Kita kana mantulungi roata to nalente pomparasayana, neꞌe aga mompekiri kasana rarata mboto
15
Kita to naroso pomparasayata masipato mantulungi roa-roata to nalente pomparasayana. Neꞌe aga mompekiri kasana nu rarata mboto.
2 Kita masipato mompakasana rara sanggamanusiata ala mompakabelo ira bo mompakaroso pomparasaya ira.
3 Sabana Kristus woꞌu daꞌa aga nangelo kasana nu rarana mboto, tapi Iꞌa nasadia nipandasa. Naria nitulisi riara Buku Nagasa iweꞌi: “Pura-pura tesa ira to nanjalai Alatala nawela aku.” a
4 Pura-pura nuapa to nitulisi riara Buku Nagasa nggaolu nitulisi ala mompatuduki kita. Nggari pepatuduki to niratata nggari Buku Nagasa kita majadi maroo tempo nipandasa, pade pomparasayata rapakaroso sampe kita maroo manjarumaka Alatala.
5 Perapi Pue Alatala, to nompakaroso pomparasayata bo nompakaroo rarata tempo kita nipandasa, mantulungi komi matuwu mosaongu rara sambaꞌa bo sambaꞌa nantuki jonjo Yesus Kristus
6 sampe komi mosaongu rara mantoiya bo mombabila Alatala, Uma nu Pueta Yesus Kristus.
Kita kana mositarima sambaꞌa bo sambaꞌa sabana kita pura-pura nitarima Alatala
7 Jadi sampesuwu-sampesuwu, komi kana mositarima sambaꞌa bo sambaꞌa ante mabelo nasimbayu ewa Kristus woꞌu nantarima komi ala ante iwetu Alatala rabila bo ratoiya ntau.
8 To nipatujuku iweꞌi: Kristus narata ri dunia mantulungi tau to Yahudi ala pojanji Alatala ka totuꞌa ira nggaolu madupa sampe manoto ka pura-pura tau Tesa nu Alatala etu nakono.
9 Pade Kristus woꞌu narata ala tau-tau daꞌa to Yahudi mantoiya Alatala sabana ira woꞌu nipoasi matana. Naria tesa riara Buku Nagasa ewa etu to nanguli iweꞌi:
“Sabana etu, O Pue, aku kana mombabila Komi ri tatongo tau-tau daꞌa to Yahudi.
Aku kana modade mombatoiya sangamu.” (2Sam. 22:50, Mzm. 18:50)
10 Pade naria tesa ntanina riara Buku Nagasa to nanguli iweꞌi:
“Umba komi tau-tau daꞌa to Yahudi,
Komi kana madamba-damba mpasanggani-nggani ante todea nu Alatala.” (Ul. 32:43)
11 Pade naria woꞌu tesa Alatala ntanina to nanguli iweꞌi:
“Umba komi tau-tau daꞌa to Yahudi,
komi kana mantoiya Alatala.
Pura-pura tau kana mantoiya Iꞌa.” (Mzm. 117:1)
12 Pade naria woꞌu tesa to nitulisi nabi Yesaya iweꞌi:
“Nggari muli Isai kana meumba sambaꞌa magau
to moparenta tau-tau daꞌa to Yahudi. b
Iꞌamo to majadi panjarumaka ira.” (Yes. 11:10)
13 Perapi Pue Alatala, puꞌu panjarumakata, mompakadamba rara komi bo mombawai ka komi katuwua mabelo sabana komi nomparasaya Iꞌa, sampe mantambai eona mantambai panjarumaka komi ri jaꞌina ante kuasa nggari jaꞌi Nosa Nagasana mboto.
Patuju Paulus mantulisi sura eꞌi
14 Sampesuwu-sampesuwuku, niparasayaku pokainggu komi batena nabelo. Ninjani komimo pura-pura pepatuduki to nakonona bo komi nompakule mosipakaroso rara sambaꞌa bo sambaꞌa.
15 Tapi naupa iwetu aku nabia sakedi nantulisi bara sakuya ngele ka komi. Patujuku ala mompopatora ka komi, sabana etumo bago to niparasaya Alatala ka aku.
16 Iꞌa nangonggotaka aku najadi batua Yesus Kristus ala rasurona mpaka ri jaꞌi tau-tau daꞌa to Yahudi. Bagoku etu namala nirapaka ewa bago topanggeni agama Yahudi to nanggeni pesomba ntodea ka Alatala. Sabana aku nompatolele Kareba Belo ka tau-tau daꞌa to Yahudi ala ira to momparasaya namala kukeni ka Alatala ewa pesomba. Pade pesombaku etu natantumo ratarimana sabana ira nipakagasa Nosa Nagasa nu Alatala mboto.
17 Jadi aku namala madamba-damba mompekiri bago to nituiku ka Alatala, sabana aku nosaongu rara ante Yesus Kristus.
18 Aku aga mabia motesa ewa nuapa to nipowia Kristus niposabana aku. Nggari tesa bo powiaku aku nanggeni tau-tau daꞌa to Yahudi matundu ri jaꞌi Alatala.
19 Pade etu nipowiaku ante kabaraka-kabaraka bo tandai-tandai to nipogumaa bo kuasa nggari jaꞌi Nosa Nagasa nu Alatala. Nggari ngata Yerusalem sampe ri tana Ilirikum pura-pura Kareba Belo ewa Kristus naopumo nipatoleleku.
20 Riara bagoku etu aku bate-batena nompasimbuku nompatolele Kareba Belo ka tau-tau to daꞌapa nangginjani sanga Kristus. Patujuku ala neꞌe sampe aku manggeni Kareba Belo ka tau-tau to naopu nikeni ka kareba etu.
21 Tapi aku madota mowia ewa to nitulisi riara Buku Nagasa to nanguli iweꞌi:
“Tau-tau to daꞌapa nikeni ka kareba ewa Iꞌa kana manggita Iꞌa.
Ira to daꞌapa nangepe kana mangginjani karebana etu.” (Yes. 52:15)
Paulus nopatuju malau mpaka ri ngata Roma
22 Sampesuwu-sampesuwu, kakonona nggari bagoku etumo sampe nadea ngganimo daꞌapa najadi aku malau manggita komi.
23 Tapi weꞌi-weꞌi bagoku ri seꞌi naopumo. Pade nompae-mpaemo dota raraku momai manggita komi.
24 Jadi nisarumakaku ane aku malau mpaka ri tana Spanyol aku mamala mesai manggita komi ri ngata Roma bo madamba-damba mpasanggani-nggani ante komi sampalai. Naopu etu kusarumaka komi mamala mantulungi aku riara mpolumakoku mpaka ri tana Spanyol.
25 Tapi daꞌapa aku momai ri jaꞌi komi aku mokolu malau mpaka ri ngata Yerusalem manggeni petulungi ka topomparasaya i Pue Yesus ri setu.
26 Sabana topomparasaya ri Propinsi Makedonia bo Akhaya nompakatantu mompakatu petulungi ka topomparasaya i Pue Yesus to napakasi ri ngata Yerusalem.
27 Etu nipowia ira nggari kadamba nu rara ira mboto. Tapi kakonona ira noinda ka roa ira topomparasaya to Yahudi iwetu. Sabana nggari tau to Yahudi sampe tau-tau daꞌa to Yahudi nombarata nadea rasi nggari jaꞌi Alatala. Jadi masipato mpuꞌu tau-tau daꞌa to Yahudi mantulungi tau-tau to Yahudi ante rasi nggari dunia eꞌi.
28 Jadi aku kana mokolu malau mpaka ri ngata Yerusalem manggeni doi petulungi to nipasiromu etu ka topomparasaya ri setu. Naopu etu aku kana mesai manggita komi riara mpolumakoku mpaka ri tana Spanyol.
29 Pade ninjaniku ane aku marata ri jaꞌi komi natantumo aku kana manggeni nadea rasi nggari jaꞌi Kristus ka komi.
30 Sampesuwu-sampesuwu, kita nosaongu rara ante Pueta Yesus Kristus bo kita mosipotowe sambaꞌa bo sambaꞌa ante pekeniaka Nosa Nagasa nu Alatala riara ntaꞌita. Sabana etu aku mpuꞌu-mpuꞌu merapi ka komi, pekakaimo ka Alatala mpasanggani-nggani ante aku riara posambayamu momposambaya aku.
31 Posambayamo ala aku mamala matipalewa nggari jaꞌi tau-tau to Yahudi ri Bagia Yudea to daꞌa nomparasaya i Pue Yesus. Pade posambaya woꞌumo ala doi petulungi to kukeni ka topomparasaya i Pue Yesus ri ngata Yerusalem mamala ratarima ira ante mabelo.
32 Ante iwetu, ane Alatala madota, aku mamala momai ri jaꞌi komi ante madamba mpuꞌu raraku, pade aku mamala mombarata kasana rara ri tatongo komi.
33 Perapi Pue Alatala, puꞌu katuwua nabelo, mosanggani-nggani ante komi pura-pura. Amin!