua ntau. Tapi naupa iwetu aku nombawai koroku majadi batua pura-pura tau ala aku mamala manggeni madea mpuꞌu tau momparasaya i Pue Yesus.
20 Ri tatongo tau-tau to Yahudi aku noinggu ewa tau to Yahudi. Ri tatongo ira to natundu riara Atura-atura agama Yahudi aku noinggu ewa tau to natundu riara Atura-atura etu, naupa aku mboto daꞌa mana nikuasai Atura-atura etu. Patujuku ala aku mamala manggeni ira to natundu riara Atura-atura agama Yahudi etu momparasaya i Pue Yesus.
21 Ri tatongo tau-tau daꞌa nangginjani Atura-atura agama Yahudi aku noinggu nasimbayu ewa tau daꞌa nangginjani Atura-atura agama Yahudi. Patujuku ala aku mamala manggeni ira momparasaya i Pue Yesus. Tapi ante mowia iwetu aku daꞌa nombaliunaka Atura-atura nu Alatala, sabana aku eꞌi natundu riara Atura-atura Kristus.
22 Ri tatongo tau-tau nalente pomparasayana aku noinggu nasimbayu ewa tau to nalentena ala aku mamala manggeni ira majadi topomparasaya i Pue Yesus to narosona. Aku nantuki mpengele-ngele inggu bo kabiasa ntau ala ante mpengele-ngele akala aku mamala mompakasalama sabagia nggari ira.
23 Etu pura-pura nipowiaku ala Kareba Belo mamala matolele pade ala aku mboto woꞌu mamala mombarata bagia riara rasi-rasi nggari Kareba Belo etu.
Kita kana mombakuasai dota korota ala mombarata hadia sampe ri kasae-saena
24 Natantu ninjani komimo ri posilumba mangowa pura-pura topangowa nangowa tapi aga sambaꞌa lau mombarata hadia padagi. Jadi komi woꞌu kana moinggu ewa topangowa. Pasimbukumo ante mpuꞌu-mpuꞌu rara ala komi mamala mombarata hadia.
25 Butu mbaꞌa tau to nantuki posilumba kana mombalati-lati korona mboto. Ira mowia iwetu ala mombarata hadia padagi to daꞌa nainti, etumo sangele songgo to nipowia nggari tawa-tawa to sampalai malele. Tapi kita eꞌi mombalati-lati korota ala mombarata hadia to mainti sampe ri kasae-saena.
26 Jadi etumo sabana aku daꞌa nangowa sambara. Aku daꞌa nojaguru ewa tau aga nombajaguru lombona.
27 Tapi aku nombalati-lati koroku pade nombakuasai dota koroku mboto ala maopu aku mompatolele Kareba Belo ka tau-tau ntanina neꞌe sampe aku daꞌa mombarata hadia.