Petabe
16
Ante suraku eꞌi aku madota mompoposinjani komi ante sampesuwuta besi i Febe. Iꞌa sambaꞌa topantulungi todea topomparasaya ri ngata Kengkrea.
2 Kuperapi ala komi mantarima iꞌa ewa sampesuwumu riara i Pue, sabana etu pokainggu to masipato ka topomparasaya i Pue Yesus. Ane maria to niparaluuna tulungimo iꞌa, sabana iꞌa mboto nantulungi nadea tau, pade aku mboto woꞌu nitulungina.
3 Pakasampe tabeku ka ira i Priskila bo Akwila, roa-roaku sampokarajaa nanggeni Kareba Belo Yesus Kristus.
4 Ira sakedika namate nantulungi aku. Aku nosukuru ka ira, pade daꞌa aga aku tapi pura-pura topomparasaya daꞌa to Yahudi woꞌu.
5 Pakasampe woꞌu tabeku ka topomparasaya i Pue Yesus to nodade ri sapo ira.
Pakasampe tabeku ka Epenetus to nipotoweku. Iꞌa tau pamulana to nomparasaya Kristus ri Propinsi Asia.
6 Pade pakasampe woꞌu tabeku ka i Maria. Iꞌa nokarajaa ntomo ka komi.
7 Pakasampe tabeku ka Andronikus bo Yunias, sampesuwu-sampesuwuku to Yahudi. Ira nitarunggu mpasanggani-nggani ante aku bo ira nibila pura-pura suro i Pue Yesus. Daꞌapa aku nomparasaya Kristus ira nokolu nomparasaya.
8 Pakasampe tabeku ka Ampliatus to nipotoweku riara i Pue.
9 Pakasampe tabeku ka Urbanus, roata sampokarajaa nanggeni Kareba Kristus. Pade pakasampe tabeku ka i Stakhis to nipotoweku.
10 Pakasampe tabeku ka Apeles to mpuꞌu-mpuꞌu nompopokita katutuna nantuki Kristus tempo iꞌa nipandasa. Pade pakasampe tabeku ka ira Aristobulus saongu njapo.
11 Pakasampe tabeku ka i Herodion, roaku to Yahudi, bo ka ira nggari sapo i Narkisus to nomparasaya i Pue.
12 Pakasampe woꞌu tabeku ka i Trifena bo i Trifosa to nokarajaa ntomo nanggeni Kareba i Pue. Pade pakasampe tabeku ka i Persis to nipotoweku to nokarajaa ntomo nanggeni Kareba i Pue.
13 Pakasampe tabeku ka i Rufus bo indona to nipoindoku woꞌu. Rufus sambaꞌa topomparasaya to noangga ri ngayo i Pue.
14 Pakasampe tabeku ka Asinkritus, i Flegon, i Hermes, i Patrobas, i Hermas bo sampesuwu-sampesuwu topomparasaya to nosanggani-nggani ante ira.
15 Pakasampe tabeku ka i Filologus bo Yulia, i Nereus bo sampesuwuna besi Olimpas bo ka pura-pura topomparasaya to nosanggani-nggani ante ira.
16 Posipakasampemo tabe sambaꞌa bo sambaꞌa ante towe. Pura-pura topomparasaya Kristus woꞌu nompakasampe tabe ira ka komi.
Pepatuduki kaopuna
17 Sampesuwu-sampesuwu, kuperapi ante mpuꞌu-mpuꞌu ala komi mainga ri jaꞌi ira to nompakagado topomparasaya bo nanggeni tau manawu riara silaka ante pepatuduki ira to nangewa pepatuduki to nipatuduki ka komi bopia. Pakakawaomo komi nggari jaꞌi tau-tau ewa etu.
18 Sabana tau to noinggu iwetu daꞌa nantuki Kristus, Pueta, tapi ira aga nantuki dota rara ira mboto. Ira nombabagiu tau to danagasa rarana ante tesa-tesa ira to napande bo namomi.
19 Kareba komi natiepe ri umba-umba. Pura-pura tau nangepe lelena iwenu komi natundu riara Kareba Belo. Etu sampe nadamba mpuꞌu raraku nompekiri komi. To nipodotaku ala komi mapande mangginjani powia to nabelona bo makawao nggari kajaꞌana.
20 Pue Alatala, puꞌu katuwua nabelo, kana masalisa mantulungi komi mombadagi Magau nu Seta. Perapi towe belo nggari jaꞌi Pueta Yesus mosanggani-nggani ante komi.
21 Tarimamo tabe nggari jaꞌi Timotius, roaku sampokarajaa, pade nggari jaꞌi Lukius, Yason bo i Sosipater, roa-roaku to Yahudi.
22 Aku, Tertius, to nipopale i Paulus nantulisi sura eꞌi, aku woꞌu mompakasampe tabeku riara i Pue ka komi pura-pura.
23 Tarima woꞌu tabe nggari jaꞌi Gayus. Aku Paulus, nipalogana naturu ri sapona, pade pura-pura topomparasaya ri seꞌi woꞌu nodade ri sapona. Tarimamo tabe nggari jaꞌi Erastus, topombaurusi doi ri ngata eꞌi. Pade tarima woꞌu tabe nggari jaꞌi sampesuwuta i Kwartus. [
24 Perapi towe belo Pueta Yesus Kristus mosanggani-nggani ante komi pura-pura. Amin!]
Dade nombatoiya Alatala
25 Ratoiyata Alatala! Iꞌa nakuasa mompakaroso pomparasaya komi nantuki Kareba Belo to nipatoleleku, etumo tesa ewa Yesus Kristus. Kareba Belo etu nitabuniaka nggari lamba pamulana,
26 tapi ri tempo weꞌi-weꞌi etu nipopanjani nggari buku-buku to nitulisi nabi-nabi nggaolu. Kareba etu nipatolele ka pura-pura manusia nantuki parenta nu Alatala to natuwu sampe ri kasae-saena. Patujuna ala ira pura-pura momparasaya bo matundu ri jaꞌina.
27 Iꞌamo Alatala sambaꞌa lau. Iꞌamo to nangginjani mpengele-ngele. Iꞌamo to masipato ratoiyata sampe ri kasae-saena sabana nuapa to nipowia Yesus Kristus. Amin!
Tabe nggari jaꞌiku,
Paulus