Neꞌe manjalaraka roamu topomparasaya ane pombaratana nosisala ante pombarata komi
14
Ane maria topomparasaya to nalente pomparasayana, tarimamo ira ante mabelo. Neꞌe manjalaraka pombarata ira.
2 Naria tau to nomparasaya iꞌa namala nanggoni mpengele-ngele panggoni. Tapi tau ntanina to nalente pomparasayana aga nanggoni uta-uta, daꞌa nanggoni bau.
3 Kakonona tau to nanggoni mpengele-ngele panggoni daꞌa masipato manjalaraka tau to daꞌa nanggoni bau. Pade tau daꞌa nanggoni bau, neꞌe manjalaraka tau to nanggoni mpengele-ngele panggoni. Sabana ira nitarima Alatalamo majadi todeana.
4 Daꞌa masipato komi manjalaraka batua tau ntanina. Ane pokainggu batua etu nakono atau nasala, etu urusa madikana mboto, daꞌa urusa komi. Kakonona pokaingguna bate-batena makono sabana Pue nakuasa nombasaro iꞌa.
5 Naria topomparasaya nompekiri saongu eo neliu nggabelo nggari eo ntanina. Tapi naria topomparasaya i Pue Yesus ntanina nompekiri pura-pura eo nasimbayu. To napokona butu mbaꞌa tau kana maroso momparasaya nuapa to naria riara ntaꞌina.
6 Tau to nombabila saongu eo nombabila eo etu sabana nipekirina etu nompakadamba rara i Pue. Pade waꞌa woꞌu tau to nanggoni mpengele-ngele panggoni. Nikonina etu sabana nipekirina etu nompakadamba rara i Pue, sabana iꞌa nanguli tarima kasi ka Pue Alatala. Pade waꞌa woꞌu tau to daꞌa nanggoni bau. Iꞌa daꞌa nanggoni bau sabana nipekirina etu nompakadamba rara i Pue, pade iꞌa woꞌu nanguli tarima kasi ka Alatala.
7 Kita daꞌa aga natuwu nantuki dotata mboto. Pade kita daꞌa namate nantuki dotata mboto.
8 Natuwu atau namate kita batena nantuki dota i Pue. Natuwu atau namate kita batena bagia i Pue.
9 Etumo sampe Kristus namate pade natuwu bali nggari kamatena, ala Iꞌa majadi Pue nu pura-pura manusia, nabeloka to natuwuna, nabeloka to namatena.
10 Jadi ane iwetu, nokuya komi nombasalaraka roamu topomparasaya? Nokuya komi nanjalai iꞌa? Toramo! Kita pura-pura kana mantingayo Alatala banepia ala ratangarana.
11 Nanotomo etu sabana riara Buku Nagasa naria nitulisi iweꞌi:
“Alatala nanguli, ‘Natantumo butu mbaꞌa tau kana motimbakotu ri ngayoku.
Pura-pura tau kana mompangaku Akumo Alatalana.’” (Yes. 14:23)
12 Jadi sampesuwu-sampesuwu, kita pura-pura kana mompangaku pokaingguta mboto ri ngayo Alatala banepia.
Neꞌe manggeni roamu topomparasaya rapesoba ante manggoni panggoni to nireke ira natantoru
13 Sabana etu kuuli ka komi, neꞌe mana kita mosisalaraka. Tapi kita kana mainga ala neꞌe maria pokaingguta to manggeni roata topomparasaya rapesoba atau manawu ante mowia pokainggu to nirekena nasala.
14 Ewa tau to nosaongu rara ante i Pue Yesus, ninjaniku bo niparasayaku daꞌa ria panggoni nuapa-nuapa to natantoru riara mpanggita Alatala. Tapi ane maria tau to nomparasaya panggoni etu natantoru, etu mpuꞌu-mpuꞌu natantoru ka iꞌa.
15 Ane nggari panggoni to nikoni komi roamu topomparasaya najuꞌa rarana, batuana komi mana matuwu ante towe. Neꞌe sampe panggoni to nikoni komi mompakagero pomparasaya nu roamu, sabana iꞌa woꞌu sambaꞌa topomparasaya to nitolo ante kamate Kristus.
16 Jadi neꞌe sampe panggoni to nireke komi nabelo rakoni majadi sabana sampe komi rasalai tau ntanina. Agina neꞌe manggoni panggoni to nireke roamu natantoru.
17 Sabana ane kita najadi todea to niparenta Alatala nuapa to nikonita atau niinuta daꞌa napokona. To napokona rarata kana manoa, kita kana matuwu mosinggabelo ante roata bo madamba-damba sabana naria Nosa Nagasa nu Alatala riara ntaꞌita.
18 Ane kita mantuki Kristus ante pokainggu iwetu, kita kana rakonoa Alatala bo rabila manusia.
19 Etu sampe kita kana mompasimbuku matuwu mosinggabelo ante roata, pade mosipakaroso rara sambaꞌa bo sambaꞌa.
20 Neꞌe sampe kita mompakagero nuapa to nipowia Alatala riara nggatuwu roata ante manggoni panggoni to nirekena natantoru. Kakonona pura-pura panggoni namala rakoni, daꞌa ria to natantoru. Tapi kita nasala ane nuapa to nikonita manggeni roata rapesoba.
21 Agina neꞌe mana manggoni bau atau manginu panginu to mepakalangu atau mowia nuapa-nuapa to mombagero pomparasaya roamu.
22 Ane komi nomparasaya powiamu etu daꞌa nasala, kawiamo etu ri ngayo Alatala aga komi mboto tapi neꞌe ri ngayo roa-roamu to nalente pomparasayana. Nasana mpuꞌu tau to daꞌa nisalaraka pekiri rara ntaꞌina mboto ewa nuapa to nirekena namala rakonina.
23 Tapi tau to norongu rara manggoni sangele, iꞌa nasala ane manggoni panggoni etu, sabana iꞌa daꞌa nantuki nuapa to niparasayana. Pade nuapa-nuapa to nipowiata anu daꞌa nantuki pomparasayata, powia etu silaka.