Neꞌe mompasiala pokainggu nto Yahudi nggaolu
10
Sampesuwu-sampesuwuku, to nipodotaku ala komi mantora nuapa to najadi ante totuꞌata nggaolu tempo ira nantuki nabi i Musa. Ira pura-pura nikalendu kulimu to najadi tandaina Alatala nosanggani-nggani ante ira, pade ira pura-pura nombawote Tasi Nalei ante nasalama. a
2 Ira pura-pura ewa nidiu riara kulimu bo tasi etu ewa tandaina ira topantuki i Musa.
3-4 Ira pura-pura nanggoni panggoni to nasimbayu, pade ira pura-pura nanginu ue to nasimbayu. Panggoni bo panginu etu nggari jaꞌi Alatala mboto. Ira pura-pura nanginu ue to nesuwu nggariara bulu watu. Bulu watu etu nirapaka ewa Kristus to nalau mpasanggani-nggani ante ira. b
5 Tapi naupa iwetu sabagia bete nggari ira daꞌa nikonoa rara Alatala. Nanotomo etu sabana nadea ira namate-mate ri karawa baina.
6 Etu pura-pura najadi ewa jonjo mompopatora ka kita ala neꞌe kita maino mompowia to najaꞌana ewa to nipowia ira.
7 Jadi neꞌe kita mepue ka pue-pue ntanina ewa to nipowia sabagia nggari ira nggaolu. Riara Buku Nagasa naria nitulisi ewa pokainggu ira etu iweꞌi: “Todea etu nekatoko nanggoni bo nanginu, pade naopu etu nekanggoremo ira nadamba-damba nepue ka pue-pue ntanina.” c
8 Neꞌe kita mogau sala ante tau daꞌa rongota mboto ewa to nipowia sabagia nggari ira. Toramo! Nggari powia ira etu riarana saeo rompulu bo tolunjobu mbaꞌa ira namate sanggani. d
9 Neꞌe kita manjapuaka i Pue ewa to nipowia sabagia nggari jaꞌi ira. Toramo! To nompowia etu namate niteꞌo ule! e
10 Pade neꞌe kita mokagagutu-gutu ewa to nipowia sabagia nggari jaꞌi ira. Toramo! To nompowia etu nipatesi malaeka i Pue! f
11 Etu pura-pura najadi ri jaꞌi ira ewa jonjo ka kita. Pade kajadia-kajadia etu nitulisi riara Buku Nagasa ala majadi popatora ka kita to natuwu weꞌi-weꞌi tempo namosu kaopu nu dunia.
12 Jadi komi to nompekiri daꞌa mamala rapakanawu riara silaka, pakabelo-belo! Neꞌe sampe komi woꞌu manawu riara silaka!
13 Pesoba-pesoba to nawela komi nasimbayu ewa pesoba-pesoba to nawela pura-pura manusia. Tapi Alatala namala raparasaya mantulungi komi. Iꞌa daꞌa mompakamba komi rapesoba ante pesoba to meliu nggari pompakule komi. Tempo komi rapesoba Iꞌa kana mompakanoto ka komi jala mesuwu nggari pesoba etu ala komi mamala mantaꞌamaka sampe ri kaopu nu pesoba etu.
Neꞌe manggoni ri posusa to mombabila pue-pue ntanina
14 Jadi sampesuwu-sampesuwu to nipotoweku, neꞌe ntoto mepue ka pue-pue ntanina!
15 Aku notesa ka komi ewa tau-tau to nanotona. Jadi pekirimo riara ntaꞌimu mboto ane tesaku eꞌi nakono atau daꞌa.
16 Tempo kita manginu panginu ante manguli tarima kasi ka Alatala ri posusa mantora kamate i Pue Yesus, natantumo etu tandaina kita nombarata bagia riara kuasa lei Kristus. Pade tempo kita nanggoni roti to nibingga-bingga riara posusa etu, natantumo etu tandaina kita nombarata bagia riara koro Kristus.
17 Naupa kita nadea, kita pura-pura najadi saongu, sabana ri posusa mantora kamate i Pue etu naria saongu lau roti to nikonita mpasanggani-nggani.
18 Pekiri woꞌumo kabiasa tau-tau to Israel. Tempo ira nanggoni panggoni to nipesomba ka Alatala ri meja mpesomba riara Sapo Mpepue, ira najadi nosaongu rara ante Alatala to nipesomba ri meja mpesomba etu.
19 Jadi nuapa patuju tesaku etu? Bara maria to nompekiri patujuku iweꞌi: Pue-pue ntanina to nipakoni mpuꞌu-mpuꞌu sangele to nakono pade panggoni to nipakoni ka ira sangele to noguna.
20 Tapi etu daꞌa ntoto nakono! To nipatujuku iweꞌi: Panggoni to nipakoni ntau ka pue-pue ntanina kakonona nipakoni ka seta-seta, etu daꞌa nipakoni ka Alatala. Pade aku daꞌa madota ala komi majadi nosaongu ante seta-seta.
21 Daꞌa ntoto masipato komi manginu panginu ri posusa mantora kamate i Pue ane komi woꞌu manginu panginu ri posusa mombabila seta-seta! Daꞌa ntoto masipato komi mekatoko manggoni panggoni ri posusa mantora kamate i Pue etu ane komi woꞌu manggoni panggoni ri posusa mombabila seta-seta!
22 Iwenumo? Komi madota mompakajuꞌa rara i Pue? Komi neliu nggakuasa nggari Iꞌa? Natantumo daꞌa!
Powiamo nuapa to nanggeni belo ka tau ntanina
23 Naria tau nanguli, “Pura-pura pokainggu nipaloga ka aku.” Etu nakono, tapi daꞌa pura-pura pokainggu nanggeni belo. Pura-pura pokainggu nipaloga, tapi daꞌa pura-pura pokainggu nompakaroso rara todea topomparasaya.
24 Neꞌe aga mompekiri kabelo koromu mboto, tapi pekirimo nuapa to nanggeni belo ka tau ntanina.
25 Komi mamala manggoni mpengele-ngele bau to nipobalu ri potomu. Daꞌa paraluu rapekutana ane bau etu nipesomba ka pue-pue ntanina. Daꞌa paraluu rapekiri komi ane powiamu etu nasala bara daꞌa.
26 Sabana riara Buku Nagasa naria nitulisi iweꞌi: “Njumaongu dunia bo pura-pura isina anu i Pue.” g
27 Ane komi ragaga ntau daꞌa topomparasaya malau manggoni ri sapona, pade komi madota malau manggoni ante iꞌa, konimo nuapa-nuapa to ratibo ka komi. Daꞌa paraluu rapekutana ane panggoni etu nipakoni ka pue-pue ntanina. Daꞌa paraluu rapekiri komi ane powiamu etu nasala bara daꞌa.
28 Tapi ane maria tau manguli ka komi, “Panggoni eꞌi nipakoni ka pue-pue ntanina,” neꞌe rakoni komi panggoni etu ala mombatora kabelo ntau to notesa etu ka komi, pade ala neꞌe mompakasusa pekiri rara ntaꞌi.
29 To nipatujuku neꞌe mompakasusa pekiri rara ntaꞌi tau etu, daꞌa pekiri rara ntaꞌimu mboto.
Tapi bara maria to mekutana, “Nokuya aku daꞌa mamala mowia sangele sabana etu nireke nasala riara pekiri rara ntaꞌi tau ntanina?
30 Ane aku manguli tarima kasi ka Alatala daꞌapa aku manggoni, nokuya aku nipakasala ntau sabana nanggoni panggoni to niposambayaku?”
31 Sampesuwu-sampesuwuku, iweꞌimo pesonoku: Nuapa-nuapa mupowia, nabeloka manggoni, nabeloka manginu, nabeloka powia ntanina, kawiamo etu ala nggari pokainggu komi etu Alatala rabila bo ratoiya.
32 Neꞌe mompakanawu tau ntanina riara silaka ante pokainggumu, nabeloka tau-tau to Yahudi, nabeloka tau-tau to Yunani, nabeloka todea topomparasaya Alatala.
33 Aku mboto nompasimbuku matuwu mompakadamba rara pura-pura tau riara mpengele-ngele pokaingguku. Aku daꞌa aga nompekiri kabelo koroku mboto tapi aku nompekiri nuapa to nanggeni belo ka pura-pura tau ala ira mamala rapakasalama.